31 Samtang nagatinguha sila sa pagpatay sa iya, nabalitaan sang kumander sang tropa sang mga soldado nga nagkinagamo ang bug-os nga Jerusalem; 32 kag nagdala sia gilayon sang mga soldado kag mga kumander sang mga soldado kag dalidali nga nagkadto sa ila. Sang makita nila ang kumander sang militar kag ang mga soldado, gin-untatan nila ang pagbunal kay Pablo.

33 Dayon nagpalapit ang kumander sang militar kag gindakop si Pablo. Nagsugo ang kumander nga gapuson sia sang duha ka kadena;+ dayon nagpamangkot sia kon sin-o ini nga tawo kag kon ano ang iya ginhimo.