Jeremias

33 Samtang bilanggo pa si Jeremias sa Luwang sang Bantay,+ may mensahe si Jehova sa iya sa ikaduha nga tion, nga nagasiling: 2 “Amo ini ang ginasiling ni Jehova nga Manunuga sang duta, si Jehova nga naghimo sini kag nagpalig-on sini; si Jehova ang iya ngalan, 3 ‘Magpanawag ka sa akon, kag sabton ko ikaw dayon kag sugiran ko ikaw sang makatilingala kag makatalanhaga nga mga butang nga wala mo pa mahibaluan.’”+

4 “Si Jehova nga Dios sang Israel may mensahe tuhoy sa mga balay sa sini nga siudad kag sa mga balay sang mga hari sang Juda nga ila ginguba agod himuon nga depensa batok sa talaklasan nga bungyod nga ginhimo sang mga kaaway kag batok sa ila espada,+ 5 kag tuhoy sa mga tawo nga nagpakig-away sa mga Caldeanhon, kag tuhoy sa mga lugar nga ginpuno sing mga bangkay sang mga tawo nga ginpatay niya tungod sa iya kaakig kag sa iya kasingkal. Ginsikway niya ini nga siudad tungod sa ila kalainan. 6 Nagsiling ang Dios: ‘Bulngon ko sia kag ayuhon.+ Ayuhon ko sila kag hatagan sing paghidait kag kamatuoran.+ 7 Ibalik ko ang mga nabihag sa Juda kag sa Israel,+ kag palig-unon ko sila pareho sang una.+ 8 Patawaron ko ang tanan nila nga sala kag paglapas sa akon,+ agod mangin matinlo sila.+ 9 Ang iya ngalan magahatag sa akon sing kalipay, kadayawan, kag himaya sa tanan nga pungsod sa duta nga makabati sa tanan nga kaayo nga ipakita ko sa ila.+ Makulbaan sila kag magakurog+ sa kahadlok tungod sa tanan nga kaayo kag paghidait nga ihatag ko sa iya.’”+

10 “Amo ini ang ginasiling ni Jehova: ‘Sa sini nga lugar nga isiling ninyo nga nahapay, nga wala sing tawo ukon sapat, kag sa mga siudad sang Juda kag sa mga dalan sang Jerusalem nga nahapay, nga wala sing tawo ukon pumuluyo ukon sapat, mabatian liwat 11 ang paghugyaw kag pagkinasadya,+ ang tingog sang nobyo kag ang tingog sang nobya, ang tingog sang mga nagasiling: “Magpasalamat kamo kay Jehova sang mga kasuldadusan, kay maayo si Jehova;+ ang iya mainunungon nga gugma wala sing katapusan!”’+

“‘Magadala sila sing dulot sa pagpasalamat sa balay ni Jehova,+ kay ibalik ko ang mga nabihag sa sini nga duta kag ang ila kahimtangan mangin pareho sang una,’ siling ni Jehova.”

12 “Amo ini ang ginasiling ni Jehova sang mga kasuldadusan: ‘Sa sining nahapay nga lugar nga wala sing tawo ukon sapat, kag sa tanan nga siudad sini, may makita liwat nga mga halalban para sa mga manugbantay nga nagapaluko sang ila mga panong.’+

13 “‘Sa mga siudad sa kabukiran, sa mga siudad sa kapatagan, sa mga siudad sa bagatnan, sa duta sang Benjamin, sa palibot sang Jerusalem,+ kag sa mga siudad sang Juda,+ ang mga manugbantay magaisip liwat sang ila mga karnero,’ siling ni Jehova.”

14 “‘Magaabot ang tion,’ siling ni Jehova, ‘nga tumanon ko ang maayo nga saad nga ginsiling ko tuhoy sa panimalay ni Israel kag sa panimalay ni Juda.+ 15 Sa sina nga tion, magapili ako sing matarong nga salingsing* ni David,+ kag ipakita niya ang hustisya kag pagkamatarong sa sini nga duta.+ 16 Sa sina nga tion, maluwas ang Juda+ kag makaangkon sing kalig-unan ang Jerusalem.+ Kag pagatawgon sia: Si Jehova ang Aton Pagkamatarong.’”+

17 “Kay amo ini ang ginasiling ni Jehova: ‘Indi gid madulaan si David sing kaliwat nga magapungko sa trono sang panimalay ni Israel,+ 18 ukon indi gid madulaan ang Levinhon nga mga saserdote sing magahalad kag magadulot sing dulot nga sinunog kag magapaaso sing dulot nga uyas sa akon atubangan.’”

19 May mensahe liwat si Jehova kay Jeremias, nga nagasiling: 20 “Amo ini ang ginasiling ni Jehova, ‘Kon maguba ninyo ang akon katipan tuhoy sa adlaw kag sa gab-i, agod wala na sing adlaw kag gab-i,+ 21 maguba man ang akon katipan kay David+ nga akon alagad kag wala sia sing anak nga magahari sa iya trono,+ kag amo man ang matabo sa akon katipan sa Levinhon nga mga saserdote nga akon mga alagad.+ 22 Subong sang indi maisip nga mga butang sa langit, kag indi masukob nga balas sa dagat, padamuon ko ang kaliwat* ni David nga akon alagad kag ang mga Levinhon nga nagaalagad sa akon.’”

23 May mensahe pa liwat si Jehova kay Jeremias, nga nagasiling: 24 “Wala mo bala mabatian ang ginasiling sining katawhan, ‘Sikwayon ni Jehova ang duha ka panimalay nga iya ginpili’? Wala nila ginatahod ang akon katawhan, kag wala na nila sila ginakabig nga isa ka pungsod.

25 “Amo ini ang ginasiling ni Jehova: ‘Subong nga wala ko ginguba ang akon katipan tuhoy sa adlaw kag sa gab-i,+ kag ang mga kasuguan* sang langit kag duta,+ 26 indi ko gid pagsikwayon ang kaliwat* ni Jacob kag ni David nga akon alagad. Magapili ako sa iya kaliwat* sing mga manuggahom nga magagahom sa kaliwatan* ni Abraham, ni Isaac, kag ni Jacob. Ibalik ko ang mga nabihag sa ila+ kag kaluy-an ko sila.’”+