Numeros

22 Dayon naglakat ang mga Israelinhon kag nagkampo sila sa desyerto nga kapatagan sang Moab sa tabok sang Jordan sa pihak sang Jerico.+ 2 Nakita ni Balak+ nga anak ni Zipor ang tanan nga ginhimo sang Israel sa mga Amornon. 3 Kinulbaan gid ang Moab bangod madamo ang katawhan. Hinadlukan gid ang Moab tungod sa mga Israelinhon.+ 4 Gani nagsiling ang Moab sa mga gulang sang Midian:+ “Ubuson gid kaon sining katilingban ang tanan sa palibot naton pareho sang toro nga baka nga nagaubos halab sang mga hilamon sa latagon.”

Si Balak nga anak ni Zipor amo ang hari sang Moab sadto nga tion. 5 Nagpadala sia sing mga mensahero agod ipatawag si Balaam nga anak ni Beor. Didto si Balaam sa Petor,+ nga yara nayon sa Suba,* nga amo ang iya natawhan nga duta. Amo ini ang mensahe niya sa iya: “May katawhan nga naggua sa Egipto. Kadamo gid sa ila nga daw ginatabunan nila ang duta,*+ kag nagaistar sila sa atubangan ko. 6 Palihug, magkadto ka diri kag pakamalauta ining katawhan para sa akon,+ bangod mas gamhanan sila sangsa akon. Ayhan mapierde ko sila kag matabog ko sila pagua sa amon duta, bangod nahibaluan ko nga ang isa nga ginapakamaayo mo amo ang ginapakamaayo kag ang isa nga ginapakamalaut mo amo ang ginapakamalaut.”

7 Gani nagkadto ang mga gulang sang Moab kag sang Midian kay Balaam kag may dala sila nga inugbayad para sa iya pagpamakot+ kag ginsugid nila sa iya ang mensahe ni Balak. 8 Nagsiling si Balaam sa ila: “Magpaligad kamo sang gab-i diri, kag ihambal ko sa inyo ang isiling ni Jehova sa akon.” Gani didto nagtulog kay Balaam ang mga pangulo sang Moab.

9 Dayon nagpamangkot ang Dios kay Balaam:+ “Sin-o ining mga lalaki nga kaupod mo?” 10 Nagsiling si Balaam sa matuod nga Dios: “Si Balak nga anak ni Zipor kag hari sang Moab nagpadala sa akon sini nga mensahe, 11 ‘Ang katawhan nga naggua sa Egipto kadamo gid nga daw ginatabunan nila ang duta. Magkadto ka diri kag pakamalauta sila para sa akon.+ Ayhan mapierde ko sila kag matabog ko sila.’” 12 Apang nagsiling ang Dios kay Balaam: “Indi ka mag-upod sa ila. Indi mo pagpakamalauton ang katawhan, kay ginapakamaayo sila.”+

13 Pagkaaga, nagbangon si Balaam kag nagsiling sia sa mga pangulo ni Balak: “Balik kamo sa inyo duta, kay indi ako pagpaupdon ni Jehova sa inyo.” 14 Gani naglakat ang mga pangulo sang Moab kag nagbalik sila kay Balak. Nagsiling sila: “Indi mag-upod sa amon si Balaam.”

15 Apang, nagpadala liwat si Balak sing iban nga mga pangulo nga mas madamo kag mas dungganon sangsa nauna. 16 Nagkadto sila kay Balaam kag nagsiling sila sa iya: “Amo ini ang ginsiling ni Balak nga anak ni Zipor, ‘Palihug, indi pagtuguti nga may magpugong sa imo sa pagkadto sa akon, 17 kay padunggan ko gid ikaw, kag himuon ko ang tanan nga isiling mo. Gani palihug, magkadto ka diri kag pakamalauta ini nga katawhan para sa akon.’” 18 Apang nagsabat si Balaam sa mga alagad ni Balak: “Bisan ihatag pa ni Balak sa akon ang iya balay nga puno sing pilak kag bulawan, indi ko paglapason ang sugo ni Jehova nga akon Dios, bisan sa gamay ukon sa daku nga butang.+ 19 Apang palihug magpaligad man kamo sang gab-i diri kay basi may isiling pa si Jehova sa akon.”+

20 Pagkagab-i, nagsiling ang Dios kay Balaam: “Kon nagkadto diri ang mga lalaki agod sugaton ka, mag-upod ka sa ila. Apang ang ihambal ko lang sa imo ang isiling mo.”+ 21 Pagkaaga, nagbangon si Balaam kag ginhanda niya ang iya asno* kag nag-upod sia sa mga pangulo sang Moab.+

22 Apang naakig gid ang Dios bangod nag-upod sia, gani ang anghel ni Jehova nagtindog sa dalan agod balabagan sia. Nagasakay si Balaam sa iya asno kag kaupod niya ang iya duha ka alagad. 23 Sang makita sang asno ang anghel ni Jehova nga nagatindog sa dalan kag nagauyat sing espada, naglikaw ang asno sa dalan pakadto sa latagon. Apang ginhanot ni Balaam ang asno agod magbalik ini sa dalan. 24 Dayon nagtindog ang anghel ni Jehova sa makitid nga dalan sa tunga sang duha ka ulubasan kag may pader nga bato sa magtimbang nga kilid. 25 Sang makita sang asno ang anghel ni Jehova, nagpangalihid ang asno sa pader amo nga naipit ang tiil ni Balaam sa pader, gani ginhanot liwat ni Balaam ang asno.

26 Dayon nag-una liwat ang anghel ni Jehova kag nagtindog sa makitid nga lugar nga wala sing malikawan sa tuo man ukon sa wala. 27 Sang makita sang asno ang anghel ni Jehova, nagluko ini samtang nagasakay si Balaam. Gani naakig gid si Balaam kag ginhanot niya sang iya sungkod ang asno. 28 Sang ulihi, ginpahambal ni Jehova ang asno*+ kag nagsiling ini kay Balaam: “Ano ang nahimo ko sa imo nga tatlo ka beses mo na ako nga ginhanot?”+ 29 Nagsabat si Balaam sa asno: “Bangod ginatunto mo ako. Kon may espada lang ako nga ginauyatan, ginpatay ko na kuntani ikaw!” 30 Nagsiling ang asno kay Balaam: “Indi bala nga ako ang imo asno nga ginasakyan mo sa imo bug-os nga kabuhi tubtob subong? Nahimo ko na bala ini sa imo sang una?” Nagsabat sia: “Wala!” 31 Dayon ginbuksan ni Jehova ang mga mata ni Balaam+ kag nakita niya ang anghel ni Jehova nga nagatindog sa dalan nga may ginauyatan nga espada. Nagluhod sia dayon kag nagduko.

32 Dayon nagsiling ang anghel ni Jehova sa iya: “Ngaa tatlo ka beses na nga ginhanot mo ang imo asno? Naggua ako agod balabagan ka, bangod ang imo himuon batok gid sa akon kabubut-on.+ 33 Nakita ako sang asno kag tatlo ka beses nga naglikaw ini sa akon.+ Kon wala ini maglikaw sa akon, napatay ko na kuntani ikaw, kag pabay-an ko ang asno nga mabuhi.” 34 Nagsiling si Balaam sa anghel ni Jehova: “Nakasala ako, bangod wala ako makahibalo nga nagatindog ka gali sa dalan agod sugataon ako. Kon malain ini sa imo panulok, mabalik na lang ako.” 35 Apang nagsiling ang anghel ni Jehova kay Balaam: “Mag-upod ka sa mga lalaki, apang ang ihambal ko lang sa imo ang isiling mo.” Gani nag-upod si Balaam sa mga pangulo ni Balak.

36 Sang mabalitaan ni Balak nga nag-abot si Balaam, naglakat sia dayon agod sugataon sia sa siudad sang Moab, nga yara sa pangpang sang Arnon sa dulunan sang ila teritoryo. 37 Nagsiling si Balak kay Balaam: “Indi bala nga ginpatawag ko ikaw? Ngaa wala ka magkadto sa akon? Nagahunahuna ka bala nga indi ako makasarang sa pagpadungog sa imo?”+ 38 Nagsabat si Balaam kay Balak: “Yari na ako. Apang makahambal bala ako sang bisan ano lang? Kon ano ang ihambal sang Dios sa akon amo lang ang isiling ko.”+

39 Gani nag-upod si Balaam kay Balak, kag nagkadto sila sa Kiryat-huzot. 40 Naghalad si Balak sing mga baka kag mga karnero kag ginhatag niya ang iban sini kay Balaam kag sa mga pangulo nga kaupod niya. 41 Pagkaaga, gindala ni Balak si Balaam sa Bamot-baal;* makita niya halin didto ang tanan nga katawhan.+