2 Cronica

6 Dayon nagsiling si Solomon: “Nagsiling si Jehova nga magapuyo sia sa madamol nga gal-um.+ 2 Karon nakapatindog na ako sing halangdon nga balay para sa imo, isa ka malig-on nga duog nga puy-an mo sing dayon.”+

3 Dayon nagliso ang hari kag ginpakamaayo niya ang bug-os nga katilingban sang Israel samtang nagatindog sila.+ 4 Nagsiling sia: “Dayawon si Jehova nga Dios sang Israel, nga nagsaad kay David nga akon amay kag paagi sa iya mismo mga kamot gintuman niya ini, nga nagasiling, 5 ‘Sugod sang adlaw nga ginpagua ko ang akon katawhan sa duta sang Egipto, wala ako magpili sing isa ka siudad sa tanan nga tribo sang Israel nga patindugan sing balay agod magpabilin didto ang akon ngalan,+ kag wala ako magpili sing isa ka tawo nga mangin lider sang akon katawhan nga Israel. 6 Apang ginpili ko ang Jerusalem+ diin magapabilin ang akon ngalan, kag ginpili ko si David nga maggahom sa akon katawhan nga Israel.’+ 7 Kag handum sang tagipusuon ni David nga akon amay nga magpatindog sing balay para sa kadungganan sang ngalan ni Jehova nga Dios sang Israel.+ 8 Apang nagsiling si Jehova kay David nga akon amay, ‘Handum gid sang imo tagipusuon nga magpatindog sing balay para sa kadungganan sang akon ngalan. Maayo gid ina. 9 Apang indi ikaw ang magapatindog sina nga balay, kundi ang imo anak nga mabun-ag sa imo* ang magapatindog sing balay para sa kadungganan sang akon ngalan.’+ 10 Gintuman ni Jehova ang iya ginsaad, kay ginbuslan ko si David nga akon amay kag nagpungko ako sa trono sang Israel,+ suno sa ginsaad ni Jehova.+ Nagpatindog man ako sing balay para sa kadungganan sang ngalan ni Jehova nga Dios sang Israel, 11 kag ginbutang ko didto ang Kaban nga nasudlan sang katipan+ ni Jehova nga ginhimo niya sa katawhan sang Israel.”

12 Dayon nagtindog sia sa atubangan sang halaran ni Jehova sa atubangan sang bug-os nga katilingban sang Israel, kag ginbayaw niya ang iya mga kamot.+ 13 (Kay naghimo si Solomon sing entablado nga saway kag ginbutang ini sa tunga sang luwang.+ Ang kalabaon sini lima ka maniko,* ang kasangkaron lima ka maniko, kag ang kataason tatlo ka maniko; kag nagtindog sia sa sini.) Kag nagluhod sia sa atubangan sang bug-os nga katilingban sang Israel kag ginbayaw niya ang iya mga kamot sa langit,+ 14 kag nagsiling sia: “O Jehova nga Dios sang Israel, wala sing Dios pareho sa imo sa langit ukon sa duta, nga nagatuman sang katipan kag nagapakita sing mainunungon nga gugma sa imo mga alagad nga nagasunod sa imo sa bug-os nila nga tagipusuon.+ 15 Gintuman mo ang imo ginsaad sa imo alagad nga si David nga akon amay.+ Ikaw mismo ang nagsaad sini, kag subong nga adlaw ikaw mismo ang nagtuman sini.+ 16 Kag karon, O Jehova nga Dios sang Israel, kabay pa nga tumanon mo sa imo alagad nga si David nga akon amay ang imo ginsaad, ‘Kon ang imo mga anak maghalong sa ila pagkabuhi kag tumanon nila ang akon kasuguan, pareho sang pagtuman mo sa akon, may kaliwat ka pirme nga magapungko sa trono sang Israel.’+ 17 O Jehova nga Dios sang Israel, kabay pa nga matuman ang imo ginsaad sa imo alagad nga si David.

18 “Apang magapuyo gid bala ang Dios upod sa mga tawo sa duta?+ Kon sa langit, sa pinakamataas nga langit, indi ka gani makaigo,+ labi na gid sa sining balay nga ginpatindog ko!+ 19 O Jehova nga akon Dios, pamatii ang pangamuyo kag pangabay sang imo alagad. Pamatii ang pagpangayo sing bulig kag pangamuyo sang imo alagad. 20 Kabay pa nga bantayan mo ining balay adlaw kag gab-i, kag pamatian mo ang pangamuyo sang imo alagad sa sini nga duog, diin nagsiling ka nga ibutang mo ang imo ngalan.+ 21 Kag kabay pa nga pamatian mo ang pakiluoy sang imo alagad kag ang mga pakiluoy sang imo katawhan nga Israel sa sini nga duog,+ kag kabay pa nga magpamati ka sa imo puluy-an sa langit.+ Kabay pa nga pamatian mo kami kag patawaron.+

22 “Kon ang isa ka tawo ginasumbong nga nakasala sa iya isigkatawo, mahimo nga pasumpaon* sia sang iya isigkatawo. Kon magkadto sia sa atubangan sang imo halaran sa sini nga balay bangod sang iya ginpanumpa,+ 23 kabay pa nga magpamati ka sa langit, kag hukman mo ang imo mga alagad. Balusan mo ang isa nga malauton kag silutan sia suno sa iya ginhimo.+ Pakamatarungon mo ang wala nakasala* kag balusan sia suno sa iya pagkamatarong.+

24 “Kon ang imo katawhan nga Israel mapierde sang kaaway bangod nakasala sila sa imo,+ kag magbalik sila sa imo kag dayawon nila ang imo ngalan+ kag magpangamuyo sila+ kag magpakiluoy sa imo sa sini nga balay,+ 25 kabay pa nga magpamati ka sa langit+ kag patawaron mo ang sala sang imo katawhan nga Israel kag ibalik mo sila sa duta nga ginhatag mo sa ila kag sa ila mga katigulangan.+

26 “Kon wala sing ulan nga magtupa halin sa langit+ bangod nakasala sila sa imo,+ kag magpangamuyo sila sa sini nga duog kag dayawon nila ang imo ngalan kag maghinulsol sila sa ila mga sala bangod ginapabudlayan* mo sila,+ 27 kabay pa nga magpamati ka sa langit kag patawaron mo ang sala sang imo mga alagad, sang imo katawhan nga Israel, kay itudlo mo sa ila ang maayo nga dalan nga dapat nila laktan;+ kag magapaulan+ ka sa duta nga ginhatag mo sa imo katawhan bilang palanublion nila.

28 “Kon may tiggulutom sa duta,+ ukon peste,+ pagpanglaya bangod sang mainit nga hangin, peste sa mga pananom,+ mga apan, ukon maasab nga mga apan*+ ukon kon likupan sila sang ila mga kaaway sa bisan diin nga siudad sa ila duta*+ ukon kon may iban pa nga kalalat-an ukon balatian,+ 29 kag mangamuyo+ kag magpakiluoy+ ang bisan sin-o nga tawo ukon ang imo tanan nga katawhan nga Israel, (kay nahibaluan sang kada isa kon ano ang nagapaantos kag nagapabudlay sa iya)+ kag bayawon nila ang ila mga kamot sa pagpangamuyo sa sini nga balay,+ 30 kabay pa nga magpamati ka sa langit nga imo puluy-an,+ kag kabay pa nga patawaron mo sila;+ kag padyaan mo ang kada isa suno sa tanan niya nga dalanon, kay nahibaluan mo ang iya tagipusuon (ikaw lamang ang nakahibalo gid sa tagipusuon sang tawo),+ 31 agod magkahadlok sila sa imo kag maglakat sa imo mga dalanon samtang nagakabuhi sila sa duta nga ginhatag mo sa amon mga katigulangan.

32 “Kon ang dumuluong man nga indi bahin sang imo katawhan nga Israel mag-abot halin sa malayo nga lugar tungod sa imo daku nga ngalan*+ kag makusog nga kamot kag gamhanan nga butkon, kag magkadto sia kag magpangamuyo sa sini nga balay,+ 33 kabay pa nga magpamati ka sa langit nga imo puluy-an, kag himuon mo ang tanan nga ginapangabay sa imo sang dumuluong, agod makilala sang tanan nga katawhan sa duta ang imo ngalan+ kag magkahadlok sila sa imo, pareho sang imo katawhan nga Israel, kag agod mahibaluan nila nga ang imo ngalan yara sa sini nga balay nga ginpatindog ko.

34 “Kon ang imo katawhan magpakig-away bisan diin nga ginsugo mo sila+ kag magpangamuyo sila+ sa imo nga nagaatubang sa sini nga siudad nga ginpili mo kag sa balay nga ginpatindog ko para sa kadungganan sang imo ngalan,+ 35 kabay pa nga pamatian mo sa langit ang ila pangamuyo kag pangabay kag hatagan mo sila sing hustisya.+

36 “Kon makasala sila sa imo (kay wala sing tawo nga indi makasala),+ kag maakig ka sa ila kag itugyan mo sila sa ila kaaway, kag bihagon sila sang ila mga kaaway kag dalhon sila sa malayo ukon sa malapit nga duta,+ 37 kag kon makamarasmas sila sa duta diin gindala sila nga bihag, kag manumbalik sila kag magpakiluoy sa imo sa duta diin ginbihag sila, nga nagasiling, ‘Nakasala kami kag nakahimo sing malain; nangin malaut kami,’+ 38 kag manumbalik sila sa imo sa bug-os nila nga tagipusuon+ kag sa bug-os nila nga kalag* didto sa duta nga gindalhan sa ila bilang mga bihag,+ kag mangamuyo sila sa imo nga nagaatubang sa ila duta nga ginhatag mo sa ila mga katigulangan kag sa siudad nga ginpili mo+ kag sa balay nga ginpatindog ko para sa kadungganan sang imo ngalan, 39 pamatian mo sa langit nga imo puluy-an ang ila pangamuyo kag pangabay, kag hatagan mo sila sing hustisya+ kag patawaron mo ang imo katawhan nga nakasala sa imo.

40 “O Dios ko, palihug, kabay pa nga talupangdon mo kag pamatian ang mga pangamuyo sa sini nga duog.+ 41 Karon, O Jehova nga Dios, magpahuway ka,+ ikaw kag ang Kaban sang imo gahom sa sini nga duog. O Jehova nga Dios, kabay pa nga ipakita sang imo mga saserdote nga ang kaluwasan halin sa imo,* kag ang mga mainunungon sa imo magakasadya sa imo kaayo.+ 42 O Jehova nga Dios, indi pagsikwaya ang* imo hinaplas.+ Kabay pa nga dumdumon mo ang mainunungon nga gugma nga ginpakita mo kay David nga imo alagad.”+