“Magapakig-away Sila sa Imo, Apang Indi Sila Makadaug sa Imo”

ANG Soberanong Ginuong Jehova nagsiling sa pamatan-on nga si Jeremias nga Iya himuon sia nga “isa ka siudad nga napamakuran kag haligi nga salsalon kag mga kuta nga saway” batok sa bisan sin-o nga magtinguha sa paglaglag sa iya. Sa modernong mga tion, kita subong mga Saksi ni Jehova may yara man sina nga pasalig gikan sa aton Dios. Huo, sa idalom sang impluwensia ni Satanas, ‘magapakig-away sila sa aton,’ apang indi sila makadaug. “Kay ‘ako nagaupod sa imo,’ siling ni Jehova, ‘sa pagluwas sa imo.’”—Jeremias 1:18, 19.

Sa nabaw-ing nga mga minuro sang Sol­o­mon Is­lands, ang mga dumuluong nagasulod nga may peligro sa ila kabuhi, labi na kon nagadala sila sing bag-o nga relihion. Amo sina ang naeksperiensiahan sang duha ka espesyal nga payunir sang mga Saksi ni Jehova. Ang mabangis sing hitsura nga mga taga-minuro naghana sa ila sing mga pana kag bangkaw. Ginmandoan sila nga paluparon ini! Samtang nagabudlay ang kahimtangan, ang isa ka tigulang nga lalaki hinali nga nagpasilabot, nga nagasiling: “Mga bisita ko sila. Indi sila paghaliti.” Nangluya ang mga taga-minuro samtang ginadapit niya sila sa iya balay. Nakabati ini nga tawo tuhoy sa mga Saksi; karon nagkuha sing libro nga Mahimu Ka Mabuhi sing Dayon sa Paraiso sa Duta, kag nasugdan ang pagtuon sa Biblia. Sa gilayon naglakbay sia padulong sa mga miting. Sa karon ang mga utod makapanaksi na sing hilway sa sadto nga duog, bangod sang una nga pagluwas ni Jehova.

Ang kaluwasan masami nga maeksperiensiahan sa tapos magpakilala nga ikaw isa sang mga Saksi ni Jehova. Bangod sang pamalaybalay nga pagbantala, kilala sang mga tawo ang mga Saksi kag kon ano ang ila tindog sa mga hulusayon karon. Sa isa ka diutay nga minuro sa Peru, nagsumbong ang mga terorista nga ginluiban sila sang mga taga-minuro. Ginpanipon nila ang mga lalaki sang banwa kag ginpalinya sila agod luthangon. (Sa kaanggid nga mga kahimtangan ang bug-os nga mga minuro ginlaglag.) Apang sa sini nga punto, nakilal-an sang isa sang mga terorista ang isa ka utod kag nagsiling sa mga manugpatay: “Ina nga tawo indi nila kaupod. Kilala ko sia nga isa ka Saksi ni Jehova, kag wala sila nagapasilabot sa politika.” Ginbuhian ang utod. Sa pagkamatuod, ginaamligan ni Jehova ang iya!

Ang isla nga teritoryo sang Cipre nagareport nga ang Griegong Ortodokso nga Iglesia aktibo gid sa pagtinguha nga pahuyangon ang hilikuton sang mga Saksi ni Jehova. Ang iglesia nagapanagtag sing mga pampleta nga nagasumbong sa mga Saksi sing madamo nga butang kag nagapaluya sa mga tawo sa pagpakighambal sa mga Saksi. Ang iban nga mga teologo nag-organisar pa gani sang ila kaugalingon sa pagduaw sa mga tawo nga nagatuon sa mga Saksi ni Jehova, sa pagtinguha nga paluyahon sila. Ang kasubong sini amo ang natabo sa Pa­phos, nga sa diin si Pablo kag si Bernabe naglandas isa ka bes sang kaanggid nga pagpamatok. (Binuhatan 13:6-12) Ang isa ka pari nga teologo nagtinguha sa pagkombinse sa tatlo ka magkatuhay nga tawo nga mag-untat sa pag-usisa sang Biblia upod sa mga Saksi ni Jehova. Sila, sa baylo kag sing isa-isa, naghimos nga ang isa ka utod magbuylog sa ila paghambalanay upod sa sining teologo. Subong resulta, sila nga tatlo aktibo karon nga nagapakig-upod sa mga Saksi. Ang pari nagkomento, ‘Indi na ako liwat magpakighambal sa mga Saksi ni Jehova.’

Sobra gid ang ginhimo sang iban nga mga pari tubtob sa pagsakit sa mga Saksi samtang nagapamalaybalay sila sa isa sang mga minuro. Sing makatilingala, pagligad sang pila ka adlaw, ginhampak sang buhawi ang minuro, kag nagkalaguba ang mga atop sang madamo nga balay. Ang iban nga mga taga-minuro nagkomento: ‘Silot ini sang Dios bangod sang ginhimo sang mga pari sa mga Saksi ni Jehova.’ Sa sini nga minuro, ang bunayag sing tagipusuon nga mga tawo nagabaton gihapon sa aton kauturan sa ila mga balay. Sa isa ka hitabo, samtang ginapresentar sang isa ka utod ang bag-o nga mga magasin sa isa ka interesado nga tawo, ang isa sang mga pari nga nagsakit sa mga utod nataboan nga naglabay kag ginsingganan ang utod nga pabay-an ang ‘iya panong.’ Ang interesado nga tawo nagsiling sa pari, ‘May edad na ako sa paghibalo kon ano ang akon ginahimo.’ Gani wala magdaug ang mga klero batok sa mga Saksi ni Jehova; ang ila mga panikasog nagbalandra sa ila, kag dugang pa nga mga tawo ang nagadampig kay Jehova.

Sa isa ka may inaway nga pungsod sa Sentral nga Aprika, ang isa ka manugtatap sa sirkito ginpadulog agod usisaon sang mga soldado subong amo ang kinaandan nga ginahimo. May ginsambit sa sulat nga dala niya nga wala nila maluyagi kag gani gindala nila sia sa ulong-talatapan sang polisiya, nga sa diin ginlatigo sia kag ginpaantos sang tatlo ka soldado. Bisan pa wala sing panumbungon batok sa iya kag wala sing kasaba nga ginhimo, ginbilanggo sia sing isa ka tuig. Sa sulod sang anum ka bulan ginlupot sia sa isa ka gutok nga selda upod sa 40 pa ka bilanggo. Bangod sang makitid nga ilistaran, nagabulosbulos sila sa pagtulog, tatlo ka oras sa kada tion. Sa nabilin nga tion, nagatindog sila. Samtang didto ang aton utod, 137 ka soldado ang napatay, kag sia ang ginhatagan sing trabaho sa pagsulod sang ila mga bangkay sa mga sako agod ilubong.

Gintipigan sining manugtatap sa sirkito ang iya espirituwal nga kusog paagi sa paghinguyang sang daku nga tion sa pagpanaksi sa mga masigkabilanggo. Ang iya mga report nagapakita sing kapin sa 30 ka oras kada bulan nga ginhinguyang sa pagbantala; nagdumala sia sing apat ka pagtuon sa Biblia samtang sa bilanggoan. Ang isa sang iya mga estudyante nagsugod na gani sa pagpanaksi sa iban. Sa bug-os nga pagtilaw sa iya, gin-atipan ni Jehova ini nga utod, nga nagahatag sini nga laygay sa iban: “Kon yara sa bilanggoan, itugyan lamang ang tanan nga butang sa mga kamut ni Jehova. Maghulat sa iya. Magsalig sa iya. Indi magkabalaka sing tuman. Magmatutom.”

Sa isa ka duog sa Zimbabwe, ang mga anak sang mga Saksi ni Jehova ginpauntat sa pag-eskwela bangod sang indi pagpakigbahin sa politika. Wala pa maayawi sa sini, ginsunog sang lokal nga mga gang ang mga balay sang mga ginikanan kag ginlaglag ang ila mga tanum. Ang Saksi nga mga pamilya napilitan sa pagpalagyo tungod sa ila kabuhi, kag ginbiyaan nila ang ila mga baka kag ang iban pa nga mga pagkabutang. Apang, ining natabo gindala sa mataas pa nga awtoridad sang pangulohan nga maluluy-on nga naghimos sang pagbalik sang mga pamilya sa ila mga balay. Ang ila mga baka ginbalik, kag ang pangulohan naghimo sing mga tikang agod ulian ang nadula sa mga utod. Nagaapresyar gid ang mga Saksi ni Jehova kon ang “superyor nga mga awtoridad” nagapakita sang ila kaugalingon subong ‘mga ministro sang Dios para sa kaayohan.’ (Roma 13:1-4) Paagi sa sining tanan, maayo nga panaksi ang nahatag, kag ang lokal nga mga tawo nagapakita na karon sing daku nga interes sa mensahe sang Ginharian. Subong ginsiling sang isa sang mga utod, ‘Nahibaloan namon nga sarang mapahanabo ni Jehova nga ang subong sina nga mga kahimtangan mangin panaksi sa iya ngalan.’

Ang nagligad nga tuig sang pag-alagad nakasaksi sang pagpakamaayo ni Jehova sa hilikuton sa Malawi. Ang mga Saksi ginagamo lamang sa mga duog nga sa diin ang lokal nga mga taga-minuro nagadumot sa mga Saksi. Ang masunod nga report nagapamatuod sa sini: “Sa madamo nga bahin sang latagon, ang kahimtangan malinong. Apang sa isa ka kongregasyon duha ka Saksi nga pamilya ang gingamo sang mga liga sang mga pamatan-on. Ang ulo sang isa sining mga pamilya ginsakit sing tama tubtob nga nalipong sia sing apat ka oras. Sa tapos sadto, gindala sia sa estasyon sang polisiya, nga sa diin ang polis nga nagabantay sadto nagpadayon sa pagsakit sa iya kag sa iban pa nga gindala kaupod niya. Apang, sang ulihi, nagbulos ang lain naman nga polis. Ining isa maluluy-on. Ginbuhian niya ang mga utod kag ginpapuli sila, kag ginpasalamatan nila si Jehova bangod sining wala paabota nga pagkaluwas. Sang ulihi nasapwan nga ang kabangdanan sining hitabo amo ang personal nga dumot sang suod nga mga paryente. Ang nagtambong sa amon Memoryal sini nga tuig makapalig-on. Ang nagtambong 23,476. Nagapakita ini nga may yara pa tulad-karnero nga mga tawo nga dapat buligan agod mangin mga disipulo ni Jesucristo diri sa Malawi.”

Ang isa ka pungsod sa Nasidlangan nga Europa nagpadala sining mensahe sang pag-apresyar: “Nagapasalamat kami sa amon suod nga pagpakig-angot sa Nagadumala nga Hubon paagi sa tanan nga alagyan sang dutan-on nga organisasyon ni Jehova. Paagi sa sini, ginatugutan kita nga makita kon paano ginatipon sang aton langitnon nga Amay, paagi sa iya Anak kag sa tanan nga anghel, ang iya mga karnero karon, kag kon paano kita makaamot sing diutay nga bahin sa sini. Daw ano nga pribilehiyo ini! Ginpakamaayo sang aton Amay ang amon mga panikasog sing mga pag-uswag. Ang resulta sining pagpakamaayo amo nga kapin nga tion ang nahinguyang sa latagon, kapin nga aux­il­iary payunir ang makugi nga nagabantala sing maayong balita, kag pinakamadamo nga libro ang napahulam ukon napahamtang sa latagon.”

Ang modernong-adlaw nga budyong sang Paghinugyaw nagtunog sing mabaskog kag maathag. Ang nauna nga report nagapakita kon paano ginasabat sang mga Saksi ni Jehova sa tanan nga bahin sang duta ina nga panawag.