‘Ogenderere Kulambagira Omu Kuli’

 1. Nyungu zihe rhunagwarha omu kuganira nka gurhe rhwabaga Bahamirizi ba Yehova?

“GURHE wamenyaga okuli?” Nkabaga wamashubiza kanene kw’echola chibazo. Echola chili chibazo chirhanzi omu bibazo rhunasima kubaza bene-berhu na bali-berhu amango rhulonzeze kubamenya bwinja. Rhunasima rhuyunve okuntu bene-berhu na bali-berhu bahikiraga kumenya n’okuzigira Yehova, rhunasima kubabwira okuntu rhusimisizwe okuba baguma omu Bahamirizi ba Yehova. (Ro. 1:11) Kandi ezola nganiro zinahurhabala kukengera kangana gurhe rhusimisizwe okuba baguma omu Bahamirizi ba Yehova. Chiro kandi, rhwanava rhwahigirira bwenene “kulambagira omu kuli,” k’okuderha, kugenderera kulama akalamo kakarhulerhera emigisho ya Yehova n’okuyemerwa naye.​—3 Yo. 4.

 2. Bichi rhwaganirako mu gunola mwazi?

² Mu gunola mwazi, rhwaganira oku mpanvu zirhumire rhwazigira okuli. Naho rhwalola nka gurhe rhwakagenderera kuyerekana oku rhusimire olola luhembo lw’akamaro. Nta ngangane, okushuba ganira kw’ebyola kwarhurhabala rhushube gwarha eshukurani nene bwenene ku Yehova bulala arhukulwire omu kuli. (Yoh. 6:44) Kandi kwarhurhabala rhugwarhe enyorha nene y’okuyigiriza abandi okuli kwe Biblia.

 3. Mpanvu ehe y’akamaro bwenene erhumire rhwasiima okuli?

³ Hali mpanvu zinene zinarhuma rhwasiima okuli. Ey’akamaro bwenene, rhuzigire Yehova Mungu, oli Shoko y’enyigirizo z’okuli. Kugerera Echinwa chage Ebiblia, rhwahikiire kumumenya arhali nka Mulemi mugala-byoshi w’embingu n’egulu konyine, s’aliko nka Darha w’obuzigire onarhushishikala oku lukogo. (1 Pe. 5:7) Rhuyinji oku Mungu werhu ali “w’olukogo n’obonjo, orhagwarha burhe juba-juba onayunjulirene obuzigire bwimana n’okuli.” (Kut. 34:6) Yehova asima okunali. (Isa. 61:8) Binamubabaza amango ali abona okuntu rhuli rhwalibuka. (Yer. 29:11) Yi rhwalingiriza oku nyorha amango amala amalibuko! Eyola eli mpanvu nguma omu mpanvu zirhuma rhwazigira Yehova bwenene!

4-5. Bulagurhe Paulo ahuzanyaga obulangalire bwerhu n’enanga?

⁴ Yindi mpanvu ehe enarhuma rhwasima okuli? Okuli kunarhulerhera nyungu zinene. Rhuganire ku mufano muguma. Okuli kwe Biblia kuheberemo obulangalire bwerhu bw’amango mayinjire. Omu kuyerekana akamaro k’obola bulangalire, entumwa Paulo ayandika ntya: “Rhugwerhe obula bulangalire nka nanga y’obuguma-guma, y’okuchizera enaserere.” (Ebr. 6:19) Kuguma n’oku enanga enarhuma obwarho burhahehuka, intyo ku n’obwemere bwerhu buyumangiire oku Biblia bunarhurhabala rhuyorhe rhuserere amango rhuli rhwahurana ebibazo omu kalamo.

⁵ Ahala, Paulo aliri aganira oku bulangalire b’okuja embingu Abakristu bashigwa basiima bwenene. Aliko kandi ebyola binwa byage bilolere n’Abakristu bagwerhe obulangalire b’okulama esiku n’amango oku gulu nji lyaba paradizo. (Yoh. 3:16) Okuyiga oku bilolere obulangalire bw’akalamo k’esiku n’amango, byarhumire akalamo kerhu kagwarha omuhigo.

6-7. Nyungu zihe Yvonne abwene omu kuyiga okuli oku bilolere amango mayinjire?

⁶ Rhushambale oku mufano gwa mwali-werhu muguma oyirikirwe Yvonne. Abazere bage barhaliri Bahamirizi ba Yehova. Amango alichili mwana, aliri ayubaha olufu. Ayibukire omusemwa asomaga arhakayibirira haba n’akantu. Aderhere ntya: “Rhwakaba rhuliho zene aliko omusezi rhwanafa.” Ayongerere ntya: “Ebyola binwa byabera omu bwenge bwani byanambuza ero obudufu boshi nanahwanza okuwaza oku mango mani mayinjire. Nawaza ntya, akalamo ka kwanene kuba eyikagwerhe omuhigo. Bulagurhe indi oku gulu? Ntalilonzeze kufa!”

⁷ Buzinda amango Yvonne agera omu myaka y’olubiruko, ashambala n’Abahamirizi ba Yehova. Aderhere ntya: “Narhondera kugwarha obulangalire b’okulama esiku n’amango omu Paradizo oku gulu.” Nka gurhe okuyiga okuli kwalerheere mwali-werhu enyungu? Ayongerere ntya: “Ntachiyorha nzene obudufu boshi eyi ndi nawaza oku mango mani mayinjire changwa oku bilolere olufu.” Biyerekenwe wazi oku Yvonne asimire okuli kwe Biblia, anagwarha omwishingo gunene bwenene amango ali aganira n’abandi oku bilolere obulangalire bwage bw’amango mayinjire.​—1​Ti. 4:16.

8-9. a) Omu mufano muguma gwa Yesu, obuhirhi mulume muguma abonaga, bwaliri bwa kachiro kangana gurhe? b) Okuli kuli kw’akamaro kangana gurhe emwawe?

⁸ Kandi okuli kwe Biblia kuheberwemo emyazi minja oku bilolere Obwami bwa Mungu. Yesu alihuzene okuli oku bilolere Obwami n’obuhirhi bubishirwe. Omu ngani eli omu Matayo 13:44, Yesu aliderhere ntya: “Obwami bwe mbingu buli nka buhirhi bubishirwe omu shwa, obu mulume muguma abonaga n’okububisha; na bulala aligwerhe omwishingo, agenda aguza buli chintu choshi aligwerhe n’okugula elyola shwa.” Okuderha okuli, oyola mulume arhaliri alonza obuhirhi. Aliko amango abubona, alekana na byoshi aligwerhe y’abugwarha. Kweri, echola charhuma aguza buli choshi aligwerhe y’abugwarha. Bulagurhe? Alimenyere kangana gurhe obola buhirhi bwaliri bw’akamaro. Bwaliri bw’akamaro bwenene kulusha buli chintu choshi alikwanene alekane nacho.

⁹ Ka ntyo kunawe onachiyunva oku bilolere okuli? Nta ngangane, intyo ku bili! Rhumenyere oku nta chintu ch’akamaro n’echiguma linola gulu lyakarhuha rhwakahuzanya n’obusime rhugwerhe b’okukolera Yehova zene, haguma n’obulangalire bw’akalamo k’esiku n’amango omu mango mayinjire eshishi y’Obwami bwa Mungu. Olukengo rhugwerhe l’okusiimira obwira bukomere haguma na Yehova, lulushire echintu choshi-choshi rhwalekana nacho. Obusime bwerhu bunene bwenene kuli “kumusimisa loshi.”​—Kol. 1:10.

10-11. Bichi byarhabalaga Michael ahindamule ebintu bikomere omu kalamo kage?

¹⁰ Bantu banene mu rhwabo balekene na bintu binene yi bayemerwa na Yehova. Baguma balekere amakasi mabo m’omu gulu ma furanga zinene. Abandi balekere okukulikiranya obuchire. N’abandi, bahindamwire loshi akalamo kabo amango bayigaga oku bilolere Yehova. Intyo ku Michael ajiraga. Abazere bage barhaliri Bahamirizi ba Yehova. Amango alichili musole, aliri akoomezwa oku masharha m’akarate. Aderhere ntya: “Nyono naliri nabona ok’okugwarha amagala menja che chintu ch’akamaro bwenene ku nyono. Mango maguma, naliri nabona oku ntaye wakampima.” Aliko amango ahwanza kuyiga Ebiblia, Michael amenya okuntu Yehova anabona eby’obubandi. (Zb. 11:5) Michael aderhere ntya oku bilolere mulume muguma na mukage baliri bayiga haguma naye Ebiblia: “Nta lusiku haba n’oluguma balichigerere mbwira oku ndeke akarate; bagenderera kunyigiriza Ebiblia konyine.”

¹¹ Oku Michael aliri agenderera kuyiga oku bilolere Yehova, ku n’obuzigire amugwerheko bwaliri bwagenderera kuluga. Okuntu Yehova anakolera oku lukogo abanamuharamya, kwalimuhumire oku murhima bwenene. Oku ebisanzi byanaliri byagera, Michael abona oku bimuhemere arhole omuhigo g’okuhindamula akalamo kage. Aderhere ntya: “Nalimenyere ok’okuleka akarate che chakabere chintu chikomere bwenene ntasaga jira omu kalamo. Aliko nalimenyere ok’okujira ntyo, kwakasimisize Yehova, na nalichizerere ok’okumukolera k’okwaliri kw’akamaro bwenene kulusha ebindi byoshi nalekene nabyo.” Michael amenyere oku okuli abaga amenyere k’okwaliri kwa kamaro bwenene, echola charhuma aba tayari kuhindamula ebintu bikomere omu kalamo kage.​—Yak. 1:25.

12-13. Gurhe okuli kwe Biblia kwarhabalaga Mayli?

¹² Omu kuyerekana akamaro k’okuli, Ebiblia ehuzenye okuli n’etara lili lyamoleka omu mwizimya. (Zb. 119:105; Efe. 5:8) Mayli, w’omu chihogo che Azerbaijan, alibwene ok’oburhabale b’omu Chinwa cha Mungu ahabirwe oku buli bw’akamaro bwenene. Abazere bage barhaliri mu dini liguma. Eshe aliri omu dini ly’Abaislamu, na nyina aliri omu dini ly’Abayahudi. Aderhere ntya: “Chiro akaba oku ntaligwerhe engangane oku Mungu abaho, haliri ebintu byaliri byanderhera emilago omu bwenge. Naliri nachibaza ntya: ‘Charhumaga Mungu alema omuntu, na bulagurhe omuntu akalibuka omu kalamo kage koshi n’okushuba kulibuzwa esiku n’amango omu muliro? Bulala abantu banaderha oku buli chintu chinajirika buli bulonza bwa Mungu, nayinja nachibaza ntya: Mungu analerhera abantu amalibuko naho anajagwarha obusime amango ali abona okuntu bali balibuka?’”

¹³ Mayli agenderere kulonza ebishubizo oku bibazo byage. Enyuma w’ahola, ayemera kuyiga Ebiblia, anaba Muhamirizi wa Yehova. Aderhere ntya: “Okuchizera enyigirizo zifarhene n’obwenge zili omu Biblia, kwa ntabere mbe muntu ogwerhe obusime. Ebishubizo birhengere omu Chinwa cha Mungu byalirhumire nagwarha omurhula gwa ndani.” Kuguma na Mayli, rhweshi rhuhere Yehova obukuuze, “warhuhamagere kurhenga omu mwizimya n’okurhuheba omu bumoleke bwage busomeze.”​—1 Pe. 2:9.

14. Bichi byakarhurhabala rhusime bwenene okuli? (Olole n’echisanduku “Ebindi Bintu Rhwakahuzanya n’Okuli.”

¹⁴ Enola eli mifano migeke eyerekene akamaro k’okumenya okuli. Nta ngangane, wakaba ey’omenyere eyindi mifano minene eli nk’eyola. Wakayiga omu funzo lyawe wenyine ezindi mpanvu zirhumire wasiima okuli. Oku wagenderera kusiima okuli, kuwanagenderera kubona ezindi njira wakayerekanamo ok’osiimire ezola nyigirizo z’okuli.

15. Mu njira nguma ehe rhwakayerekanamo oku rhusimire okuli?

¹⁵ Rhwakayerekana oku rhusimire okuli omu kuyiga oku kahunda Ebiblia n’ebitabu biyumangiire oku Biblia. Kweri, chiro akaba rhwamalegama omu kuli changwa nanga, buli mango, rhwagwarha binene by’okuyiga. Egazeti lirhanzi-rhanzi ly’Omunara g’Omulanzi lya liderhere ntya: “Okuli kuli nka uwa ligeke lili ahagarhi ka mishaki minene, kuzungulukirwe n’okufundezwa bwenene na birhi binene, k’okuderha, enyigirizo zigwerhe amagosa. Y’omenya okuli, okwanene kugenderera kuba masu. . . . Y’olibona okwanene obunde n’okulirhola. Orhatoshekaga na uwa liguma ly’okuli. . . . Ogenderere kugusha, olonze manene bwenene.” Okuyiga kali kasi kakomere, aliko enyungu omuntu anapata, ziba zilushire emisi omuntu akolesaga.

16. Njira ehe nyinja woyo onakolesa amango oli wayiga? (Mezali 2:4-6)

¹⁶ Arhali buli yeshi mu rhwewe onasima kusoma n’okuyiga. Aliko Yehova arhuhemere “rhugenderere kulonza” emyazi yirhumenya bwinja okuli kwe Biblia. (Osome Mezali 2:4-6.) Rhunagwarha enyungu amango rhwamachihangana bwenene kujira ntyo. Corey aderhere oku amango ali asoma Ebiblia yenyine anaseza obwenge ku mustari muguma. Aderhere ntya: “Nansoma buli mahugulo m’eshishi, nanasoma buli referanse, na nasoma n’eyindi myazi. Okujira ntyo, ku nantabala nyige bintu binene!” Okukolesa eyola njira amango rhuli rhwayiga changwa eyindi, rhwanayerekana ok’okuli kuli kw’akamaro amango rhuli rhwakolesa akasanzi kerhu n’emisi omu kuyiga.​—Zb. 1:1-3.

17. Okulama nk’oku enyigirizo z’okuli ziderhere, kokuderha gurhe? (Yakobo 1:25)

¹⁷ Kweri, rhumenyere oku hali ebindi rhukwanene kujira olekere okuyiga okuli konyine. Yi rhuyunguka bwenene, rhukwanene kulama nk’oku enyigirizo z’okuli ziderhere, k’okuderha okuzikolesa omu kalamo kerhu. Okujira ntyo konyine kwarhurhabala enyigirizo z’okuli zirhulerhere obusime. (Osome Yakobo 1:25.) Nka gurhe rhwakayerekana oku rhulamire nk’oku okuli kuderhere? Mwene-werhu muguma aliderhere oku buli muguma werhu akachigeregeza analola akaba ali alama nk’oku enyigirizo z’okuli ziderhere changwa akaba hali aha akajira amaja-mbere. Entumwa Paulo aliderhere ntya: “Omu kuntu koshi rhwakaba rhwajirire amaja-mbere, rhugenderere kuchigendesa bwinja oku bukenge mw’eyo njira y’eneyo.”​—Flp. 3:16.

18. Bulagurhe rhunajira okwerhu koshi yi “rhulambagira omu kuli”?

¹⁸ Waza nka gurhe binarhurhabala amango rhuli rhwajira okwerhu koshi yi “rhulambagira omu kuli”! Rhurhajira amaja-mbere konyine omu kuntu rhulamire, s’aliko kandi, rhwalerhera Yehova obusime na bene-berhu na bali-berhu. (Mez. 27:11; 3 Yo. 4) Ezila z’empanvu nyinja bwenene rhugwerhe z’okuzigira enyigirizo z’okuli n’okulama nk’oku ziderhere.