Ezequiel

34 Nagsiling pa si Jehova sa akon: 2 “Anak sang tawo, magpanagna ka batok sa mga manugbantay sang Israel. Magpanagna ka kag isiling mo sa mga manugbantay, ‘Amo ini ang ginasiling sang Soberanong Ginuong Jehova: “Makaluluoy ang mga manugbantay sang Israel+ nga nagaatipan sang ila lamang kaugalingon! Indi bala ang panong ang dapat atipanon sang mga manugbantay?+ 3 Nagakaon kamo sang tambok sang sapat, kag nagasuksok sang de-lana nga panapton. Nagaihaw kamo sang pinakamatambok nga sapat,+ apang wala ninyo ginapahalab ang panong.+ 4 Wala ninyo ginapabaskog ang mga maluya ukon ginabulong ang nagamasakit ukon ginabugkusan ang mga may bali ukon ginapabalik ang mga nagtalang ukon ginapangita ang mga nadula.+ Sa baylo, ginapintasan ninyo sila.+ 5 Gani nag-alaplaag sila kag nangin pagkaon sang mabangis nga mga sapat bangod wala sing nagabantay sa ila.+ 6 Ang akon mga karnero nagdalangdalang sa mga kabukiran kag sa tagsa ka mataas nga bakulod. Ang akon mga karnero nag-alaplaag sa bug-os nga duta kag wala sing bisan isa nga nagapangita sa ila.

7 “‘“Gani, kamo nga mga manugbantay, pamatii ninyo ang ginsiling ni Jehova: 8 ‘“Subong nga buhi ako,” siling sang Soberanong Ginuong Jehova, “bangod ang akon mga karnero nangin tulukbon kag pagkaon sang tanan nga mabangis nga sapat sang latagon, kay ang akon manugbantay wala nagaamlig kag nagapangita sang akon mga karnero; sa baylo, ang ila lamang kaugalingon ang ginaatipan nila kag indi ang akon mga karnero,”’ 9 bangod sini, kamo nga mga manugbantay, pamatii ninyo ang ginasiling ni Jehova. 10 Amo ini ang ginasiling sang Soberanong Ginuong Jehova: ‘Batok ako sa mga manugbantay, kag manabat sila sa natabo sa akon mga karnero* kag indi na sila ang magapakaon* sang akon mga karnero,+ kag ang mga manugbantay indi na makapakaon sang ila kaugalingon. Luwason ko ang akon mga karnero sa ila mga baba, kag indi na nila sila pagkaunon.’”

11 “‘Kay amo ini ang ginasiling sang Soberanong Ginuong Jehova: “Ako mismo ang magapangita kag magaatipan sa akon mga karnero.+ 12 Atipanon ko ang akon mga karnero kaangay sang isa ka manugbantay nga nagatipon sang iya mga karnero nga nag-alaplaag kag nagapakaon sa ila.+ Luwason ko sila sa tanan nga lugar diin nag-alaplaag sila sang adlaw sang gal-um kag tuman nga kadulom.+ 13 Paguaon ko sila halin sa katawhan kag tipunon sila halin sa kadutaan kag dalhon sa ila kaugalingon nga duta. Pahalbon ko sila sa kabukiran sang Israel,+ sa higad sang mga sapa kag sa tanan nga lugar nga ginaistaran sa duta. 14 Pahalbon ko sila sa maayo nga halalban, kag magahalab sila sa mataas nga kabukiran sang Israel.+ Magaluko sila sa maayo nga halalban+ kag magahalab sing matambok nga hilamon sa kabukiran sang Israel.”

15 “‘“Ako mismo ang magapahalab sa akon mga karnero+ kag magapaluko sa ila,”+ siling sang Soberanong Ginuong Jehova. 16 “Pangitaon ko ang nadula,+ pabalikon ko ang nagtalang, bugkusan ko ang may bali, kag pabaskugon ko ang maluya; apang pamatyon ko ang matambok kag mabaskog. Hukman ko sila kag silutan kon ano ang nagakadapat sa ila.”

17 “‘Nahanungod sa inyo nga akon mga karnero, amo ini ang ginasiling sang Soberanong Ginuong Jehova: “Ipadapat ko ang katarungan sa tunga sang mga karnero, kag sa tunga sang mga karnero nga lalaki kag sang mga kanding nga lalaki.+ 18 Wala bala kamo naayawan nga nagahalab kamo sa pinakamaayo nga halalban? Tasakon pa bala ninyo ang iban nga mga halalban? Kag sa tapos kamo makainom sa pinakamatin-aw nga tubig, palubugon pa bala ninyo ini sang inyo tiil? 19 Magahalab bala ang akon mga karnero sa halalban nga gintasak ninyo kag magainom sa tubig nga ginpalubog sang inyo tiil?”

20 “‘Gani amo ini ang ginasiling sang Soberanong Ginuong Jehova: “Ako mismo ang magahukom sa matambok kag maniwang nga mga karnero, 21 kay ginadis-og ninyo sang inyo balikawang kag abaga kag ginasungay ninyo ang tanan nga nagamasakit tubtob mag-alaplaag sila sa malayo. 22 Kag luwason ko ang akon mga karnero, kag indi na sila mangin tulukbon;+ kag ipadapat ko ang katarungan sa tunga sang mga karnero. 23 Hatagan ko sila sing manugbantay,+ ang akon alagad nga si David,+ kag pakaunon niya sila. Sia ang magapakaon sa ila, kag mangin manugbantay nila.+ 24 Kag ako, si Jehova, mangin ila Dios,+ kag si David nga akon alagad mangin pangulo nila.+ Ako, si Jehova, ang nagsiling sini.

25 “‘“Kag magahimo ako sing katipan sang paghidait sa ila,+ kag tabugon ko ang mabangis nga mga sapat,+ agod magaistar sila sing malinong sa kamingawan kag magatulog sa kagulangan.+ 26 Himuon ko sila kag ang palibot sang akon bakulod nga pagpakamaayo+ kag magapaulan ako sa nagakaigo nga tion. Magaulan ang mga pagpakamaayo.+ 27 Magapamunga ang mga kahoy sang latagon, kag mangin mapatubason ang duta,+ kag magakabuhi sila sing malinong sa ila duta. Kag makilala nila nga ako amo si Jehova kon balion ko ang ila gota+ kag luwason sila sa mga nagaulipon sa ila. 28 Indi na sila paghalitan sang mga pungsod, kag indi na sila pagtukbon sang mabangis nga mga sapat. Magakabuhi sila sing malinong, kag wala na sing magapahadlok sa ila.+

29 “‘“Hatagan ko sila sang talamnan sang kabantugan,* gani wala na sing mapatay sa gutom sa duta,+ kag indi na sila pagpakahuy-an sang mga pungsod.+ 30 ‘Dayon makilala nila nga ako amo si Jehova nga ila Dios, ako kaupod nila kag sila, ang panimalay sang Israel, amo ang akon katawhan,’+ siling sang Soberanong Ginuong Jehova.”’

31 “‘Kamo ang akon mga karnero,+ ang panong nga akon ginaatipan. Kamo mga tawo lamang, kag ako amo ang inyo Dios,’ siling sang Soberanong Ginuong Jehova.”