Salmo

83 O Dios ko, indi ka maghipos lang;+

O Dios ko, indi ka magpakalinong* ukon magpahimunong lang.

 2 Kay ang imo mga kaaway nagaginual;+

Ang mga nagadumot sa imo nagapahambog.*

 3 Nagaplano sila sing tago batok sa imo katawhan;

Nagahimbon sila batok sa mga tawo nga imo ginaamligan.

 4 Nagsiling sila: “Kari kamo, laglagon naton ang pungsod sang Israel,+

Agod malimtan na sila tubtob san-o.”

 5 Naghilisugot sila sa ila malain nga plano;*

Naghimbon sila* batok sa imo+—

 6 Ang mga tolda sang Edom kag sang mga Ismaelnon, ang Moab+ kag ang mga Hagarnon,+

 7 Ang Gebal kag ang Ammon+ kag ang Amalek,

Ang Filistia+ kag ang mga pumuluyo sang Tiro.+

 8 Nagbuylog man sa ila ang Asiria;+

Ginbuligan nila ang* mga anak ni Lot.+ (Selah)

 9 Himua sa ila ang ginhimo mo sa Midian,+

Kaangay sang ginhimo mo kay Sisera kag kay Jabin sa sapa* sang Kison.+

10 Ginlaglag sila sa En-dor;+

Nangin kaangay sila sang ipot sa duta.

11 Himua ang ila mga dungganon nga kaangay kay Oreb kag kay Zeeb+

Kag ang ila mga prinsipe* nga kaangay kay Zeba kag kay Zalmuna,+

12 Kay nagsiling sila: “Agawon naton ang duta nga ginapuy-an sang Dios.”

13 O Dios ko, himua sila nga kaangay sang ginabalulon nga hilamon,+

Kaangay sang dagami nga ginapalid sang hangin.

14 Kaangay sang kalayo nga nagasunog sang kagulangan,

Kaangay sang dabdab nga nagasunog sang kabukiran,+

15 Kabay nga lagson mo sila sang imo unos+

Kag pahadlukon mo sila sang imo bagyo.+

16 Tabuni* sing kahuy-anan ang ila nawong,

Agod pangitaon nila ang imo ngalan, O Jehova.

17 Kabay nga mahuy-an sila kag mahadlok sa wala sing katapusan;

Kabay nga mahuy-an sila kag malaglag;

18 Kabay nga mahibaluan sang mga tawo nga ikaw, nga ang ngalan amo si Jehova,+

Ikaw lamang ang Labing Mataas sa bug-os nga duta.+