Hukom

20 Gani ang tanan nga Israelinhon halin sa Dan+ tubtob sa Beer-seba kag halin sa duta sang Gilead,+ kag ang bug-os nga katilingban nagtipon nga nahiusa* sa atubangan ni Jehova sa Mizpa.+ 2 Kaupod sang katawhan sang matuod nga Dios ang mga pangulo sang tanan nga katawhan kag sang tanan nga tribo sang Israel, 400,000 ka soldado nga armado sing espada.+

3 Nabatian sang mga Benjaminhon nga nagkadto ang mga Israelinhon sa Mizpa.

Dayon nagsiling ang mga Israelinhon: “Sugiri kami, paano natabo ining malain nga butang?”+ 4 Nagsabat ang Levinhon+ nga bana sang ginpatay nga babayi: “Naghapit kami sang akon asawa sa Gibea+ nga sakop sang Benjamin agod magpaligad sang gab-i. 5 Pagkagab-i, ginpalibutan sang mga pumuluyo* sang Gibea ang balay nga gindayunan ko. Ako kuntani ang ila patyon, apang sa baylo, ang akon asawa ang ila ginhimuslan kag napatay sia.+ 6 Gani ginkuha ko ang bangkay sang akon asawa kag gin-utod-utod ini kag ginpadala sa tanan nga teritoryo sang palanublion ni Israel,+ bangod naghimo sila sing makahuluya gid nga buhat sa Israel. 7 Karon, kamo tanan nga katawhan sang Israel, maghatag kamo sing panugda kon ano ang himuon sa sini.”+

8 Dayon ang tanan nga katawhan naghiusa* kag nagsiling: “Wala sing isa sa aton nga magkadto sa iya tolda, ukon magpauli sa iya balay. 9 Amo ini ang himuon naton sa Gibea. Magpagabutgabot kita kon sin-o nga mga lalaki ang magasalakay sa sini.+ 10 Magpili kita sing 10 sa 100 ka lalaki nga halin sa tanan nga tribo sang Israel, kag sing 100 halin sa 1,000, kag sing 1,000 halin sa 10,000, agod mag-aman sing pagkaon para sa mga soldado nga magasalakay sa Gibea nga sakop sang Benjamin, bangod sang makahuluya nga buhat nga ginhimo nila sa Israel.” 11 Gani ang tanan nga lalaki sang Israel nagtipon nga nahiusa* kag naghilisugot nga salakayon nila ang siudad.

12 Dayon nagpadala ang mga tribo sang Israel sing mga lalaki sa bug-os nga tribo ni Benjamin kag nagsiling: “Ano ining malain nga butang nga natabo dira sa inyo? 13 Itugyan ninyo sa amon ang wala pulos nga mga lalaki sang Gibea,+ agod mapatay namon sila kag madula ang malain sa Israel.”+ Apang wala magpamati ang mga Benjaminhon sa ila mga utod nga Israelinhon.

14 Dayon naggua ang mga Benjaminhon sa ila mga siudad kag nagtipon sila sa Gibea agod magpakig-away sa mga Israelinhon. 15 Sa sina nga adlaw, nakatipon ang mga Benjaminhon sing 26,000 ka soldado nga armado sing espada halin sa ila mga siudad, wala labot sa 700 ka pinili nga soldado halin sa Gibea. 16 Sa sini nga mga soldado, 700 ka pinili nga soldado ang walis. Ang kada isa sa ila matanda maglabyog sing mga bato nga maigo nila bisan ang isa lang ka nahot sang buhok.

17 Apang ang Israel, wala labot sa tribo ni Benjamin, nakatipon sing 400,000 ka soldado nga armado sing espada+ kag ang kada isa sa ila maayo gid magpakig-away. 18 Nagkadto ang katawhan sang Israel sa Betel agod magpamangkot sa Dios.+ Dayon nagsiling sila: “Sin-o sa amon ang manguna sa pagpakig-away sa mga Benjaminhon?” Nagsabat si Jehova: “Si Juda ang manguna.”

19 Pagkaaga, ang mga Israelinhon naglakat kag nagkampo sila batok sa Gibea.

20 Dayon nagpuesto ang mga Israelinhon malapit sa Gibea agod magpakig-away sa mga Benjaminhon. 21 Gani naggua sa Gibea ang mga Benjaminhon, kag sa sina nga adlaw, 22,000 ka Israelinhon ang ginpamatay nila. 22 Apang nagpakaisog gihapon ang mga Israelinhon, kag nagpuesto sila liwat sa ila ginpuestuhan sa una nga adlaw. 23 Dayon nagkadto sa Betel ang mga Israelinhon kag naghibi sila tubtob maggab-i sa atubangan ni Jehova. Nagpamangkot sila kay Jehova: “Magapakig-away bala kami liwat sa mga Benjaminhon nga mga utod namon?”+ Nagsabat si Jehova: “Magpakig-away kamo sa ila.”

24 Gani ginsalakay sang mga Israelinhon ang Benjaminhon sa ikaduha nga adlaw. 25 Apang naggua sa Gibea ang mga Benjaminhon agod sugataon sila sa ikaduha nga adlaw kag 18,000 pa ka Israelinhon+ nga armado sing espada ang ginpamatay nila. 26 Bangod sini, nagkadto sa Betel ang tanan nga Israelinhon. Nagpungko sila didto kag naghibi sa atubangan ni Jehova.+ Sa sina man nga adlaw, nagpuasa+ sila tubtob maggab-i kag naghalad sila kay Jehova sing mga dulot nga sinunog+ kag mga dulot sa pag-ambitanay.+ 27 Pagkatapos sini, nagpamangkot ang mga Israelinhon kay Jehova,+ kay sadto nga tion yara sa Betel ang kaban sang katipan sang matuod nga Dios. 28 Sadto nga tion, nagaalagad* sa atubangan sang kaban si Finehas+ nga anak ni Eleazar nga anak ni Aaron. Nagpamangkot sila: “Magapakig-away pa bala kami sa mga Benjaminhon nga mga utod namon ukon indi na?”+ Nagsabat si Jehova: “Magpakig-away kamo, bangod buas itugyan ko sila sa inyo kamot.” 29 Dayon nagpuesto ang Israel sing mga soldado nga nagapanago+ sa palibot sang Gibea agod kibunon ini.

30 Ginsalakay sang mga Israelinhon ang mga Benjaminhon sa ikatlo nga adlaw, kag nagpuesto sila malapit sa Gibea pareho sang ginhimo nila sang una.+ 31 Sang naggua ang mga Benjaminhon sa siudad sang Gibea agod sugataon ang mga soldado, naglayo ang ila antad sa siudad.+ Dayon pareho sang una, ginsalakay nila kag ginpamatay ang mga 30 ka Israelinhon sa mga dalan pakadto sa Betel kag pakadto sa Gibea.+ 32 Gani nagsiling ang mga Benjaminhon: “Napierde naton sila pareho sang una.”+ Apang nagsiling ang mga Israelinhon: “Maisol kita agod dalhon naton sila palayo sa ila siudad pakadto sa mga dalan.” 33 Gani naghalin ang tanan nga Israelinhon kag nagpuesto sila sa Baal-tamar samtang ang nagapanago nga mga Israelinhon nga nagpuesto malapit sa Gibea naggua agod magsalakay man. 34 Ang 10,000 ka pinili nga soldado sang Israel nagsulong sa atubangan sang Gibea, kag masandukot gid ang inaway. Apang wala makahibalo ang mga Benjaminhon sang kapahamakan nga matabo sa ila.

35 Ginpadaug ni Jehova ang mga Israelinhon batok sa mga Benjaminhon.+ Sa sina nga adlaw, 25,100 ka soldado nga Benjaminhon nga armado sing espada ang ginpamatay sang mga Israelinhon.+

36 Apang naghunahuna ang mga Benjaminhon nga mapierde nila ang mga Israelinhon sang nag-isol sila palayo sa Benjamin,+ apang nag-isol ang mga Israelinhon bangod nagsalig sila sa ila nagapanago nga mga soldado nga ginpapuesto agod kibunon ang Gibea.+ 37 Ang nagapanago nga mga soldado madasig nga naghulag kag ginsalakay nila ang Gibea. Dayon naglapta sila kag ginpamatay nila ang tanan nga pumuluyo sang siudad paagi sa espada.

38 Ginkasugtan sang mga Israelinhon nga ang mga nagapanago nga mga soldado nga magasalakay sa siudad magpatub-ok sing aso halin sa siudad bilang sinyales.

39 Sang nag-isol ang mga Israelinhon sa inaway, nagsalakay ang mga Benjaminhon kag mga 30 ka Israelinhon ang ginpamatay nila.+ Nagsiling sila: “Napierde naton sila pareho sang natabo sa una nga inaway.”+ 40 Apang ang sinyales nga madamol nga aso nagtub-ok halin sa siudad. Sang nagbalikid ang mga Benjaminhon, nakita nila ang nagatub-ok nga aso halin sa bug-os nga siudad. 41 Dayon nagbalik ang mga Israelinhon, kag hinadlukan ang mga Benjaminhon bangod nakita nila ang kapahamakan nga natabo sa ila. 42 Gani nagpalagyo sila sa mga Israelinhon pakadto sa kamingawan apang ginlagas sila sang mga Israelinhon; pati ang mga soldado nga nagsalakay sa siudad nagbuylog man sa pagpamatay sa ila. 43 Ginkibon nila ang mga Benjaminhon kag ginlagas nila sila nga wala gid sing pahuway. Ginpamatay nila sila sa atubangan sang Gibea sa sidlangan nayon. 44 Ang napatay nga mga Benjaminhon, 18,000 ka isganan nga soldado.+

45 Nagpalagyo ang mga Benjaminhon sa kamingawan sa daku nga bato sang Rimon,+ kag 5,000 sa ila ang ginpamatay sang mga Israelinhon* sa mga dalan. Ginlagas pa nila ang mga Benjaminhon tubtob sa Gidom; kag 2,000 pa ka soldado ang napatay nila. 46 Sa sina nga adlaw, ang mga Benjaminhon nga napatay, 25,000 tanan ka isganan nga soldado nga armado sing espada.+ 47 Apang 600 ka soldado ang nakapalagyo sa kamingawan sa daku nga bato sang Rimon, kag nagpabilin sila sa daku nga bato sang Rimon sa sulod sang apat ka bulan.

48 Ginbalikan sang mga Israelinhon ang mga Benjaminhon. Ginpamatay nila paagi sa espada ang tanan nga nabilin sa mga siudad, ang mga tawo kag ang mga kasapatan. Ginsunog man nila ang tanan nga siudad nga naagyan nila.