1 Cronica

28 Dayon gintipon ni David sa Jerusalem ang tanan nga pangulo sang Israel: ang mga pangulo sang mga tribo, ang mga pangulo sang mga grupo+ nga nagaalagad sa hari, ang mga pangulo sang mga linibo kag ang mga pangulo sang mga ginatos,+ ang mga pangulo sang nagaatipan sang tanan nga pagkabutang kag kasapatan sang hari+ kag sang iya mga anak,+ pati ang mga opisyal sang palasyo kag ang tanan nga isganan kag sangkol nga mga lalaki.+ 2 Dayon nagtindog si Hari David kag nagsiling:

“Magpamati kamo, mga utod ko kag katawhan ko. Handum gid sang akon tagipusuon nga magpatindog sing balay nga butangan sing kaban sang katipan ni Jehova kag mangin palatungan sang tiil sang aton Dios,+ kag naghanda ako para sa pagpatindog sini.+ 3 Apang nagsiling sa akon ang matuod nga Dios, ‘Indi ikaw ang magapatindog sing balay para sa kadungganan sang akon ngalan,+ kay tuman kadamo nga inaway ang imo inagihan kag nagpaagay ka sing dugo.’+ 4 Apang sa bug-os nga panimalay sang akon amay ako ang ginpili ni Jehova nga Dios sang Israel nga mangin hari sa bug-os nga Israel sing dayon,+ kay ginpili niya si Juda nga mangin lider+ kag sa panimalay ni Juda, ginpili niya ang panimalay sang akon amay,+ kag sa mga anak sang akon amay, ako ang nahamut-an niya nga himuon nga hari sa bug-os nga Israel.+ 5 Ginhatagan ako ni Jehova sing madamo nga anak,+ kag sa ila tanan, ginpili niya si Solomon+ nga akon anak nga amo ang magpungko sa trono sang ginharian ni Jehova sa Israel.+

6 “Nagsiling sia sa akon, ‘Ang imo anak nga si Solomon amo ang magapatindog sang akon balay kag sang akon mga luwang, kay ginpili ko sia nga mangin akon anak, kag mangin amay niya ako.+ 7 Palig-unon ko ang iya ginharian sing dayon+ kon determinado sia nga tumanon ang akon mga sugo kag mga pagsulundan+ pareho sang iya ginahimo subong.’ 8 Gani sa atubangan sang bug-os nga Israel, nga katilingban ni Jehova, kag sa atubangan sang aton Dios, nagasiling ako: Usisaa ninyo kag tumana gid ang tanan nga sugo ni Jehova nga inyo Dios, agod mapanag-iyahan ninyo ang maayo nga duta+ kag mapanubli ini sang inyo mga anak sing dayon.

9 “Kag ikaw, Solomon anak ko, kilalaha ang Dios sang imo amay kag alagara sia sing bug-os* tagipusuon+ kag may malipayon* nga kalag,* kay ginausisa ni Jehova ang tanan nga tagipusuon,+ kag nahantop niya ang tanan nga huyog sang panghunahuna.+ Kon pangitaon mo sia, makita mo sia,+ apang kon bayaan mo sia, sikwayon ka niya sing dayon.+ 10 Hunahunaa ini sing maayo, kay ikaw ang ginpili ni Jehova nga magpatindog sing balay nga isa ka santuaryo. Magpakaisog ka kag himua ini.”

11 Dayon ginhatag ni David kay Solomon nga iya anak ang plano kon paano himuon+ ang portiko,+ ang mga kuarto, ang mga talaguan, ang mga kuarto sa atop, ang nasulod nga mga kuarto, kag ang kuarto sa pagtumbas para sa sala.*+ 12 Ginhatag niya sa iya ang tanan nga plano nga ginpahayag sa iya sang espiritu sang Dios para sa mga luwang+ sang balay ni Jehova, para sa tanan nga kalan-an sa palibot, para sa mga bahandian sang balay sang matuod nga Dios, kag para sa mga bahandian sang ginpakabalaan* nga mga butang.+ 13 Naghatag man sia sing instruksion tuhoy sa mga grupo sang mga saserdote+ kag sang mga Levinhon, tuhoy sa tanan nga buluhaton sa pag-alagad sa balay ni Jehova, kag tuhoy sa tanan nga kagamitan nga gamiton sa pag-alagad sa balay ni Jehova; 14 tuhoy sa kabug-aton sang bulawan sang tanan nga kagamitan nga gamiton para sa nanuhaytuhay nga pag-alagad, kag tuhoy sa kabug-aton sang pilak sang tanan nga kagamitan nga gamiton para sa nanuhaytuhay nga pag-alagad; 15 pati ang kabug-aton sang bulawan nga mga kandelero+ kag sang bulawan nga mga suga sini, ang kabug-aton sang nanuhaytuhay nga mga kandelero kag sang mga suga sini, kag ang kabug-aton sang pilak nga mga kandelero, ang kabug-aton sang tagsa ka kandelero kag sang mga suga sini depende sa gamitan sini; 16 kag ang kabug-aton sang bulawan para sa mga lamesa sang nagatangkas nga mga tinapay,*+ pati ang kabug-aton sang pilak para sa pilak nga mga lamesa, 17 ang kabug-aton sang mga tinidor, sang mga yahong, sang mga pitsel nga puro nga bulawan, kag ang kabug-aton sang tagsa ka magamay nga bulawan nga mga yahong,+ kag sang tagsa ka magamay nga pilak nga mga yahong. 18 Ginsiling man niya kon ano ang kabug-aton sang puro nga bulawan para sa halaran sang incienso+ kag para sa larawan sang kangga,+ nga amo ang mga kerubin+ nga bulawan nga may mga pakpak nga nagahumlad kag nagatabon sa kaban sang katipan ni Jehova. 19 Nagsiling si David: “Ginhatagan ako ni Jehova sing paghantop gani nahangpan ko kon paano sundon ang tanan nga detalye sang plano sa pagpatindog,+ nga ginsulat+ ko samtang ginatuytuyan niya ako.”

20 Dayon nagsiling si David kay Solomon nga iya anak: “Magpakaisog ka kag magpakabakod kag himua ini. Indi ka mahadlok, kay kaupod mo si Jehova nga Dios, nga akon Dios.+ Indi ka niya pagpabay-an ukon pagbayaan,+ kundi mangin kaupod mo sia tubtob matapos ang tanan nga buluhaton sa balay ni Jehova. 21 Handa na ang mga grupo sang mga saserdote+ kag sang mga Levinhon+ para sa tanan nga buluhaton sa balay sang matuod nga Dios. May mga tinawo ka nga handa kag sampaton sa paghimo sang bisan ano nga buluhaton,+ kag handa na ang mga pangulo+ kag ang tanan nga katawhan sa pagtuman sang tanan nga isugo mo.”