29 Apang, ginhimo man ni Jehu ang mga sala ni Jeroboam nga anak ni Nebat nga ginbangdan sang pagpakasala sang Israel. Gintugutan niya nga magpabilin ang bulawan nga mga tinday nga baka sa Betel kag sa Dan.+ 30 Gani, nagsiling si Jehova kay Jehu: “Bangod ginhimo mo ang maayo kag matarong sa akon panulok, kag ginhimo mo ang tanan nga luyag ko nga matabo sa panimalay ni Ahab,+ ang imo mga anak tubtob sa ikap-at nga kaliwatan magapungko sa trono sang Israel.”+ 31 Apang wala gintuman ni Jehu ang Kasuguan ni Jehova nga Dios sang Israel sa bug-os niya nga tagipusuon.+ Ginhimo man niya ang mga sala ni Jeroboam nga ginbangdan sang pagpakasala sang Israel.+