Nita olo ketete kwin ni kukwe nuakäre ya yebätä töbikadre

1, 2. a) ¿Jehová tä dre bien nie nengwane? (Salmo 23:​1, 2, 5). b) ¿Drebätä nikwe ja kitai kukwe ja tötikara nekänti?

KÄ NENGWANE, Jehová tä mrö ja üaire bien krubäte nie. Ye medenbätä, ni raba kukwe niebare Davidkwe, ne niere: “Jehová abokän ti Ngübaka oveja erere. Jondron jökrä täi tikwe” (ñäkädre Salmo 23:​1, 2, 5 yebätä).a

² Gätä nuainta konkrekasionte yebiti Jehová tä mrö ja üaire ye bien nie. Aune gätä yete kukwe gare nie ye kädrie tärä bä kabre. Ñobätä ñan aune ni niena ünä ja üairebiti akwa kukwe ye ngwandreta törö nie ye nita ribere jai (2 Ped. 1:12). Kukwe keteiti garera nie yebätä kukwe kädrieta gätäte ye nita kite nainte kukwe nuakäre ngwane, kukwe ja tötikara ne käkwe ni dimikai. Ñodre, gätä yete metrere nireta ni tötike aune ñobätä ütiäte gätä kukwe nuadre kwin bätä ni kukwe kädriekä rabadre dre nuainne ne kwe kukwe kädrieta ye nikwe kukwe nuadre kwin aune dre dre raba ni dimike gätä kukwe nuin kwin yebätä ani blite.

GÄTÄ YEBITI JEHOVATA BLITE NIBE

3. ¿Ño Jehová tä blite nibe aune ni Ngöbö mikaka täte tä dirire ño Biblia yebiti?

³ Biblia yebiti Jehová tä blite nibe (2 Tim. 3:​16, 17). Ye nämäne gare kwin Jesús ie ye medenbätä nämäne blite ngwane, Ngöbö kukwei yebiti nämäne blite käre. Ye medenbätä, nitre ruäre namani ngwentari jai: “Ni ne ñan janamane kwelate amare Ngöbö Kukwei gare krubäte ie se” (Juan 7:15). Jesús nämäne kukwe driere Ngöbö kukwei yebiti ye nitre tö nämäne kukwe nuai. Aune siklo kena yete Pablo aune Apolos käkwe nuainbare, Ngöbö kukwei yebiti kukwe driebare kwetre (Hech. 17:​2, 3; 18:​24, 28). Nengwane arato, Biblia ye ütiäte krubäte ni testiko Jehovakwe kräke, yebätä täräkwata sribeta, kukwe kädrieta, JW Broadcasting® aune video keta kabre mada kukwe nieta yete ye jökrä tä Bibliabätä. Nitre tä nüke kena gätäbätä töita nemen ñan krütare, ñobätä ñan aune yete ñäkäta krubäte Bibliabätä. Ne ñan ngörä nitre tä kukwe bämike gätäte ye tä ñäke Ngöbö kukweibätä akwa mika raba ño täte ye nieta kwetre arato (Luc. 24:32).

4. ¿Ni kukweta juruen nie aune ni kukwe nuin nieta yebiti kukwe meden ütiäte mikata gare?

⁴ Ni kukweta juruen nie aune ni kukwe nuin nieta Bibliabätä ngwane, bä kabre blitata “ni ja mikadre täte” yebätä. Aisete Biblia yebiti Jehová tä blite nibe gätäte nemen gare ni ngwane, töita ño ye tä nemen bäri nuäre ni kräke mikakäre täte. Ne madakäre, nita gätä kukwe nuin kwin aune dre nieta gätäte ye nita mike täte ngwane, tä kä mike juto niarabätä (Prov. 27:11).

¿ÑOBÄTÄ ÜTIÄTE GÄTÄ KUKWE NUADRE KWIN?

5. ¿Jehová tare nikwe yekwe ni töi mikai dre nuainne? (Juan 4:​23, 24; 1 Juan 5:3).

⁵ Jehová tare nikwe yebätä (Mat. 22:37). Kukweta kite nemen gare bäri Jehovabätä nie yebätä nita kite niara tarere bäri. Ni töta nemen kukwe nuai aune mikai täte tä nemen tuin kwin ie ye erere (ñäkädre Juan 4:​23, 24; 1 Juan 5:3 yebätä).

6. ¿Dre drieta gätäte nie?

⁶ Ni mada tare nikwe yebätä (Mat. 22:39). Gätä yebiti ja mräkätre aune ni ie Jehová ñan gare dimikadre ño ye Jehová tä driere nie. Ñodre, tärä chi Nitre tarere tötikakäre yebiti tä ni dimike ja töi mike kwin ni mada kräke nita kukwe driere ietre ngwane. Akwa, ñan tä nemen nuäre ni kräke blita kömikakäre ngwane, bäri kwin ja töi mikadre kukwe bämikata gätäte ye kukwe nuin kwin ye köböire rabai nemen bare.

7. ¿Ñobätä ütiäte krubäte nikwe Jehová kukwe nuadre?

⁷ Ja nire ye tare nikwe yebätä. Jehovakwe nitre mekerabe töi mikani ja mike täte ye erere nikwe niara mikadre täte arato, nikwe ye nuaindi ye köböire nikwe nünandi kä jutobiti aune kärekäre (Deut. 32:​44-47). Kukwe nieta gätäte ye nikwe kukwe nuai kwin yekwe ja di biain nie kä bä nuäre nita ngübare ye ngübakäre jankunu (Rom. 8:25). Ye medenbätä, nengwane ütiäte krubäte nikwe Jehová kukwe nuadre ye köböire ni täi ngwäte ja üairebiti (Mat. 24:​42-44; Apoc. 1:3).

¿KUKWE NIETA GÄTÄTE YE JURUADRE BÄNGRABE NI MADAI YEKÄRE DRE NUAINDRE?

8. ¿Ñobätä ni kukwe kädriekä ja di ngwandre kukwe kädriekäre bängrabe?

⁸ Ja mräkätre tä kukwe kädriere gätäte ye rabadre ja di ngwen kukwe kädriekäre bängrabe. Ja ükateta kwin aune kukwe mikata gare metre ta Bibliabiti ngwane, ye tä ja mräkätre konkrekasionte ye dimike Jehová mike täte jankunu aune ni ñan testiko tä nüke gätäte ye töta nemen kukwe metre ye mikai gare jai. Yebätä kukwe biandre kädriere gätäte mäi ngwane ngwen törö jai, mäkwe nuaindi bängrabe ngwane mäkwe ni mada dimikai. Akwa ye nuainkäre ni raba dre dre nuainne ye rabai gare nie ja känenkäre. Metrere, kukwe ne tä ni kukwe kädriekä ye kräke akwa kukwe ne ni kukwe bämikaka gätäte ye kräke arato (2 Tim. 4:2; Tito 1:9).

9. ¿Ñobätä kukwe kädriedre kukwe nuärebiti ye ütiäte krubäte?

⁹ Mäkwe kukwe kädriedre ye mäkwe ükate kwin jatäri. Kukwe kädriedre kukwe kri kribiti ngwane ñaka rükai gare nitre mä kukwe nuaka ye ie. Ye medenbätä, ja di ngwen kukwe nuärebiti kukwe kädriekäre. ¿Ye nuain raba ño? 1) Dre drebätä mäkwe blitai ye mike gare käne. 2) Kukwe keteitire keteitire ye mike gare kwin, ne madakäre mä jämi blite kukwe madabätä ye känenkri mäkwe nünanka biti drebätä mäkwe blitai ye mika gare. 3) Mäkwe kukwe ye mikata gare mrä ngwankäreta törö.

10. ¿Ñobätä ütiäte kukwe kädriedre ye mikadre käne ja brukwäte?

¹⁰ Kukwe meden meden kädriei mäkwe ye mike ja brukwäte. Kukwe kädriedre yebätä, texto aune kukwe tä ükaninte jatäri yebätä mäkwe töbikaitari ngwane kukwe keta kabre tuin kwin mäi ye kwen mäi (Prov. 2:​4, 5). Aune mä täi kukwe kädriere ngwane, rabai nuäre mä kräke blitakäre kä jutobiti kukwe yebätä (Hech. 4:20). Ja mräkä iti nünanka Estados Unidos biti kä niena 70 biti bäri nämäne bati aune kukwe keteiti käi ñan nikwitekäbiti tä niere: “Ja mräkä iti kukwe kädrieba yekwe ti töi mikaba ñäke Bibliabätä aune töbiketaribätä. Nuaindre ño ye mikaba gare kwin kwe aune kukwe ye nämä era kräke rababa tuin tie. Yekwe ti dimikaba ja di ngwen ñäke Bibliabätä aune nemen ja ketamuko kwin Jehovabe”.

11. Mäta kukwe kädriere ngwane, mä tö dre mikai gare aune kukwe ye niedre metre ta ¿ye ñobätä ütiäte? (1 Timoteo 4:​13-16).

¹¹ Ni mä kukwe nuaka tä dre ribere jai yebätä töbike aune dre nuaindre kwetre ye mike gare ietre. Ñan jerekäbe ñäkädre biti ta Bibliabätä, ñakare aune niaratre töi mike jäme aune dre dre nuain raba kwetre ye mike gare ietre. Ñodre, Pablokwe nuainbare Timoteo nämene Éfeso yekänti ngwane kukwe mikani gare kwe Timoteo ie ne kwe tädre dite ja üairebiti (ñäkädre 1 Timoteo 4:​13-16 yebätä). Nire nire kräke mäta kukwe kädriere ye tädre dre ribere jai ye mike gare jai ye ererebätä mäkwe kukwe mika gare ietre.

12. ¿Kukwe kädrieta ngwane nuaindre ja kukwei jeñebiti ye ñobätä ütiäte?

¹² Mäta ja kite kukwe kädriekäre ngwane, mä nuain ja kukwei kribiti ye köböire ja kukwe jeñe biti mätä blite rabai tuin. Kä rükai mäi kukwe kädriekäre ye ngwane, mä ñan ñäkäi jerekäbebätä. Aune mä täi dre niere ye rükai gare nuäre nitre tä mä kukwe nuin ye ie aune dimikadi kwe. Ñodre, tärä Ñäkädre kwin täräbätä aune diridre kwin tä ne niere: “Mäkwe blita bängrabe aune ja brukwä tätebiti, ye köböire kukwebätä mätä blite aune nitre mä kukwe nuaka ye ütiäte mä kräke ye mäkwe bämikai”. Aisete, mä kukwe kädriei kore ngwane, nitre tö rabai kukwe kädrieta ye kukwe nuai aune mikai täte.

13. Kukwe biandre kädriedre nie ngwane, ¿ñobätä ütiäte ja di kärädre ni ie kukwe kädrie gare yei? (Üai mikadre ñärärä).

¹³ Ja di kärädre ja mräkä ie kukwe kädrie gare kwin. Ñodre, nikwe dre niedi ye nikwe tikabare jai ngwane mikadre tuare ie aune nita ja kite ngwane, meden känti ni raba nuainne bäri kwin ye niedre kwe nie ye ribedre ie aune erere nikwe nuaindre. Ye köböire ni raba nemen ni dirikä kwin (Prov. 1:5). Ni kukwe kädriekä jökrä ie kukwe ruäre tärä nemente niekäre, ñodre ni tö dre niere o kukwe meden mike nuaindre ye ñaka nüke gare merebe, aisete nikwe nuaindre ño ye ni mada käkwe niedre nie ye tä ni dimike. Ni rabai ni kukwe kädriekä kwin aune dirikä kwin ye kwrere ngwane, nitre tä ni kukwe nuin ye ie kukwe ja üaire ye rükai gare bäri kwin.b

¿DRE NI DIMIKAI GÄTÄ KUKWE NUIN KWIN?

14. ¿Ñobätä nikwe ja töi mikadre ni Salmo 119 tikaka erere? (Salmo 119:​24, 111, 167).

¹⁴ Jehovata kukwe ngwenta törö nie ye mikadre tuin ütiäte jai. Kukwe keta kabre taretare ben nita ja tuin “kä krüte” nete yebe ja tuakäre Jehovakwe kukwe ngwandreta törö nie ye nita ribere jai(2 Tim. 3:1). Akwa nita kukwe keteiti kukwe nuin bä kabre nuin nie ngwane bäri kwin nikwe ja töi mikadre ni Salmo 119 tikaka käkwe debe biani Jehovakwe kukwe ngwaninta törö ie yebätä (ñäkädre Salmo 119:​24, 111, 167 yebätä).c

15. ¿Mrö ja üaire nita kai ngäbiti gätäte ye dre raba ni dimike mike tuin ütiäte jai?

¹⁵ Nikwe debe biandre käre mrö ja üaire yebätä ye ütiäte krubäte rabadre gare nie yekäre nikwe kukwe namani bare juta Israel yebätä ye ngwandre törö jai. Nämenentre kä nötare yekänti Jehovakwe niaratre bukani maná yebiti, ye käi namani juto bätätre ruin nie. Namani bänänte kräketre aune ye kwetadre kwetre rabadre nire yekäre (Éx. 16:​15, 31). Aune nuainbare kwetre kenanbe akwa kä nikani ta ye ngwane, namanintre nainte maná ye käne aune ñan jatanintre debe bien (Núm. 21:5). Ye erere tä nemen bare kukwe ja üaire yebätä nengwane nita kukwe ara kukwe nuin bati bobu ruin nie akwa ni ñan randrete. Kukwe ye kite Jehovakri aune juta Jehovakwe ye tä ja di ngwen ye ükete kwin nikrä yebätä debe biandre, nikwe ye kain ngäbiti ye käkwe ni mikai töbätä aune ja nire kärekäre ye rabai nikwe (Prov. 3:​13, 16-18; Juan 17:3).

16. ¿Kukwe kädrieta gätäte ye tä nitre tä mekerabe kukwebätä ye dimike ño gätä kukwe nuin kwin? (recuadro “Olo ketatekäre kwekebe gätä ie, kukwe ne nuaindre” mikadre ñärärä)

¹⁶ Ni raba kukwe ne kwrere nuainne gätä kukwe nuakäre kwin. Meri testiko kä Ashley, kä niena 30 biti Jehová mikabätä täte, niara tä niere: “Ja tötikakäre kwin gätä kräke ye ütiäte krubäte. Ti ñan tä ja tötike kwin ye ngwane, ñan nemen nuäre tikrä ja kukwei biankäre gätäte aune gätä kukwe nuakäre kwin”. József, biti kä niena 52 näre Jehová mikabätä täte, niara tä mike gare: “Kukwe arabätä blitata bati bobu ye tuin ütiäte tie, ñobätä ñan aune kukwe tä nüke gare bäri kwin tie kukwe bätä blitata ye ngwane. Ni kukwe kädriekä ye ñan kukwe kädriekä bäri kwin ngwane, ti ñan tä ja töi mike metrere kukwe yebätä, ñakare aune tä dre driere Bibliabätä yebätä tita ja töi mike metrere”.

17. ¿Dre mada nuain raba ne kwe nikwe gätä kukwe nuadre kwekebe? (Üai mikadre ñärärä).

¹⁷ Kukwe ne kwrere nuain raba arato gätä kukwe nuakäre kwin. 1) Mrödre räkä ne kwe köbö ñan rabadre nie gätäte. 2) Gätä kömika jämi ye känenkri ni rükadre aune ja täkärä känändre. 3) Teléfono (dispositivos electrónicos) ngö ötadre ne kwe ñan mä töi nikadre kwe. 4) Drebätä blita bike yebätä ja töi mike. 5) Nire tä kukwe kädriere ye ie mäkwe olo ketate kwekebe. 6) Dre drebätä tä blite ye tike täräbätä jai aune jüke. 7) Ñobätä blitata texto yebätä ye mike nüke gare jai. 8) “¿Kukwebätä blitata ye raba nitre konkrekasionte o nitre ie mäkwe kukwe driedi ye dimike kwe?” yebätä töbike. 9) Aune gätä kri ye känenkri drebätä blitai köbö yete yebätä ja kite käne. 10) Ja mikadre juto gätä kri ye kukwe nuakäre, mäkwe ja täkärä känä aune preludio bätä video musical mikata tuare ye kukwe nuin kwekebe.

NIKWE JEHOVÁ KUKWE NUADRE JANKUNU

18. ¿Ñobätä nikwe gätä kukwe nuadre jankunu?

¹⁸ Nikwe gätä kukwe nuadre kwekebe ye kwin nikrä ñobätä ñan aune yebiti nita ja tuen metre jie ngwandre Jehovai nänkäre“ji metre” biti (Sal. 23:3; 31:3). Ni ñan rikadre ji blobiti yekäre Jehovakwe ni jie ngwandre ye nita ribere jai. Ye medenbätä, kukwe tä nemen gare gätäte nie ye erere nikwe ja töi mikadre nuainne (Luc. 8:18). Aisete, nikwe Jehová kukwe nuadi ngwane, nikwe nünandi kä jutobiti nengwane aune ja känenkäre ja nire kärekäre rabai nikwe (Sal. 119:​2, 14).