LOSAˈN 01
Keesammi Kitaabi Keese Haraˈmmeena Xanookkoki Hinkide?
Neesoˈi hundichchim heechchi bikkina, hawwi bikkina, leh bikkinaa waaroo doolli bikkinaa xaˈmmichchuwwa kiiˈinsoommo. Odim hoshshanne qeddansoo luwwuwwi heeˈookko, ookkim ni heechchina hasisoo luwwa siidimma hoogimmi teˈim abaroosi heechcha liiransoohan issimma hoogimma. Lobakati manni Keesammi Kitaabi kiˈoo lob xaˈmmichchuwwina dabachcha uwwim xaleˈi ihooˈn heechchina hasisoo danaami sogitano uwwooˈisa qoossamaakko. Ee bikkina hundem mannim Keesammi Kitaaba losutaˈn haraˈmmoo labooˈi?
1. Keesammi Kitaabi dabachcha uwwoo xaˈmmichchuwwi hinka keeno?
Waaˈi sagari awwonaa yoo xaˈmmichchuwwina dabachcha uwwookko: Heechchi asheerukkoki hinkide? Qooccammummoki mahina? Er mannanne hawwi afookkoki mahina? Manni lehooˈaare maˈihoo? Manni xumma hasukkaarem, or kaaˈna lophphukkoki mahina? Waaroo doollenne ku uulli maˈihoo? Keesammi Kitaabi eedonneˈi xaˈmmichchuwwina dabachcha hansona gaafaassookko, araqi mannim siidamu dabachchanne erisa liiraˈmmamaakko.
2. Waaˈi sagari hoshshi hundanne liirammoomisinna hinkid haraˈmmoo?
Waaˈi sagari danaam sogitano uwwookko. Kobiˈllishshina, abaroosi hanqoˈi liiranchcha hinkid siidoodaˈe losisookko. Qedda hinkid hingoomdaˈee ni baxxonne hinkid liirammoomdaˈe sogitano uwwookko. Ee sawwittuwwi bikkina Waaˈi sagari mayyoodaˈe lossootto, niinninnem eddaa eddaa ka kitaaboˈonne atooratootto. Eeˈisinne qoxxitlasi, ‘Keesammi Kitaabuwwi hundim [Waaˈi sagaranne yoo sawwittuwwi hundim] awwaadoohani’ ihukkisa ki heechchanne mooˈllootto.—2 Ximootoos Asso 3:16.
Ku kitaaboˈi Keesammi Kitaaba bikkoohan ihooˈn, Keesammi Kitaaba saarayyitaa laˈqqona haraˈmmimmina gudisakkoˈoohane. Ee bikkina, ka losanonne siidamoo Keesammi Kitaaphphi qaddittuwwa ka kitaaboˈonne hincu sawwittuwwinne akeekansituuyyi qananaaˈllona qoxxinsoommo.
XILLAALLISA SOROOBE
Keesammi Kitaabi lobakati manna hinkid haraˈmmudaˈe, Keesami Kitaaphphi qananaachcha hinkid liiransooˈhani issitoodaˈee Waaˈi sagara qoossimminna mulli manni haraˈmmati mahina hasisoodaˈee xillaallisa mooˈnnoommo.
3. Keesammi Kitaabi danaam awwonsa uwwookko
Keesammi Kitaabi bololaaˈoo caakkisa. Danaam murato issinoommisinaa waaroo doollenne ihoo luwwa lanqoommisinaa haraˈmmookko.
Mazmuuˈl 119:105 qananaaˈllaa, xaˈmmichchuwwanne atoorallehe:
Ka sagaˈl kitaabaanchi Keesammi Kitaaba maˈisa issaa mooˈam heeˈukko?
Keesammi Kitaaba at hinkid mooˈlloo?
4. Keesammi Kitaabi ni xaˈmmichchuwwina dabachcha uwwookko
Mat meentichcho lobakati hiinchina isi hawwisaa heeˈu xaˈmmichchuwwina Keesammi Kitaabiinsi Dabachcha siiddoˈookko. VIIDIYOˈO mooˈllakkaˈa, xaˈmmichchuwwanne atoorallehe.
Mooˈamu viidiyyoˈonne, meentichchona mah xaˈmmichchuwwi heeˈukko?
Keesammi Kitaaba soroobimmi isi haraˈmmukkohi hinkide?
Keesammi Kitaabi xaˈmmichchuwwa xaˈmminoommisina gaafaassookko. Maatiwoos Mishiraachcha 7:7 qananaaˈllaa, xaˈmmichchanne atoorallehe:
Keesammi Kitaabiinsi hinka xaˈmmichchuwwina dabachcha siiddeena hassoo?
5. Keesammi Kitaaba qananaaˈimma liiransoohani issiteena xantootto
Lobakati manni Keesammi Kitaaba qananaaˈimma liiransoohani issimminne erisa awwaaxxamaakko. VIIDIYOˈO mooˈllakkaˈa, xaˈmmichchuwwanne atoorallehe.
Viidiyoˈonne mooˈamu woraaduwwi qananaaˈimmi bikkina mah macceesamaa?
Keesammi Kitaaba qananaaˈimma iittamooˈisinna haraˈmmukkohi maha?
Keesami Kitaabi amadukki awwonsi qoxxisoo sogitanoo danaam neeyyatoo uwwooˈisa kurookko. Oroomeˈi Asso 15:4, qananaaˈllaa, xaˈmmichchanne atoorallehe:
Keesammi Kitaabi soodo ihoo eroommi bikkinaa uwwoo sogitaˈn bikkinaa erisa laˈqqeena hassoo?
6. Waaˈi sagara qoossineena mulli manni haraˈmmati hasisookko
Lobakati manni Keesammi Kitaaba mullam qananaaˈimmiinsi, mulli manninne atoorarimmi erisa haraˈmmooˈisa hindiyamaakko. Asseˈamaaˈn Kitaaba 8:26-31 qananaaˈllaa, xaˈmmichchanne atoorallehe:
Keesammi Kitaaba qoossineena, maˈissimmi hasisoo?—Xiqqi 30 odim 31 mooˈe.
Tophpheˈi manchi Keesammi Kitaaba qananaaˈukkoka qoosseena haraˈmmati hasisaa heeˈukko. Ka doollennem lobakati manni Keesammi Kitaaba mulli manninne atoorarimmi erisa haraˈmmooˈisa hindiyamaakko.
KID YAKKOTAˈN AT MAYYITOO: “Keesammi Kitaaba losimmi ammane biiˈishsha.”
Eedi yittoh mahina?
XUUNSOˈO
Keesammi Kitaabi ni hoshshi hundina awwaadoo sogitano, heechchi bikkina kiˈoo lob xaˈmmichchuwwina dabachcha, odim qoxxishaa neeyyatoo uwwookko.
Tiissiishsha
Keesammi Kitaabiinsi siindoom sogitanuwwi hinka keeno?
Keesammi Kitaabi dabachcha uwwoo xaˈmmichchuwwi hinka keeno?
Keesammi Kitaabiinsi maha bikkina losseena hassoo?
SAARAYYE
Keesammi Kitaaphphi sogitani ka doollennem hinkid awwaadooldaˈe mooˈe.
“Doolli hundinnam Awwaadoo— Keesammi Kitaaphphi Awwonsa” (መጠበቂያ ግንብ ቁጥር 1 2018)
Oosoommaniinsi asheeraa hoogaanchi sawwitinne hawwam heeˈu mancho Waaˈi sagari hinkid haraˈmmudaˈe mooˈe.
Abaroosi heechchina haraˈmmoo Keesammi Kitaaphphi sogitano saarayye.
“Abaroos danaam heechcha heeˈooˈisinna haraˈmmoo 12 Sawwittuwwa” (ንቁ! ቁጥር 2 2018)
Waaˈina ijaajantambeeˈi minaadaba gassukuuyyi yookkoki ayyedaˈe araqi manni hindiyubeeˈi hanqa waaˈi sagari mayyaa caakkisoodaˈe mooˈe.