Salmo

 2 Hugasi ako sing bug-os sa akon kasaypanan,+

Kag tinlui ako sa akon sala.+

 3 Kay nakahibalo gid ako sang akon mga paglapas,

Kag ang akon sala yara pirme sa akon atubang.*+

 4 Labaw sa tanan, sa imo* ako nakasala;+

Ginhimo ko ang malain sa imo panulok.+

Gani, matarong ang imo ginasiling,

Husto ang imo paghukom.+

 5 Natawo ako nga may kasaypanan,

Kag ginpanamkon ako sang akon iloy sa sala.*+

 6 Nalipay ka sa maminatud-on nga tagipusuon;+

Tudlui ang akon tagipusuon sing matuod nga kaalam.

 7 Tinlui ako sa akon sala paagi sa hisopo* agod mangin matinlo ako;+

Hugasi ako agod mangin maputi pa ako sa niebe.+

 8 Pabatia ako sang tingog sang paghugyaw kag pagkasadya,

Agod mangin malipayon ang tawo* nga imo gindugmok.+

 9 Patawara ako* sa akon mga sala,+

Kag panasa* ang tanan ko nga kasaypanan.+

10 O Dios ko, putlia ang akon tagipusuon,+

Kag hatagi ako sing bag-o kag malig-on nga espiritu.+

11 Indi ako pagtabuga sa atubangan mo;

Kag indi pagkuhaa sa akon ang imo balaan nga espiritu.

12 Ibalik sa akon ang kasadya nga nabatyagan ko sang ginluwas mo ako;+

Pukawa ang akon handum nga magtuman sa imo.*

13 Tudluan ko ang mga malinapason sang imo mga dalanon,+

Agod magbalik sa imo ang mga makasasala.

14 Luwasa ako sa kasal-anan sa dugo,+ O Dios ko, ang Dios sang akon kaluwasan,+

Agod mapahayag ko sing malipayon ang imo pagkamatarong.+

15 O Jehova, pahambala ako,

Agod ipahayag ko ang imo kadayawan.+

16 Kay indi mo luyag ang halad, kay kuntani mahalad ako;+

Wala ka mahamuot sa dulot nga sinunog.+

17 Ang mga halad nga kalahamut-an sa Dios amo ang nalisdan nga espiritu;

Ang nagakalisod kag mahinulsulon nga tagipusuon, O Dios ko, indi mo pagsikwayon.*+

18 Tungod sang imo maayo nga kabubut-on himua ang maayo sa Sion;

Patinduga ang mga pader sang Jerusalem.

19 Dayon malipay ka sa mga halad sang pagkamatarong,

Sa mga halad nga sinunog kag sa bug-os nga mga dulot;

Kag ihalad sa imo halaran ang mga toro.+