Ang Akon Kaakig Ukon ang Akon Ikaayong-lawas?

SIN-O ang wala nagakaakig? Nagakatabo ini sa aton tanan. Kon kaisa ang kaakig makatarunganon. Apang, sing tampad, indi bala matuod nga sa masami ang aton kaakig (ukon ang kadakuon sini) dimakatarunganon?

Ang Biblia nagasiling sa aton: “Untati ang kaakig kag bayai ang kasingkal; dili ka magkaakig, ini nagapadulong lamang sa malaut nga buhat.” (Salmo 37:⁠8) Daw ano ka maalamon ina nga laygay? Makaapektar bala ini sa imo malawig nga ikaayong-lawas?

Sa seksion nga “Health,” ang New York Times nagsiling:

“Ang mga tawo nga masunson nagasilabo sa kasingkal ukon nagapangakig sa magagmay nga mga butang wala lamang nagahimo sing dimaayo sa ila kaugalingon. Mahimo nila ginapatay ang ila kaugalingon.

“Ang mga mananalawsaw nakatipon sing madamo nga impormasyon nga nagapanugda sining ulihi lang nga ang pirme nga pagpangakig makahalalit gid sa lawas nga maklase ini upod sa, ukon labaw pa sa, pagpanigarilyo, sobra nga katambukon kag madamo sing tambok nga pagkaon subong makusog nga rason sang maaga nga kamatayon.

“ ‘Ginapakita sang amon mga pagtuon nga ang mabaison, suspetsuso nga kaakig katumbas sa iban pa nga katalagman sa ikaayong-lawas nga nahibaluan namon,’ siling ni Dr. Redford Wil­liams, isa ka mananalawsaw sang be­hav­ioral medicine sa Duke University Medical Center.”

Ginapakita sang mga pagtuon nga yadtong sobra ang reaksion sa mga problema nga kinaandan sa adlaw-adlaw nga pagkabuhi nagapatubas sing mas madamo nga stress hor­mones. Ang ila masunson nga pagsingkal nagatuga sing pagkaditimbang sa ulot sang maamligon kag makahalalit nga mga dagway sang kolesterol, nagabutang sa ila sa katalagman nga magbalatian sa tagipusuon kag sa mga alagyan sang dugo.

Ang iban mahimo magasabat, ‘Apang amo gid ako sina’ ukon ‘Amo ina ang gindak-an ko.’ Walay sapayan, wala ina nagakahulugan nga indi ka mahimo magbag-o, paagi sa hanuot nga pagpanikasog nga iaplikar ang laygay sang Dios. Sa imo kaugalingon nga Biblia, usisaa ang iya laygay nahanungod sa kaakig kag kasingkal nga narekord sa Hulubaton 14:​29, 30; 22:​24, 25; Efeso 4:26; Santiago 1:​19, 20.

Ang pag-aplikar sinang balaan nga kaalam mahimo nga magapauswag sang imo ikaayong-lawas kag magapalawig sang imo kabuhi. Ang Times nagsiling: “Madamong mga mananalawsaw ang nagsiling nga mahimo mabuhinan sang madali maakig nga mga tawo ang katalagman sang maaga nga kamatayon paagi sa pag-ilis sang maabtik kag akig nga mga reaksion.”