Levitico

9 Sang ikawalo nga adlaw,+ gintawag ni Moises si Aaron kag ang iya mga anak kag ang mga gulang sang Israel. 2 Nagsiling sia kay Aaron: “Magkuha ka sing tinday nga baka nga wala sing diperensia para sa dulot tungod sa sala+ kag sing karnero nga lalaki nga wala sing diperensia para sa dulot nga sinunog, kag ihalad ini sa atubangan ni Jehova. 3 Apang isiling mo sa mga Israelinhon, ‘Magkuha kamo sing isa ka kanding nga lalaki para sa dulot tungod sa sala, kag sing isa ka tinday nga baka kag isa ka tinday nga karnero nga lalaki, nga ang kada isa nagaedad sing isa ka tuig kag wala sing diperensia, para sa dulot nga sinunog. 4 Magkuha man kamo sing isa ka toro nga baka kag isa ka karnero nga lalaki para sa mga halad sa pag-ambitanay+ nga ihalad sa atubangan ni Jehova, kag sing dulot nga uyas+ nga ginsamuan sing lana, kay subong nga adlaw magapakita si Jehova sa inyo.’”+

5 Gani gindala nila ini tanan sa atubangan sang tolda nga tilipunan* suno sa ginsugo ni Moises. Dayon ang bug-os nga katilingban nagpalapit kag nagtindog sa atubangan ni Jehova. 6 Nagsiling si Moises: “Amo ini ang ginsugo ni Jehova nga himuon ninyo, agod makita ninyo ang himaya ni Jehova.”+ 7 Dayon nagsiling si Moises kay Aaron: “Magpalapit ka sa halaran kag ihalad ang imo dulot tungod sa sala+ kag ang imo dulot nga sinunog, kag maghimo ka sing pagtumbas para sa imo sala+ kag para sa sala sang imo panimalay. Ihalad mo man ang dulot sang katawhan,+ kag maghimo ka sing pagtumbas para sa ila sala,+ suno sa ginsugo ni Jehova.”

8 Nagpalapit dayon si Aaron sa halaran kag gin-ihaw niya ang tinday nga baka nga dulot tungod sa iya mga sala.+ 9 Dayon gindala sang mga anak ni Aaron ang dugo+ sa iya, kag gintum-oy niya ang iya tudlo sa dugo kag ginpalhit ini sa mga sungay sang halaran, kag ginbubo niya ang nabilin nga dugo sa tiilan sang halaran.+ 10 Ginpaaso niya sa halaran ang sapay, ang mga batobato, kag ang sapay sang atay halin sa dulot tungod sa sala, suno sa ginsugo ni Jehova kay Moises.+ 11 Kag ginsunog niya sa kalayo ang unod kag ang panit sa gua sang kampo.+

12 Dayon gin-ihaw niya ang dulot nga sinunog, kag gindala sa iya sang mga anak ni Aaron ang dugo kag ginwisik niya ini sa palibot sang halaran.+ 13 Gindala nila sa iya ang mga hiniwa kag ang ulo sang dulot nga sinunog, kag ginpaaso niya ini sa halaran. 14 Dayon ginhugasan niya ang mga tinai kag ang mga batiis kag ginpaaso ini upod sa dulot nga sinunog sa halaran.

15 Pagkatapos sini, ginhalad niya ang dulot sang katawhan kag ginkuha ang kanding nga dulot tungod sa sala para sa katawhan kag gin-ihaw ini kag ginhalad ini bilang dulot tungod sa sala pareho sang nauna. 16 Kag ginhalad niya ang dulot nga sinunog suno sa kinaandan nga pamaagi.+

17 Ginhalad man niya ang dulot nga uyas,+ naghakop sia sa sini kag ginpaaso ini sa halaran, dugang pa sa dulot nga sinunog sa aga.+

18 Pagkatapos sini, gin-ihaw niya ang baka kag ang karnero nga lalaki nga halad sa pag-ambitanay para sa katawhan. Dayon gindala sa iya sang mga anak ni Aaron ang dugo, kag ginwisik niya ini sa palibot sang halaran.+ 19 Ginkuha nila ang mga sapay sang baka,+ ang matambok nga ikog sang karnero nga lalaki, ang sapay nga nagaputos sa kasudlan, ang mga batobato kag ang sapay sang atay,+ 20 kag gintungtong nila ini sa mga dughan sang mga sapat, dayon ginpaaso niya sa halaran ang mga sapay.+ 21 Apang ang mga dughan kag ang tuo nga batiis sang mga sapat ginhaboghabog ni Aaron bilang dulot nga hinabog sa atubangan ni Jehova, suno sa ginsugo ni Moises.+

22 Dayon ginbayaw ni Aaron ang iya mga kamot sa katawhan kag ginpakamaayo sila,+ kag nagpanaug sia halin sa paghalad sing dulot tungod sa sala kag sing dulot nga sinunog kag sing mga halad sa pag-ambitanay. 23 Sang ulihi, nagsulod si Moises kag si Aaron sa tolda nga tilipunan, dayon naggua sila kag ginpakamaayo ang katawhan.+

Nakita sang tanan nga katawhan ang himaya ni Jehova,+ 24 kag may kalayo nga naghalin kay Jehova+ kag ginsunog sini ang dulot nga sinunog kag ang mga sapay sa halaran. Sang makita ini sang tanan nga katawhan, nagsinggit sila kag nagyaub.+