Pag-apresyar sa Diosnon nga mga Ginikanan

Ang mga ginikanan nga nagapangabudlay sing lakas sa pagpadaku sa ila mga anak nga mangin responsable kag mahinadlukon sa Dios nga mga adulto nagakalipay kon ang ila mga panikasog madinalag-on. Sila man nahamuot gid kon ang ila mga anak nagapabutyag sing apresasyon sa sinang maayong pagpadaku.

Ang masunod amo ang isa ka sulat nga ginpadala sang isa ka anak nga lalaki kag sang iya asawa, sa tapos sang ila kasal, sa iya mga ginikanan:

“Mahal nga Dad kag Mom:

“Sa diin kami masugod? Masugod kami sa pagsiling kon daw ano ka daku nga gin-apresyar namon ang inyo gugma, suporta, kag kaalwan sa adlaw sang amon kasal. Isa gid yadto ka pinasahi nga adlaw, kag ang inyo presensia hamili. Dugang pa, subong bala nga kulang pa yadto, ginbuligan ninyo kami nga mangin makililipay ang amon dugos-bulan. Ang tanan nga nasambit sa ibabaw isa ka dugang pa nga pamatuod kon daw ano kamo ka tumalagsahon, mahigugmaon, rasonable, kag maluyagon sa kalipay nga mga ginikanan karon kag halin sang una!

“Nahunahuna na bala ninyo kon ngaa nakapabilin ako sa matadlong kag makitid nga dalan? Bangod, luwas sa akon gugma kay Jehova nga Dios, may daku ako nga pagtahod sa inyo nga duha halin sang una. Ining pagtahod tuman gid kabaskog nga upod ang inyo pagdisiplina, nagtiklod ini sa akon nga maghunahuna anay sing serioso kon nagahimo ako sing mga butang kag nagahimo sing mga desisyon. Ang daku nga kabangdanan sang kadalag-an sang akon kabuhi sa paghimo sang kabubut-on sang Dios amo ang inyo wala nagabag-o nga gugma kag pagdisiplina sa akon kag ang inyo wala nagaugdaw nga debosyon kay Jehova kag sa iya organisasyon.

“Kon kuhaon ko ang tanan nga memorya sang akon pagkabata nahanungod sa inyo nga duha kag tingubon sila, magasiling sila nga bisan pa indi ko madumduman ang tanan nga ginhambal ninyo, madumduman ko ang inyo talalupangdon nga paggawi, labi na ang inyo gugma para sa iban kag para kay Jehova.

“Ginahigugma gid namon kamo.

“Ang inyo anak kag umagad,

“L. kag W.”