2 Cronica

15 Nagpanghikot ang espiritu sang Dios kay Azarias nga anak ni Oded. 2 Gani nagpakigkita sia kay Asa kag nagsiling sia sa iya: “Pamatii ninyo ako, Asa kag kamo tanan sa Juda kag Benjamin! Kaupod ninyo si Jehova kon padayon kamo nga mag-upod sa iya;+ kag kon pangitaon ninyo sia, makita ninyo sia,+ apang kon bayaan ninyo sia, bayaan man niya kamo.+ 3 Sa malawig nga tion* ang Israel wala sing matuod nga Dios, wala sing saserdote nga nagatudlo, kag wala sing kasuguan.+ 4 Apang sang nagbalik sila kay Jehova nga Dios sang Israel tungod sa ila kabudlayan kag ginpangita nila sia, gintugutan niya sila nga makita sia.+ 5 Sadto nga tion delikado ang paglakbay,* kay may tuman nga kagamo sa tanan nga nagaistar sa kadutaan. 6 Ginalaglag sang isa ka pungsod ang isa ka pungsod, kag ginalaglag sang isa ka siudad ang isa ka siudad, bangod ginpagamo sila sang Dios paagi sa tanan nga sahi sang kabudlayan.+ 7 Apang magpakabakod kamo kag indi kamo magpaluya,*+ kay padyaan kamo sa inyo ginahimo.”

8 Sang mabatian ni Asa ang ginsiling ni Azarias kag ang tagna ni Oded nga manalagna, nagpakaisog sia kag gindula niya ang makangilil-ad nga mga diosdios sa bug-os nga duta sang Juda+ kag Benjamin kag sa mga siudad nga nasakop niya sa kabukiran sang Efraim, kag ginpakay-o niya ang halaran ni Jehova sa atubangan sang portiko sang balay ni Jehova.+ 9 Kag gintipon niya ang bug-os nga Juda kag Benjamin, pati ang dumuluong nga mga pumuluyo sang Efraim, Manases, kag Simeon,+ kay madamo gid ang nagkadto sa iya halin sa Israel sang makita nila nga kaupod niya si Jehova nga iya Dios. 10 Nagtipon sila sa Jerusalem sang ikatlo nga bulan sang ika-15 nga tuig sang paghari ni Asa. 11 Sina nga adlaw, naghalad sila kay Jehova sing 700 ka baka kag 7,000 ka karnero halin sa mga inagaw nila. 12 Naghimo man sila sing katipan nga pangitaon nila si Jehova nga Dios sang ila mga katigulangan sing bug-os tagipusuon kag sing bug-os kalag.*+ 13 Patyon ang bisan sin-o nga indi magpangita kay Jehova nga Dios sang Israel, bata man ukon tigulang,* lalaki man ukon babayi.+ 14 Gani nagpanumpa sila kay Jehova sa mabaskog nga tingog, nga may paghinugyaw, kag pagpatunog sing mga trumpeta kag mga budyong. 15 Nagkasadya ang bug-os nga Juda tungod sa ila ginpanumpa, kay nagpanumpa sila sing bug-os tagipusuon kag ginpangita gid nila sia kag gintugutan niya sila nga makita sia,+ kag padayon sila nga ginhatagan ni Jehova sing kalinong sa tanan nila nga kaaway sa palibot.+

16 Ginpahalin ni Hari Asa sa pagkarayna* bisan gani ang iya lola nga si Maaca,+ bangod naghimo sia sing makangilil-ad nga diosdios para sa pagsimba sa sagrado nga poste.*+ Gin-utod ni Asa ang makangilil-ad nga diosdios ni Maaca kag ginbukbok ini kag ginsunog sa Nalupyakan sang Kidron.+ 17 Apang wala ginkuha ang sagrado nga mataas nga mga duog+ sa Israel.+ Pero bug-os ang* tagipusuon ni Asa sa bug-os niya nga kabuhi.*+ 18 Gindala niya sa balay sang matuod nga Dios ang mga pilak, mga bulawan, kag ang lainlain nga mga kagamitan nga ginpakabalaan nila sang iya amay.+ 19 Wala sing inaway tubtob sa ika-35 nga tuig sang paghari ni Asa.+