Numeros

17 Nagsiling si Jehova kay Moises: 2 “Hambala ang mga Israelinhon kag magkuha ka sa ila sing isa ka sungkod para sa kada panimalay, halin sa pangulo sang tagsa ka panimalay,+ 12 ka sungkod tanan. Isulat mo ang ngalan sang kada isa sa iya sungkod. 3 Isulat mo ang ngalan ni Aaron sa sungkod ni Levi, bangod may isa lang ka sungkod para sa ulo sang tagsa ka panimalay. 4 Ibutang mo ang mga sungkod sa tolda nga tilipunan* sa atubangan sang kaban sang katipan,*+ diin nagapakita ako sa inyo.+ 5 Ang sungkod sang tawo nga akon pilion+ magapanalingsing, kag pauntaton ko ang pagkumod sang mga Israelinhon batok sa akon,+ nga ginakumod man nila batok sa inyo.”+

6 Gani ginsilingan ni Moises ang mga Israelinhon, kag ang tanan nila nga pangulo naghatag sa iya sing 12 ka sungkod, isa ka sungkod para sa tagsa ka pangulo sang panimalay. Nalakip man sa ila mga sungkod ang sungkod ni Aaron. 7 Dayon ginbutang ni Moises ang mga sungkod sa atubangan ni Jehova sa tolda sang kaban sang katipan.*

8 Pagkadason nga adlaw, sang nagkadto si Moises sa tolda sang kaban sang katipan,* nakita niya nga nagpanalingsing ang sungkod ni Aaron para sa panimalay ni Levi kag nagpamukol ini kag nagpamulak kag nagpamunga sing luto nga mga almendra. 9 Dayon gindala ni Moises sa gua halin sa atubangan ni Jehova ang tanan nga sungkod kag ginpakita ini sa tanan nga katawhan sang Israel. Gintan-aw nila ini, kag ginkuha sang tagsa ka lalaki ang iya sungkod.

10 Dayon nagsiling si Jehova kay Moises: “Ibalik ang sungkod ni Aaron+ sa atubangan sang kaban sang katipan* kag tipigan ini bilang tanda+ para sa mga anak sang pagrebelde,+ agod mag-untat na sila sa pagkumod batok sa akon kag agod indi sila mapatay.” 11 Ginhimo dayon ni Moises ang ginsugo ni Jehova sa iya. Amo gid ini ang ginhimo niya.

12 Dayon nagsiling ang mga Israelinhon kay Moises: “Mapatay na kami, mapapas gid kami, mapapas kami tanan! 13 Ang bisan sin-o nga magpalapit sa tabernakulo ni Jehova mapatay!+ Mapatay bala kami tanan?”+