Ang Ginharian nga Wala sing Katapusan

Isa ka gab-i, may makatilingala nga damgo si Hari Nabocodonosor. Ginapamensar niya ini amo nga indi sia makatulog. Ginpatawag niya ang iya mga madyikero kag ginsilingan sila: ‘Ipaathag ninyo sa akon ang akon damgo.’ Nagsiling sila: ‘Isugid sa amon ang imo damgo, O hari.’ Pero si Nabocodonosor nagsiling sa ila: ‘Indi! Isugid ninyo sa akon ang akon damgo, kay kon indi, patyon ko kamo.’ Sa liwat, nagsiling sila sa iya: ‘Isugid sa amon ang imo damgo, para mapaathag namon ini sa imo.’ Nagsiling sia: ‘Ginainto lang ninyo ako. Isugid ninyo sa akon ang akon damgo!’ Nagsiling sila sa hari: ‘Wala gid sing tawo nga makahimo sina. Imposible gid ina.’

Naakig gid si Nabocodonosor, gani ginsugo niya nga patyon ang tanan nga maalam nga lalaki sa pungsod. Nalakip sa ila amo si Daniel, si Sadrac, si Mesac, kag si Abednego. Nangayo si Daniel sa hari sing dugang nga tion. Dayon nangamuyo sia kag ang iya mga abyan kay Jehova nga buligan niya sila. Ano ang ginhimo ni Jehova?

Paagi sa palanan-awon, ginpakita ni Jehova kay Daniel ang damgo ni Nabocodonosor kag kon ano ang buot silingon sini. Pagkasunod nga adlaw, nagkadto si Daniel sa alagad sang hari kag nagsiling: ‘Indi pagpatya ang maalam nga mga lalaki. Mapaathag ko ang damgo sang hari.’ Gindala sang alagad si Daniel kay Nabocodonosor. Si Daniel nagsiling sa hari: ‘Ginpahibalo sang Dios sa imo ang matabo sa palaabuton. Amo ini ang imo damgo: Nakita mo ang daku nga estatwa nga ang ulo bulawan, ang dughan kag butkon pilak, ang tiyan kag mga paa saway, ang mga batiis salsalon, kag ang mga tiil sini salsalon nga nasamuan sing daga. Dayon, may isa ka bato nga natiphag sa bukid, kag gin-igo sini ang mga tiil sang estatwa. Napudpod ang estatwa kag ginpalid ini sang hangin. Ang bato nangin daku nga bukid nga nagtabon sa bilog nga duta.’

Nagsiling dayon si Daniel: ‘Amo ini ang buot silingon sang imo damgo: Ang imo ginharian amo ang ulo nga bulawan. Ang pilak amo ang ginharian nga magabulos sa imo. Dayon may ginharian nga pareho sa saway nga magagahom sa bilog nga duta. Ang masunod nga ginharian mangin pareho kabakod sa salsalon. Dayon, may nabahinbahin nga ginharian, ang iban nga bahin pareho kabakod sa salsalon kag ang iban nga bahin pareho kaluya sa daga. Ang bato nga nangin bukid amo ang Ginharian sang Dios. Amo ini ang magadugmok sining tanan nga ginharian, kag magapabilin ini asta sa wala sing katapusan.’

Naghapa si Nabocodonosor sa atubangan ni Daniel kag nagsiling: ‘Ang imo Dios amo ang nagpahayag sini nga damgo sa imo. Wala sang Dios nga pareho sa iya.’ Imbes nga patyon si Daniel, ginhimo sia ni Nabocodonosor nga pangulo sang tanan nga maalam nga lalaki kag nangin manugdumala sia sang bilog nga probinsia sang Babilonia. Nakita mo bala kon paano ginsabat ni Jehova ang pangamuyo ni Daniel?