Jeremias

41 Sang ikapito nga bulan, si Ismael+ nga anak ni Netanias nga anak ni Elisama nga kaliwat sang hari* kag isa sa pangulo nga mga opisyal sang hari, nagkadto kay Gedalias nga anak ni Ahikam sa Mizpa,+ upod ang napulo ka tawo. Samtang nagakaon sila sing tingob sa Mizpa, 2 nagtindog si Ismael nga anak ni Netanias kag ang napulo ka tawo nga kaupod niya, kag ginpatay nila paagi sa espada si Gedalias nga anak ni Ahikam nga anak ni Safan. Ginpatay niya ang ginpadumala sang hari sang Babilonia sa kadutaan. 3 Ginpatay man ni Ismael ang tanan nga Judiyo nga kaupod ni Gedalias sa Mizpa, pati ang Caldeanhon nga mga soldado didto.

4 Sang ikaduha nga adlaw sa tapos ginpatay si Gedalias, kag wala pa sing nakahibalo sini, 5 may nag-abot nga 80 ka lalaki halin sa Siquem,+ sa Shilo,+ kag sa Samaria.+ Ginbarbasan nila ang ila bungot, gisi ang ila mga bayo, ginpilasan nila ang ila kaugalingon,+ kag may dala sila nga mga dulot nga uyas kag olibano+ agod ihalad sa balay ni Jehova. 6 Gani naggua sa Mizpa si Ismael nga anak ni Netanias agod sugataon sila, kag nagahilibion sia samtang nagalakat. Sang masugata na niya sila, nagsiling sia sa ila: “Kadto kamo kay Gedalias nga anak ni Ahikam.” 7 Apang sang makasulod na sila sa siudad, ginpamatay sila ni Ismael nga anak ni Netanias kag sang mga lalaki nga kaupod niya. Dayon ginpanghulog nila ang ila mga bangkay sa bubon.

8 Apang may napulo ka lalaki sa ila nga nagsiling kay Ismael: “Indi kami pagpatya, kay may tinago kami sa uma nga mga trigo, sebada, lana, kag dugos.” Gani wala niya sila ginpatay upod sa ila mga utod. 9 Ginpanghulog ni Ismael ang mga bangkay sang lalaki nga ginpamatay niya sa isa ka daku nga bubon, nga ginpakutkot sadto ni Hari Asa bangod nahadlok sia kay Hari Baasa sang Israel.+ Ginpuno ini ni Ismael nga anak ni Netanias sing mga bangkay sang ginpamatay niya.

10 Ginbihag ni Ismael ang tanan nga nabilin nga tawo sa Mizpa,+ pati ang mga anak nga babayi sang hari kag ang tanan nga iban pa nga tawo nga nabilin sa Mizpa nga ginpadumalahan ni Nebuzaradan nga pangulo sang mga bantay kay Gedalias+ nga anak ni Ahikam. Ginbihag sila ni Ismael nga anak ni Netanias kag naglakat sila pakadto sa mga Ammonhon.+

11 Sang mabalitaan ni Johanan+ nga anak ni Karea kag sang tanan nga pangulo sang mga soldado nga kaupod niya ang tanan nga malain nga ginhimo ni Ismael nga anak ni Netanias, 12 gin-upod nila ang tanan nga lalaki kag naglakat sila sa pagpakig-away kay Ismael nga anak ni Netanias. Nakita nila sia sa daku nga punong sa Gibeon.

13 Nagkasadya ang tanan nga tawo nga upod ni Ismael sang makita nila si Johanan nga anak ni Karea kag ang tanan nga pangulo sang mga soldado nga kaupod niya. 14 Dayon ang tanan nga tawo nga ginbihag ni Ismael halin sa Mizpa+ nagbalik kag nagkadto kay Johanan nga anak ni Karea. 15 Apang si Ismael nga anak ni Netanias kag ang iya walo ka tinawo nagpalagyo kay Johanan kag nagkadto sila sa mga Ammonhon.

16 Gindala ni Johanan nga anak ni Karea kag sang tanan nga pangulo sang mga soldado nga kaupod niya ang nabilin nga katawhan nga ila ginluwas kay Ismael nga anak ni Netanias, nga ginbihag ni Ismael sa Mizpa sa tapos niya ginpatay si Gedalias+ nga anak ni Ahikam. Halin sa Gibeon, gindala nila ang mga lalaki, ang mga soldado, ang mga babayi, ang mga kabataan, kag ang mga opisyal sang palasyo. 17 Naglakat sila kag nagtener sa dalayunan ni Kimham malapit sa Betlehem,+ kag makadto sila sa Egipto+ 18 bangod nahadlok sila sa mga Caldeanhon, kay ginpatay ni Ismael nga anak ni Netanias si Gedalias nga anak ni Ahikam, nga amo ang ginpadumala sang hari sang Babilonia sa kadutaan.+