Isaias

“Tan-awa! Ang Damasco indi na isa ka siudad,

Kundi mangin isa sia ka tinumpok sang kagulub-an.+

 2 Ang siudad sang Aroer+ bayaan;

Mangin duog ini nga pagalukuhan sang mga panong

Kag wala sila sing kahadlukan didto.

 3 Wala na sing napamakuran nga siudad sa Efraim,+

Kag sing ginharian sa Damasco;+

Kag madula ang kadungganan sang mga nabilin sang Siria

Kaangay sang kadungganan sang mga Israelinhon,”* siling ni Jehova sang mga kasuldadusan.

 4 “Sa sina nga adlaw ang kadungganan ni Jacob madula,

Kag maganiwang ang iya mapagros nga lawas.*

 5 Mangin kaangay ini sa tion nga ang mangangani nagatipon sing mga uhay

Kag anihon sang iya butkon ang mga uhay,

Kaangay kon ang isa nagapanaghaw sang uhay sa Nalupyakan* sang Refaim.+

 6 Salaghawon na lang ang mabilin,

Kaangay sang naparaspas nga kahoy sang olibo:

Duha ukon tatlo ka luto nga olibo ang nabilin sa pinakamataas nga sanga,

Apat ukon lima sa iban pa nga sanga,”+ siling ni Jehova nga Dios sang Israel.

 9 Sa sina nga adlaw ang iya napamakuran nga mga siudad mangin kaangay sang duog nga ginbayaan sa kagulangan,+

Kaangay sang sanga nga ginbayaan tungod sa mga Israelinhon;

Mangin kagulub-an ini.

10 Kay ginkalimtan mo ang Dios+ sang imo kaluwasan;

Wala mo gindumdom ang Igang+ sang imo pamakod.

Amo nga nagtanom ka sang matahom* nga mga tanom sa imo mga talamnan

Kag nagbutang ka sang mga tugdo sang estranghero* sa sini.

11 Sa adlaw kudalan mo ang imo talamnan,

Sa aga magatubo ang imo binhi,

Apang wala ka sing maani sa adlaw sang imo pagbalatian kag indi mabulong nga kasakit.+

12 Pamatii! Nagakinagula ang madamo nga katawhan,

Nga magahod kaangay sang mga dagat!

Nagaginual ang mga pungsod,

Kaangay sang nagaalimbukad nga katubigan!

Sabdungon Niya sila, kag magapalagyo sila sa malayo,

Ginalagas sila kaangay sang upa sa kabukiran nga ginapalid sang hangin,

Kaangay sang hilamon nga ginabalulon sang mabaskog nga hangin.

Amo ini ang matabo sa mga nagapang-agaw sang amon mga pagkabutang

Kag ang madangatan sang mga nagapang-ati sa amon.