Kon sa Diin Naghalin ang Yawa

“Ang akon lamang katungdanan amo ang pagpat-od nga ang paha sang mga bata natakod kag pahipuson sila,” paathag sang isa ka hoben pa nga babayi nga nagatrabaho sing taguri subong kabulig sa isa ka ­school bus sa ­South Dakota. Sia nag-asoy:

“Binudlayan gid ako sa isa sang mga bata nga lalaki. Abi mo, seis anyos lamang sia, apang bisan ang marinero mahuya sa iya baba. Kinahanglan pa nga papungkuon ko sia sa iya pulungkuan kag maglingkod ako nga ang akon kamot nagatabon sang iya baba agod maghipos sia. Nagapanipa sia, nagapangaros, nagapangusi, nagapamuyayaw, kag nagasinggit. Sa isa ka malain nga adlaw, kinahanglan nga pungkuan ko sia agod nga magpabilin sia sa iya pulungkuan.

“Sang Biernes isa gid ka malain nga adlaw, kag sang halos nagapalaminhod na ako halin sa abaga paubos, namangkot sia: ‘Ngaa ginhimo sang Dios ang Yawa?’ May kopya sang Ang Akon Libro sang mga Sugilanon sa Biblia sa bus. Ginsingganan ko sia nga ining libro makabulig sa iya sa paghibalo kon sa diin naghalin ang Yawa. Mapati bala kamo nga natapos na namon ang 41 ka sugilanon? Buot na ako mag-ampo sa sining bata, apang ang iya panimuot nagbalhin tubtob sa punto nga indi niya luyag manaug sa bus tubtob wala pa kami sa eskwelahan. Luyag niya hibaluon ang dugang pa nga mga sugilanon!”

Ang pagtuon sa sining talalupangdon nga publikasyon nakapatubas sing kaanggid nga mga resulta sa madamo pa nga mga pamatan-on. Mahimo ka makabaton sing kopya sining matahom sing ilustrasyon, daku sing letra, 256 sing pahina nga publikasyon paagi sa pagsulat kag pagpadala sang kaupod nga kupon upod ang ₱42.

Palihog ipadala, nga nabayaran na ang selyo, ang nahapinan sing matig-a nga libro nga Ang Akon Libro sang mga Sugilanon sa Biblia, nga para sa sini naglakip ako sing ₱42.