Mangin Suod sa Dios

“Magapadayon ang Imo Ginharian sa Wala sing Katapusan”

2 SAMUEL 7:1-16, APD

HALIN pa sang una, madamo na sing gumalahom nga ginpahalin sa ila posisyon. Ang iban napierde sa eleksion kag may iban nga ginpahalin gid sang mga tawo. Kamusta naman si Jesucristo, ang Hari sang Ginharian sang Dios sa langit? May makapugong bala sa iya sa paggahom subong ang Hari nga gintangdo sang Dios? Ang sabat mabasa sa ginsiling ni Jehova kay Hari David sang dumaan nga Israel nga narekord sa 2 Samuel kapitulo 7.

Sa umpisa sini nga kapitulo, mabasa naton nga nagalalain gid si David. Ngaa? Kay nagaistar sia sa matahom nga palasyo, pero ang kaban sang Dios ara lang sa ordinaryo nga tolda.a Nagsiling si David nga gusto gid niya patindugan si Jehova sing matahom nga balay ukon templo. (Bersikulo 2) Pero indi sia ang magapatindog sini nga templo. Paagi kay propeta Natan, ginsilingan sia ni Jehova nga ang iya bata nga lalaki amo ang magapatindog sini.—Bersikulo 4, 5, 12, 13.

Nalipay gid si Jehova sa handum ni David. Bangod sa iya katutom, nakigkatipan ang Dios sa iya. Subong sang gintagna, may isa sa iya kaliwatan nga magahari sing walay katapusan. Ini nga promisa sang Dios ginsugid ni Natan kay David: “Magapadayon ang imo ginharian sa wala sing katapusan, kag ang imo mga kaliwat magahari hasta san-o.” (Bersikulo 16) Sin-o ang permanente nga Manunubli sini nga katipan, ang Isa nga magagahom sing walay katapusan?—Salmo 89:20, 29, 34-36.

Si Jesus nga taga-Nazaret kaliwat ni David. Sang ginpahibalo sang anghel ang pagkabun-ag ni Jesus, sia nagsiling: “Ihatag sa iya ni Jehova nga Dios ang trono ni David nga iya amay, kag magahari sia sa panimalay ni Jacob sing dayon, kag ang iya ginharian wala sing katapusan.” (Lucas 1:32, 33) Gani, ang katipan sang Dios kay David natuman kay Jesucristo. Wala si Jesus ginpili sang mga tawo. Ginhatagan sia sing kinamatarong nga maggahom sing walay katapusan bangod sa promisa sang Dios. Dumdumon naton nga ang promisa sang Dios wala gid nagakapaslawan.—Isaias 55:10, 11.

Makatuon kita sing duha ka importante nga leksion sa 2 Samuel kapitulo 7. Una, makasalig kita nga wala gid sing bisan isa nga makapugong kay Jesucristo sa paggahom. Gani, masigurado gid naton nga tumanon niya ang kabubut-on sang Dios sa duta subong sangsa langit.—Mateo 6:9, 10.

Ikaduha, ginasugid sini sa aton kon daw ano kaayo si Jehova nga Dios. Dumduma nga ginapabaloran gid ni Jehova ang handum sang tagipusuon ni David. Nagapasalig ini sa aton nga ginaapresyar ni Jehova ang aton katutom sa iya. Pero kon kaisa, indi kita makaalagad sa Dios suno gid sa aton ginahandum kay may mga kahimtangan nga indi naton makontrol pareho sang pagmasakit ukon pagtigulang. Kon amo sini ang nagakatabo sa aton, mapalig-on kita kay nahibaluan gid ni Jehova ang handum naton nga alagaron sia sing matutom.

[Nota]