Jeremias

36 Sang ikap-at nga tuig sang paghari sa Juda ni Jehoiakim+ nga anak ni Josias, nagsiling si Jehova kay Jeremias: 2 “Magkuha ka sing linukot* kag isulat mo sa sini ang tanan nga ginsiling ko sa imo batok sa Israel kag sa Juda+ kag sa tanan nga pungsod,+ sugod sang una nga adlaw nga nagpakighambal ako sa imo sang panahon ni Josias tubtob subong.+ 3 Ayhan kon mabatian sang panimalay ni Juda ang tanan nga kalaglagan nga himuon ko sa ila, untatan nila ang ila malain nga ginahimo, kag patawaron ko ang ila mga kasaypanan kag mga sala.”+

4 Gani gintawag ni Jeremias si Baruc+ nga anak ni Neria, kag ginsulat ni Baruc sa linukot* ang tanan nga pulong ni Jehova nga gindikta ni Jeremias.+ 5 Dayon ginsugo ni Jeremias si Baruc: “Indi ako makasulod sa balay ni Jehova kay gindumilian ako. 6 Gani ikaw ang dapat magsulod kag basahon mo sing mabaskog ang pulong ni Jehova nga gindikta ko sa imo nga isulat sa linukot. Basahon mo ini sing mabaskog sa katawhan sa balay ni Jehova sa adlaw sang pagpuasa; gani basahon mo ini sa tanan nga katawhan sang Juda nga magakadto halin sa ila mga siudad. 7 Basi pa lang magpakiluoy sila kay Jehova kag untatan nila ang ila malain nga ginahimo, kay daku ang kaakig kag kasingkal ni Jehova sa sini nga katawhan.”

8 Gani ginhimo ni Baruc nga anak ni Neria ang tanan nga ginsugo ni Jeremias nga manalagna; ginbasa niya sing mabaskog sa balay ni Jehova ang pulong ni Jehova nga nasulat sa linukot.*+

9 Sang ikasiam nga bulan sang ikalima nga tuig sang paghari sa Juda ni Jehoiakim+ nga anak ni Josias, ang tanan nga katawhan sa Jerusalem kag ang tanan nga katawhan halin sa mga siudad sang Juda nga nagkadto sa Jerusalem ginpapuasa sa atubangan ni Jehova.+ 10 Dayon ginbasa sing mabaskog ni Baruc sa balay ni Jehova ang pulong sa linukot* nga gindikta ni Jeremias. Ginbasa niya ini sa tanan nga katawhan didto sa hulot* ni Gemarias+ nga anak ni Safan+ nga manugkopya,* sa ibabaw nga luwang, sa alagyan sang bag-o nga gawang sang balay ni Jehova.+

11 Sang mabatian ni Micaya nga anak ni Gemarias nga anak ni Safan ang tanan nga pulong ni Jehova nga nasulat sa linukot,* 12 nagkadto sia sa balay* sang hari, sa hulot sang sekretaryo. Nagapungko didto ang tanan nga prinsipe:* si Elisama+ nga sekretaryo, si Delaias nga anak ni Semaias, si Elnatan+ nga anak ni Acbor,+ si Gemarias nga anak ni Safan, si Sedequias nga anak ni Hananias, kag ang tanan nga iban pa nga prinsipe. 13 Ginsugid sa ila ni Micaya ang tanan nga pulong sa linukot* nga nabatian niya nga ginbasa ni Baruc sing mabaskog sa katawhan.

14 Dayon ginsugo sang tanan nga prinsipe si Jehudi nga anak ni Netanias nga anak ni Selemias nga anak ni Cusi nga magkadto kay Baruc kag magsiling: “Magkadto ka diri kag dalha ang linukot nga ginbasa mo sing mabaskog sa katawhan.” Gindala ni Baruc nga anak ni Neria ang linukot kag nagkadto sia sa ila. 15 Nagsiling sila sa iya: “Palihug, magpungko ka kag basaha ini sa amon sing mabaskog.” Kag ginbasa ini sa ila ni Baruc sing mabaskog.

16 Sang mabatian nila ang tanan nga pulong nga ginbasa, nagtinulukay sila nga may kahadlok, kag nagsiling sila kay Baruc: “Dapat gid namon isugid ini tanan sa hari.” 17 Ginpamangkot nila si Baruc: “Palihug, sugiri kami. Paano mo nasulat ini tanan? Gindikta bala ini sa imo ni Jeremias?” 18 Nagsabat si Baruc: “Gindikta niya ini tanan sa akon, kag ginsulat ko ini sa linukot.”* 19 Nagsiling ang mga prinsipe kay Baruc: “Magpanago kamo ni Jeremias, kag indi gid kamo manugid kon diin kamo.”+

20 Ginbutang nila ang linukot sa hulot ni Elisama nga sekretaryo. Dayon nagkadto sila sa hari nga didto sa luwang, kag ginsugid nila sa hari ang tanan nga nabatian nila.

21 Gani ginpakuha sang hari kay Jehudi+ ang linukot sa hulot ni Elisama nga sekretaryo. Ginbasa ini ni Jehudi sing mabaskog sa hari kag sa tanan nga prinsipe nga nagatindog sa tupad sang hari. 22 Ikasiam sadto nga bulan* kag nagapungko ang hari sa atubangan sang dalabukan sang kalayo didto sa iya balay para sa tigtulugnaw. 23 Sa tapos mabasa ni Jehudi ang tatlo ukon apat ka linya sa linukot, ginautod ini sang hari paagi sa kutsilyo sang sekretaryo kag ginadap-ong niya ini sa kalayo, tubtob nasunog ang bug-os nga linukot. 24 Wala gid mahadlok ang hari kag ang tanan niya nga alagad nga nakabati sining tanan nga pulong kag wala man nila gingisi ang ila bayo. 25 Bisan pa nagpakiluoy sa hari si Elnatan,+ si Delaias,+ kag si Gemarias+ nga indi pagsunugon ang linukot, wala sia magpamati sa ila. 26 Ginsugo pa gani sang hari si Jerameel nga anak sang hari, si Seraya nga anak ni Azriel, kag si Selemias nga anak ni Abdeel, nga dakpon si Baruc nga sekretaryo kag si Jeremias nga manalagna, apang gintago sila ni Jehova.+

27 Sa tapos masunog sang hari ang linukot nga ginsulatan ni Baruc sang gindikta sa iya ni Jeremias,+ nagsiling liwat si Jehova kay Jeremias: 28 “Magkuha ka sing isa pa ka linukot, kag isulat mo sa sini ang pareho gid nga mga pulong nga nasulat sa una nga linukot nga ginsunog ni Hari Jehoiakim sang Juda.+ 29 Kag amo ini ang isiling mo batok kay Hari Jehoiakim sang Juda, ‘Amo ini ang ginasiling ni Jehova: “Ginsunog mo ining linukot kag nagsiling ka, ‘Ngaa ginsulat mo sa sini: “Magaabot gid ang hari sang Babilonia kag laglagon niya ini nga duta kag wala sing mabilin nga tawo kag sapat”?’+ 30 Gani amo ini ang ginasiling ni Jehova batok kay Hari Jehoiakim sang Juda, ‘Wala sia sing anak nga magapungko sa trono ni David,+ kag ang iya bangkay pabay-an sa init sang adlaw kag sa tugnaw sang gab-i.+ 31 Manabat sia sa akon pati ang iya kaliwatan* kag ang iya mga alagad tungod sa ila sala, kag himuon ko sa ila kag sa mga pumuluyo sang Jerusalem kag sa katawhan sang Juda ang tanan nga kalaglagan nga ginsiling ko batok sa ila,+ apang wala sila magpamati.’”’”+

32 Gani nagkuha si Jeremias sing isa pa ka linukot kag ginhatag niya ini kay Baruc nga sekretaryo+ nga anak ni Neria. Ginsulat ni Baruc sa linukot ang tanan nga pulong nga gindikta liwat sa iya ni Jeremias nga nasulat sa linukot* nga ginsunog ni Hari Jehoiakim sang Juda.+ Kag madamo pa nga pulong nga pareho sa una nga ginsulat ang gindugang.