Ang Tanan Bala Balaan nga Pagpahayag?

MAHIMO bala nga ang espiritu sang Dios, nga nag-inspirar sang Balaan nga Biblia, mangin responsable man sa iban pa nga mga libro nga ginakabig sang pila subong balaan? (2 Timoteo 3:16) Ini nga pamangkot ginpautwas sang isa ka Italyano nga balasahon sang mga Jesuita (La Civiltà Cattolica), nga ginbalhag “sa idalom sang pagdumala sang Secretariat of State [sang Batikano]” kag busa ginakabig nga may awtoridad sa mga Katoliko.

“Ang Dios, paagi sa pagpanghikot sang Balaan nga Espiritu, nagpalapnag sang Pulong bisan sa pila ka balaan nga mga libro sang di-Judiyo ukon di-Cristiano nga tradisyon,” siling sang Jesuita nga balasahon. Para sa mga Jesuita, ang “balaan” nga mga libro, subong sang Zoroastrian Avesta ukon ang Confucian Four Books, ginsulat “sang mga tawo nga gin-impluwensiahan sang balaan nga espiritu, kag busa, sa pila ka kasangkaron nagaunod sing ‘balaan nga pagpahayag.’ ”

Apang, ang artikulo nagapaathag. “Indi tanan nga ginaunod sinang balaan nga mga libro pulong sang Dios,” siling sini, nagadugang nga ang mga nagsulat sining mga libro mahimo nga “nakaeksperiensia sing impluwensia sang polytheistic ukon sang pilosopiko nga palibot,” diin nagkabuhi kag nagpanghikot sila. Suno kay Marco Politi, manunulat sang mga kahimusan sang Batikano para sa Italyano nga pamantalaan nga La Repubblica, ining panindugan “nagabukas sang anay dimahunahuna nga mga posibilidad sa mga kaangtanan sa ulot sang Iglesia Katolika kag sang madamong maragtason nga mga relihion,” nagabalik sa espiritu sang nanuhaytuhay nga pagsinamo sing mga pagtuluuhan sa mga prayer meeting kaangay sadtong ginhiwat sa Assisi sang 1986, nga ginsakdag sing mapagsik ni Juan Paulo II.

Si Jehova indi isa ka Dios sang kagamo kag kagumon. (1 Corinto 14:33) Gani indi kita makahinakop sing makatarunganon nga ang iya balaan nga espiritu, ukon aktibo nga puwersa, magainspirar bisan sing isa ka bahin sang bisan ano nga libro nga wala nagahisanto sa iya Pulong, ang Biblia. Sa baylo nga palig-unon ang ekumeniko nga mga paagi sa tunga sang lainlain nga “mga tradisyon sang relihion,” ang Cristianong si apostol Pablo nagsulat nga may “isa ka paglaum . . . , isa ka Ginuo, isa ka pagtuo, isa ka bawtismo.”​—⁠Efeso 4:​4, 5.

Inang “isa ka paglaum” nasandig sa pagtuo kay Jesucristo. Ang Biblia nagakaigo nga nagasiling: “Walay kaluwasan sa bisan kay sin-o nga iban, kay walay iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.” (Binuhatan 4:12) Wala sing iban pa nga “balaan nga libro” nga nagapresentar kay Jesus subong ang pangunang persona sa katumanan sang mga katuyuan sang Dios. Kon batunon lamang naton ang Biblia subong ang Pulong sang Dios nga makatudlo ini sa aton nahanungod sa mahigugmaon nga aman ni Jehova nga Dios para sa kaluwasan.​—⁠Juan 17:​3; 1 Tesalonica 2:⁠13.