Levitico

5 “‘Kon ang isa ka tawo* makasala bangod nabatian niya ang panawagan sa publiko sa pagtestigo*+ kag saksi sia ukon nakita niya ukon nabatian niya ang tuhoy sini, apang wala niya ginsugid ini, manabat sia tungod sini nga sala.

2 “‘Ukon kon ang isa ka tawo* makatandog sing bisan ano nga indi matinlo, patay nga lawas sang indi matinlo nga ilahas nga sapat, patay nga lawas sang indi matinlo nga mahagop nga sapat, ukon sang indi matinlo nga nagapanong nga mga sapat,+ nakasala na sia kag mangin indi matinlo sia bisan pa wala niya ini mahibaluan. 3 Ukon kon ang isa ka tawo wala makahibalo nga nakatandog sia sing bisan ano nga kahigkuan sang tawo,+ bisan ano nga butang nga nagahimo sa iya nga indi matinlo, kag sa ulihi nahibaluan niya ini, nakasala sia.

4 “‘Ukon kon ang isa ka tawo* padasudaso nga magpanumpa sa paghimo sing isa ka butang, maayo man ukon malain, kag wala sia makahibalo sini, apang sa ulihi narealisar niya nga nagpanumpa sia sing padasudaso, nakasala sia.*+

5 “‘Kon makasala sia may kaangtanan sa isa sini nga mga butang, dapat sia magtu-ad+ kon paano sia nakasala. 6 Magdala man sia kay Jehova sing dulot tungod sa kasal-anan,+ isa ka kordero nga babayi ukon isa ka tinday nga kanding nga babayi, bilang isa ka dulot tungod sa sala. Dayon ang saserdote magahimo sing pagtumbas para sa iya sala.

7 “‘Apang, kon indi niya masarangan ang isa ka karnero, magdala sia kay Jehova bilang iya dulot tungod sa kasal-anan sing duha ka tukmo ukon duha ka gamay pa nga pating,+ ang isa dulot tungod sa sala kag ang isa dulot nga sinunog.+ 8 Dalhon niya ini sa saserdote kag unahon halad sang saserdote ang dulot tungod sa sala. Pilasan niya ang liog sini, apang indi niya ini pag-utdon. 9 Iwisik niya ang iban nga dugo sang dulot tungod sa sala sa kilid sang halaran, apang ang nabilin nga dugo patuluon niya sa tiilan sang halaran.+ Isa ini ka dulot tungod sa sala. 10 Ang isa pa ihalad niya bilang dulot nga sinunog suno sa kinaandan nga pamaagi.+ Ang saserdote magahimo sing pagtumbas para sa sala nga nahimo niya, kag patawaron sia.+

11 “‘Kon indi niya masarangan ang duha ka tukmo ukon duha ka gamay pa nga pating, magdala sia bilang dulot para sa iya sala sing ikanapulo nga bahin sang isa ka efa*+ nga pino nga harina. Indi niya ini pagbutangan sing lana ukon sing olibano, kay isa ini ka dulot tungod sa sala. 12 Dalhon niya ini sa saserdote, kag ang saserdote magkuha sing isa ka hakop sa sini bilang isa ka pahanumdom nga halad kag paasuhon niya ini sa halaran sa ibabaw sang mga dulot nga sinunog sa kalayo para kay Jehova. Isa ini ka dulot tungod sa sala. 13 Ang saserdote magahimo sing pagtumbas para sa bisan ano sa sining mga sala nga nahimo niya, kag patawaron sia.+ Mangin iya sang saserdote ang nabilin sa dulot,+ pareho sang ginahimo sa dulot nga uyas.’”+

14 Nagsiling pa si Jehova kay Moises: 15 “Kon ang isa ka tawo* mangin indi matutom bangod nakasala sia sing indi hungod batok sa balaan nga mga butang ni Jehova,+ magdala sia kay Jehova bilang dulot tungod sa kasal-anan sing isa ka karnero nga lalaki nga wala sing diperensia halin sa panong.+ Ang saserdote ang magasiling kon pila ka siklo* nga pilak ang bili sang karnero nga lalaki kag dapat nga suno ini sa talaksan nga timbangan sang balaan nga duog.*+ 16 Para sa sala nga nahimo niya batok sa balaan nga duog, amo sina ang ibayad niya kag dugangan niya ini sing 20 porsiento sang bili sini.+ Ihatag niya ini sa saserdote, agod ang saserdote maghimo sing pagtumbas+ para sa iya paagi sa karnero nga lalaki nga dulot tungod sa kasal-anan, kag patawaron sia.+

17 “Kon makasala ang isa ka tawo* bangod nakahimo sia sing butang nga ginsugo ni Jehova nga indi paghimuon, bisan pa wala niya ini mahibaluan, nakasala gihapon sia kag dapat sia manabat sa iya sala.+ 18 Dapat sia magdala sa saserdote sing isa ka karnero nga lalaki nga wala sing diperensia halin sa panong suno sa husto nga bili sini, bilang dulot tungod sa kasal-anan.+ Dayon magahimo ang saserdote sing pagtumbas para sa sala nga wala niya mahibaluan nga nahimo niya sing indi hungod, kag patawaron sia. 19 Isa ini ka halad tungod sa kasal-anan. Nakasala gid sia batok kay Jehova.”