Kon Madula Na ang Tanan nga Sablag sa Lawas

ANG isa ka paralitika nagsiling anay nga ang kalabanan nga tawo “temporaryo [lamang] nga mapagros.” Daw ano ka matuod ini, kay sa indi madugay, nagalutaw ang mga depekto sa lawas naton tanan! Sa amo, nagatin-ad ang negosyo sa mga antipara, contact lens, pustiso, hearing aid, electronic pacemaker, kag pagpatakod sing artipisyal nga tuhod. Subong ginasiling sang Roma 8:22, “ang bug-os nga tinuga padayon nga nagaugayong sing tingob kag ginasakitan sing tingob tubtob karon.”

Busa, kita tanan mahimo malugpayan sang saad sang Dios nga ipasag-uli ang matinumanon nga mga tawo sa himpit nga kapagros sang lawas sa isa ka matarong nga “bag-ong duta.” (2 Pedro 3:13; Bugna 21:3, 4) Ang Isaias 35:5, 6 nagasiling: “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. . . . Ang piang magalumpat subong sang usa, kag ang dila sang apa magaamba sa kalipay.”

Ginatagna sang Biblia nga ang “dakung kadam-an” makalampuwas sa kalaglagan sining malaut nga sistema karon. (Bugna 7:9, 14; Salmo 37:10, 11, 29) Indi maduhaduhaan nga pagligad gid sina nga kalaglagan, maeksperiensiahan sang mga tawo nga may malala nga mga sablag sa lawas kag mga problema sa panglawason ang hinali nga pag-ayo sang ila ginabatyag! (Isaias 33:24) Subong isa ka laragway sang pagpang-ayo nga mahanabo sa bag-o nga duta sang Dios, naghimo si Jesus sing kaanggid nga pagpang-ayo sang yari sia sa duta. (Ipaanggid ang Marcos 5:25-29; 7:33-35.) Indi mahanduraw sang isa ang kakunyag nga batyagon sang mga tawo kag ang mga luha sang kalipay nga magatulo samtang ginahaboy sang mga kumpol ang ila mga prosthesis, mga saklay, kag mga wheelchair! Bangod mapagros na ang ila lawas, makabulig na sila sa ginapahimo sang Dios nga himuon ang duta nga mangin isa ka paraiso nga puluy-an.—Lucas 23:43.

Samtang wala pa ini, dapat antuson sang mga tawo nga may sablag sa lawas karon ang ila mga limitasyon. Si Nelson, taga-Canada nga may sablag sa lawas, nagsiling: “Kon maluoy na gani ako sa akon kaugalingon, ginadumdom ko dayon ang ginsiling ni Jesus sa Mateo 24:13: ‘Sia nga nakabatas tubtob sa katapusan amo sia ang maluwas.’” Walay sapayan sang ila mga limitasyon, mahimo nga ang mga tawo nga may sablag sa lawas mangin kompleto kag mapuslanon sa labing importante nga paagi—sa espirituwal—paagi sa pagbatas sa Cristianong pagtuo.—Santiago 1:3, 4.

Minilyon ang nabuligan sang mga Saksi ni Jehova sa pagbaton sini nga pagtuo. Si Dell, isa ka tawo nga may sablag sa lawas nga ginbalikwat sa nagligad nga artikulo, nagsiling: “Daw indi ko mapabutyag ang akon ginabatyag sang mabatian ko nga ang problema sa lawas subong sang akon problema temporaryo lamang gali.” Huo, bangod sang inspirasyon sini nga paglaum, si Dell—kag ang madamo pa nga kaangay niya—indi gid matawag nga inutil.

[Laragway sa pahina 10]

Ang mga makalampuwas sa nagapakari nga kalaglagan milagruso nga ayuhon sa ila mga balatian