Rasismo kag Relihion

SANG nagkari ako sa Estados Unidos sang 1978, nagpati ako nga madugay na nalubad sang Amerika ang mga problema sini sa rasa, nga ang mga itom alalangay nga mga banwahanon,” siling ni Mark Mathabane, isa ka awtor nga natawo sa Bagatnan nga Aprika, sa isa ka interbyu sang Time nga magasin. “Nasapwan ko nga matuod ini sa madamo nga paagi. Daw naunahan sang E.U. ang Bagatnan nga Aprika sing isa ka gatos ka tuig. Nian nakibot gid ako sang natukiban ko nga halos wala sing nagbag-o sa tagipusuon sang mga tawo.” Ano ang natukiban niya nga nagpakibot sa iya?

“Ang isa sang mga inoras nga may daku gid nga pagpainpain sa Amerika amo ang alas 11 s.a. kon Domingo,” siling ni Mathabane. Natalupangdan niya nga bisan sa simbahan, nagapangalag-ag ang mga tawo nga magbuylog sa pagsimba upod sa mga tawo nga tuhay sing rasa. “Ano ayhan ang ginabatyag nila tuhoy sa iban nga rasa sa iban nga inadlaw sang semana?” pamangkot niya. Nagatawag sa edukasyon subong bulig sa pagbag-o, si Mathabane nagsiling: “Paagi sa edukasyon mabaton mo ang pagkaalalangay sang mga tawo.”

Nagaugyon ang mga Saksi ni Jehova nga ang edukasyon amo ang sabat, apang ginarekomendar nila ilabi na ang edukasyon nga pasad sa Pulong sang Dios. Huo, ang Biblia nagabulig sa ila nga gub-on ang mga balagbag sang pagpasulabi sa rasa—bisan sa kadutaan nga lapnag ang dumot batok sa iban nga rasa. Kada semana sa ila mga Kingdom Hall, nagatipon sing tingob ang mga tawo nga nanuhaytuhay sing rasa kag nasyonalidad agod matudluan sing mga kasuguan kag mga prinsipio sang Pulong sang Dios, ang Biblia. Wala sing pagpangolekta nga ginahimo sa sining mga pagtinipon. Ginaabiabi ikaw nga magtambong!