Sulat Halin sa Nagadumala nga Hubon

Palangga nga masigkatumuluo:

Subong sang nahibaluan mo na, ang Biblia masami nagasaysay tuhoy sa kabuhi sang mga tawo. Madamo sa ila ang matutom nga mga lalaki kag mga babayi nga nag-atubang sang mga hangkat nga pareho sang aton. May yara sila “balatyagon kaangay sa aton.” (Santiago 5:17) Ang pila nabug-atan sang mga problema kag kabalaka. Ang pila sa ila nasaklaw sing tuman sang miembro sang ila pamilya ukon mga masigkasumilimba. Kag ang iban natublag sang ila mga sala.

Ginbayaan na gid bala nila si Jehova? Wala. Madamo ang kaangay sa salmista nga nangamuyo: “Nagtalang ako kaangay sang nadula nga karnero. Pangitaa ang imo alagad, kay wala ko ginakalimtan ang imo mga sugo.” (Salmo 119:176) Amo man bala sina ang ginabatyag mo?

Wala gid ginakalimtan ni Jehova ang iya mga sumilimba nga napahilayo sa toril. Sa baylo, ginabuligan niya sila—sa masami paagi sa ila mga masigkatumuluo. Binagbinaga ang halimbawa kon paano ginbuligan ni Jehova ang iya alagad nga si Job, nga nakaatubang sing sunodsunod nga kabudlayan—lakip ang pagpamigado, kamatayon sang mga hinigugma, kag malubha nga balatian. Ginbatas man ni Job ang masakit nga ginpanghambal sang mga magapalig-on kuntani sa iya. Apang wala gid sia magtalikod kay Jehova, bisan pa nga sa pila ka tion naghunahuna sia sing indi husto. (Job 1:22; 2:10) Paano ginbuligan ni Jehova si Job nga mangin balanse liwat?

Isa ka paagi nga ginbuligan ni Jehova si Job amo ang pagpadala sa iya masigkatumuluo nga si Elihu. Sang ginpabutyag ni Job ang iya mga kabalaka, nagpamati si Elihu kag napahulag nga maghambal. Ano ang iya ihambal? Tamayon bala niya si Job ukon pakonsiensiahon? Gintamod bala ni Elihu nga superyor sia sangsa kay Job? Wala gid! Napahulag sang espiritu sang Dios, nagsiling si Elihu: “Kaangay ako sa imo sa mata sang matuod nga Dios; ginhimo man ako halin sa daga.” Dayon ginpasalig niya si Job: “Indi ka dapat mahadlok sa akon, kag indi mangin pabug-at sa imo ang akon isiling.” (Job 33:6, 7) Sa baylo nga pabug-atan sing dugang si Job, naghatag si Elihu sang mahigugmaon nga laygay kag pagpalig-on nga ginakinahanglan ni Job.

Palihug dumduma nga amo man sini ang amon panimuot sang ginahanda namon ini nga brosyur. Una nagpamati kami, mahalungon namon nga ginhangop ang mga kahimtangan kag balatyagon sang madamo nga napahilayo. (Hulubaton 18:13) Dayon ginbinagbinag namon ang Kasulatan, mapinangamuyuon nga gin-usisa ang mga rekord kon paano ginbuligan ni Jehova ang iya mga alagad sadto sang nag-atubang sila sang pareho nga mga kahimtangan. Pagkatapos sini, gintingob namon ining mga rekord sa Kasulatan sa modernong adlaw nga mga eksperiensia agod mabalhag ini nga brosyur. Ginaagda gid namon ikaw nga usisaon ini nga brosyur. Makasalig ka gid nga sinsero ang amon gugma sa imo.

Nagadumala nga Hubon sang mga Saksi ni Jehova