Pangamuyo

3 Paano Mangamuyo?

IMPORTANTE gid sa madamo nga relihion ang posisyon, mga tinaga nga sambiton, kag ritwal kon nagapangamuyo. Pero, may mas importante pa sa sini. Sa bulig sang Biblia, usisaon naton ang pamangkot nga, “Paano kita mangamuyo?”

Mabasa sa Biblia nga ang matutom nga mga sumilimba sang Dios nangamuyo sa lainlain nga lugar kag posisyon. Nangamuyo sila sing hipos ukon matunog depende sa kahimtangan. Nangamuyo sila samtang nagatangla ukon nagaduko. Wala sila sing mga imahen, rosarito, ukon mga libreta. Wala man nila ini ginsaulo kundi nangamuyo sila sing tinagipusuon. Ngaa ginpamatian sang Dios ang ila pangamuyo?

Suno sa nagligad nga artikulo, nangamuyo sila sa isa lamang ka Dios—kay Jehova. Pero, may isa pa ka importante nga butang. Sa 1 Juan 5:14 mabasa naton: “Amo ini ang pagsalig naton sa iya, nga bisan ano ang pangayuon naton suno sa iya kabubut-on, nagapamati sia sa aton.” Gani, ang aton pangamuyo dapat suno sa kabubut-on sang Dios. Ano ang buot silingon sini?

Para mangin suno sa kabubut-on sang Dios ang aton pangamuyo, dapat kabalo kita kon ano ang iya kabubut-on. Gani, ang pagtuon sing Biblia importante gid sa aton pangamuyo. Dapat bala nga alam-alam gid kita sa Biblia para pamatian kita sang Dios? Indi, pero gusto sang Dios nga tun-an naton, hangpon, kag tumanon ang iya kabubut-on. (Mateo 7:21-23) Ang aton pangamuyo dapat nga suno sa aton natun-an.

Samtang nagatuon kita parte kay Jehova kag sa iya kabubut-on, nagabakod ang aton pagtuo, nga isa pa ka importante nga bahin sang pangamuyo. Si Jesus nagsiling: “Ang tanan nga butang nga inyo ginapangayo sa pangamuyo, nga may pagtuo, mabaton ninyo.” (Mateo 21:22) Ang pagtuo indi basta pagpati lang dayon sa isa ka butang. Kundi, nabase ini sa mabakod nga ebidensia bisan pa indi makita. (Hebreo 11:1) Ang Biblia puno sing mga ebidensia nga bisan indi naton makita si Jehova, matuod sia, masaligan, kag nagasabat sang pangamuyo sang mga nagatuo sa iya. Makapangabay man kita sing dugang nga pagtuo, kag nalipay gid si Jehova nga ihatag ang iban naton nga kinahanglan.—Lucas 17:5; Santiago 1:17.

May isa pa ka importante nga butang. Si Jesus nagsiling: “Wala sing makakadto sa Amay kon indi paagi sa akon.” (Juan 14:6) Makapalapit kita sa Amay nga si Jehova paagi kay Jesus. Gani gintudluan ni Jesus ang iya mga sumulunod nga mangamuyo sa iya ngalan. (Juan 14:13; 15:16) Indi buot silingon nga mangamuyo kita kay Jesus, kundi sa ngalan ni Jesus. Ginadumdom naton nga paagi sa iya, makapalapit kita sa aton perpekto kag balaan nga Amay.

Nangabay sadto ang mga sumulunod ni Jesus: “Ginuo, tudlui kami kon paano magpangamuyo.” (Lucas 11:1) Maathag nga may iban pa sila nga gusto mabal-an magluwas sa aton ginbinagbinag bag-o lang. Daw pareho nga nagapamangkot sila sing, ‘Ano ang amon ipangamuyo?’

[Blurb sa pahina 6]

Para pamatian ang pangamuyo, dapat suno ini sa kabubut-on sang Dios, may pagtuo, kag paagi sa ngalan ni Jesus