Hulubaton

19 Mas maayo pa nga mangin imol kag maglakat nga may integridad+

Sangsa mangin buangbuang kag maghambal sing kabutigan.+

 2 Ang tawo* nga wala sing ihibalo indi maayo,+

Kag ang isa nga nagapadasudaso* nagapakasala.

 3 Ang kabuangan sang tawo nagapatiko sang iya dalanon,

Kag ang iya tagipusuon nagakaakig kay Jehova.

 4 Ang manggaranon madamo sing abyan,

Apang ang imol ginabayaan bisan sang iya abyan.+

 5 Ang butigon nga saksi indi makalikaw sa silot,+

Kag ang isa nga nagabinutig pagasilutan.+

 6 Madamo ang luyag kahamut-an sang dungganon* nga tawo,

Kag ang tanan abyan sang tawo nga mahinatagon sing regalo.

 7 Ang tanan nga utod sang imol naugot sa iya;+

Mas labi pa nga ginalikawan sia sang iya mga abyan!+

 9 Ang butigon nga saksi indi makalikaw sa silot,

Kag ang isa nga nagabinutig malaglag.+

10 Indi bagay sa buangbuang nga magkabuhi sing magarbo;

Labi na gid sa suluguon nga maggahom sa mga prinsipe!+

11 Ang paghangop sang tawo nagapahaganhagan sang iya kaakig,+

Kag katahom sa iya bahin nga palampason* ang sala.*+

12 Ang kaakig sang hari kaangay sa ngurob sang leon,*+

Apang ang iya kahamuot kaangay sa tun-og sa hilamon.

13 Ang anak nga buangbuang nagahatag sing kalisod sa iya amay,+

Kag ang palaaway* nga asawa kaangay sang atop nga wala nagauntat sa pagtulo.+

14 Ang balay kag manggad palanublion halin sa amay,

Apang ang maalamon nga asawa halin kay Jehova.+

15 Ang tawo nga matamad palatulog,

Kag ang tawo* nga laminday magutman.+

16 Ang isa nga nagatuman sang sugo sang Dios nagatipig sang iya kabuhi;*+

Ang isa nga wala nagahalong sa iya mga dalanon mapatay.+

17 Ang isa nga nagakaluoy sa kubos nagapahulam kay Jehova,+

Kag bayaran* Niya ang iya ginahimo.+

18 Disiplinaha ang imo anak samtang may paglaum pa,+

Agod wala ka sing salabton sa iya kamatayon.+

19 Ang tawo nga maakigon magabayad sang multa;

Kay kon pabay-an mo lang sia, sulitsulit mo ini nga himuon.+

20 Pamatii ang laygay kag batuna ang disiplina,+

Agod sa ulihi mangin maalamon ka.+

21 Madamo ang plano sa tagipusuon sang isa ka tawo,

Apang ang kabubut-on* ni Jehova amo ang matuman.+

22 Ang butang nga halandumon sa isa ka tawo amo ang iya mainunungon nga gugma;+

Kag mas maayo pa nga mangin imol sangsa mangin butigon.

23 Ang kahadlok kay Jehova nagadul-ong sa kabuhi;+

Ang may kahadlok sa Iya makatulog sing mahamuok, nga hilway sa katalagman.+

24 Ang matamad nga tawo nagabutang sang iya kamot sa yahong,

Apang natamaran sia bisan sa paghungit sini sa iya baba.+

25 Bunala ang nagapangyaguta,+ agod mangin maalamon ang kulang sing kinaalam,+

Kag sabdunga ang tawo nga may paghangop, agod madugangan ang iya ihibalo.+

26 Ang isa nga nagapamintas sa iya amay kag nagatabog sa iya iloy

Isa ka makahuluya kag talamayon nga anak.+

27 Anak ko, kon indi ka na magpamati sa disiplina,

Mapahilayo ka sa mga pulong sang ihibalo.

28 Ginayaguta sang wala sing pulos nga saksi ang katarungan,+

Kag nalipay ang malauton sa paghimo sing makahalalit nga mga butang.+

29 Ang paghukom ginatigana sa mga tawo nga nagapangyaguta,+

Kag ang latigo para sa likod sang mga buangbuang.+