Mangin Suod sa Dios

“Dumduma Ako, O Dios Ko, nga sa Kaayohan”

“NAGPENSAR ako nga tungod kilala gid ako ni Jehova, imposible nga palanggaon niya ako ukon kahamut-an.” Amo sini ang ginsulat sang matutom nga Cristianong asawa nga nagabatyag nga wala sia sing pulos. Nagabatyag ka man bala sini, nga daw indi ka importante sa Dios kag wala sia nahamuot sa imo? Mahimo ka mabuligan sang ginasiling sang Nehemias 13:31.

Gintinguhaan gid ni Nehemias, nga gobernador sang mga Judiyo sang ikalima nga siglo B.C.E., nga pahamut-an ang Dios. Ginpangunahan niya ang pagpatindog liwat sang mga pader sang Jerusalem bisan pa ginbalabagan ini sang mga kaaway. Ginpatuman niya ang Kasuguan sang Dios, gin-atipan ang mga ginapigos, kag ginpabakod ang pagtuo sang pareho niya nga mga Israelinhon. Natalupangdan bala ni Jehova nga Dios ang iya maayo nga hinimuan? Nahamuot bala sia kay Nehemias? Ang sabat ara sa katapusan nga bersikulo sang tulun-an nga gin-ilog sa iya ngalan.

Nangamuyo si Nehemias: “Dumduma ako, O Dios ko, nga sa kaayohan.”a Nabalaka bala si Nehemias nga malipatan sia sang Dios kag indi matalupangdan ang iya hinimuan? Wala. Nahibal-an ni Nehemias nga ang mga manunulat sang Biblia nga nauna sa iya nagsiling nga importante kay Jehova ang iya matutom nga mga sumilimba kag ang ila maayo nga hinimuan. (Exodo 32:32, 33; Salmo 56:8) Kon amo, ano ang iya ginapangabay sa Dios? Suno sa isa ka reperensia, ang Hebreo nga termino nga gin-translate nga “dumduma” nagakahulugan sing “pagdumdom nga may kahamuot kag ang buhat nga resulta sini.” Nagatuo gid si Nehemias sa mahimo sang pangamuyo, gani nangabay sia sa Dios nga dumdumon sia nga may kahamuot kag pakamaayuhon sia.—Nehemias 2:4.

Sabton bala ni Jehova ang pangamuyo ni Nehemias? Sa isa ka paagi, nasabat na sia. Ginlakip ni Jehova sa Biblia ang pangamuyo ni Nehemias para indi ini malipatan. Gani, gindumdom gid sia ni Jehova nga may kahamuot. Pero, indi lang amo sini ang sabat sang “nagapamati sang pangamuyo” sa sinsero nga pangabay ni Nehemias.—Salmo 65:2.

Padyaan pa sia sang Dios sa tanan niya nga hinimuan para sa matuod nga pagsimba. (Hebreo 11:6) Banhawon ni Jehova si Nehemias sa matarong nga bag-ong kalibutan nga ginpromisa niya.b (2 Pedro 3:13; Bugna 21:3, 4) May paglaum sia nga mabuhi sing dayon didto, kag makita niya mismo nga nadumduman gid sia ni Jehova.

Ang pangamuyo ni Nehemias ebidensia nga matuod gid ang ginsiling ni Hari David: “Ikaw magapakamaayo sang matarung; O GINOO, likupan mo sia sing kaayohan subong nga may taming.” (Salmo 5:12) Ginatalupangod kag ginapabaloran gid sang Dios ang aton pagtinguha nga pahamut-an sia. Kon ginahimo mo ang imo bug-os nga masarangan nga alagaron sia, makasalig ka nga dumdumon ka niya nga may kahamuot kag pakamaayuhon ka niya.

Bahin sang Biblia nga mahimo basahon sa Pebrero:

◼ Nehemias 1-13

[Mga Nota]