Ezequiel

9 Kag sa mabaskog nga tingog nagsiling sia: “Ipatawag ang mga magasilot sa siudad, ang kada isa magdala sing makamamatay nga hinganiban!”

2 May nakita ako nga anom ka lalaki nga nagapalapit halin sa naibabaw nga gawang+ nga nagaatubang sa aminhan. Ang kada isa sa ila may dala nga inuglampos; kag may upod sila nga isa ka lalaki nga nagabayo sing linen kag sa iya hawak may suludlan sang tinta nga sungay nga ginagamit sang sekretaryo,* kag nagsulod sila kag nagtindog sa tupad sang halaran nga saway.+

3 Kag ang himaya sang Dios sang Israel+ sa ibabaw sang mga kerubin nagsaylo sa ibabaw sang atangan sang templo,+ kag gintawag niya ang tawo nga nagabayo sing linen kag sa iya hawak may suludlan sang tinta nga sungay nga ginagamit sang sekretaryo. 4 Nagsiling si Jehova sa iya: “Mag-agi ka sa bug-os nga siudad sang Jerusalem kag markahi ang agtang sang mga tawo nga nagapanghayhay kag nagapanghakroy+ tungod sa makangilil-ad nga mga butang nga ginahimo sa siudad.”+

5 Kag nabatian ko nga nagsiling sia sa iban: “Magsunod kamo sa iya sa siudad kag magpamatay. Indi kamo magpakita sing kaluoy.+ 6 Pamatya ninyo ang tanan nga tigulang nga lalaki, mga pamatan-on nga lalaki, mga dalaga, mga bata, kag mga babayi.+ Apang indi kamo magpalapit sa kay bisan sin-o nga may marka.+ Mag-umpisa kamo sa akon santuaryo.”+ Gani gin-una nila pamatay ang mga gulang nga yara sa atubangan sang templo.+ 7 Kag nagsiling pa sia sa ila: “Higkui ninyo ang templo kag pun-a ninyo sing mga bangkay ang mga luwang.+ Maglakat na kamo!” Gani naglakat sila kag nagpamatay sa siudad.

8 Samtang nagapamatay sila kag ako na lang ang nabilin, naghapa ako kag nagsinggit: “O Soberanong Ginuong Jehova! Laglagon mo bala ang tanan nga nagkalabilin sang Israel samtang ginabubo mo ang imo kaakig sa Jerusalem?”+

9 Gani nagsiling sia sa akon: “Daku gid ang sala sang panimalay sang Israel kag sang Juda.+ Ang duta napuno sang pagpaagay sing dugo,+ kag ang siudad napuno sing kalainan.+ Kay nagsiling sila, ‘Ginbiyaan ni Jehova ang duta, kag indi kita makita ni Jehova.’+ 10 Gani indi ako magpakita sing kaluoy; ukon sing pagkamainawaon.+ Pabayaron ko sila suno sa ila mga binuhatan.”

11 Dayon nakita ko nga nagbalik ang tawo nga nagabayo sing linen kag sa iya hawak may suludlan sang tinta nga sungay. Nagsiling sia: “Nahimo ko na ang suno sa ginsugo mo.”