5 Importante Bala Kon Diin kag San-o Mangamuyo?

SIGURO naobserbahan mo nga ginapanami gid sang kalabanan nga relihion ang ila palangamuyuan kag may ginapatuman sila nga oras sa pagpangamuyo. Pero ginsiling bala sang Biblia kon diin kag kon san-o lang puede mangamuyo?

Suno sa Biblia, may mga sitwasyon nga dapat mangamuyo. Halimbawa, antes magkaon upod sa iya mga sumulunod, nangamuyo si Jesus sa Dios para magpasalamat. (Lucas 22:17) Sang nagtilipon ang mga disipulo para magsimba, nangamuyo sila. Ginapakita sini nga ginsunod nila ang kinabatasan nga ginahimo sa mga sinagoga kag sa templo sa Jerusalem. Kay man, katuyuan sang Dios nga ang templo mangin “balay nga palangamuyuan para sa tanan nga pungsod.”—Marcos 11:17.

Kon ang mga sumilimba sang Dios magtipon kag mangamuyo, ang ila pangabay mahimo pamatian. Kon nagaugyunay sila kag ang ila pangamuyo nabase sa mga prinsipio sang Biblia, malipay gid ang Dios. Bangod sa ila pangamuyo, mahimo nga himuon sang Dios ang butang nga indi niya tani paghimuon. (Hebreo 13:18, 19) Ang mga Saksi ni Jehova regular nga nagapangamuyo sa ila pagtilipon. Ginaagda ka gid nga magkadto sa Kingdom Hall nga malapit sa inyo para mapamatian mo ang ila pangamuyo.

Pero, wala ginsiling sang Biblia kon diin kag kon san-o lang puede mangamuyo. Mabasa naton sa Biblia nga may mga sumilimba sang Dios nga nagpangamuyo bisan ano oras kag bisan diin. Si Jesus nagsiling: “Kon mangamuyo ka, magsulod ka sa imo hulot kag isira ang ganhaan, kag mangamuyo sa imo Amay nga indi makita; nian ang imo Amay nga nagatan-aw sa tago magapadya sa imo.”—Mateo 6:6.

Indi bala nga makalilipay gid ini? Bisan nagaisahanon ka lang kag bisan ano oras, makapalapit ka sa Soberano sang bug-os nga uniberso, kag makasalig ka nga mamati sia. Si Jesus pirme man nagaisahanon kon mangamuyo sia! Isa ka bes, bilog nga gab-i sia nga nangamuyo sa Dios, nga nagapangayo sing bulig sa paghimo sing pinakaimportante nga desisyon.—Lucas 6:12, 13.

Mabasa man sa Biblia ang mga tawo nga nangamuyo sang may problema sila kag nagahimo sing mabudlay nga mga desisyon. Nangamuyo sila sing matunog ukon mahipos, sing isahanon ukon upod sa grupo. Ang importante amo nga nangamuyo sila. Ginasilingan pa gani sang Dios ang iya mga sumilimba: “Indi kamo mag-untat sa pagpangamuyo.” (1 Tesalonica 5:17) Mahigugmaon gid sia kay wala sia natak-an mamati sa mga tawo nga nagahimo sang iya kabubut-on.

Pero, sa sining kalibutan nga daw wala na sing masaligan, madamo ang nagaduhaduha kon praktikal pa nga mangamuyo. Siguro gapamangkot ka, ‘Makabulig gid bala ang pangamuyo?’