Mapatihan Mo Bala ang mga Milagro nga Narekord sa Biblia?

KON sugiran ka sang makatilingala nga sugilanon, indi bala nga makaapektar sa imo ang kredibilidad sang tawo nga nagasugid sini kon bala patihan mo ini ukon indi? Ang iya kredibilidad makita indi lamang sa paagi sang iya pag-istorya kundi sa iya man rekord sang pagkamasaligan. Kon pirme ka niya ginasugiran sang kamatuoran kag wala sia nagabutig sa imo, makatarunganon lamang nga patihan mo ang iya ginasugid subong.

Amo man sina ang mga milagro sa Biblia. Wala sing isa sa aton nga buhi sang natabo yadto nga mga milagro. Pero puede naton mausisa kon bala masaligan ang mga sugilanon sa Biblia. Paano? Ari ang pila ka butang nga nagapamatuod sang pagkamasaligan sang mga milagro sa Biblia.

Madamo nga milagro ang ginhimo sa publiko. May mga tion nga nakita ini sang linibo ukon minilyon pa gani. (Exodo 14:21-31; 19:16-19) Wala ini ginhimo sa tago.

Simple lamang ang paagi sa paghimo sang mga milagro. Wala sing pinasahi nga mga props ukon pakitakita nga mga pagpasundayag, kag wala sing special effects. Ang kalabanan nga milagro sa Biblia natabo nga wala ginplano kag bangod lang sa pangabay sang mga tawo. (Marcos 5:25-29; Lucas 7:11-16) Amo kon ngaa nga indi ini puede dayaon sang naghimo sang milagro.

Ang motibo sang mga naghimo sang milagro indi para mangin bantog, dayawon, kag makapanguarta. Sa baylo, para himayaon sini ang Dios. (Juan 11:1-4, 15, 40) Ginapakamalaut ang bisan sin-o nga nagapanguarta paagi sa milagro.—2 Hari 5:15, 16, 20, 25-27; Binuhatan 8:18-23.

Ang nanarisari nga milagro sa Biblia nagapakita nga indi ini hinimuan sang tawo lamang. Halimbawa, ginpakalma ang dagat kag hangin, ginhimo nga alak ang tubig, ginpahulaw kag ginpabunok ang ulan, gin-ayo ang mga masakiton, kag nakakita ang mga bulag. Tanan ini kag ang iban pa nga milagro nagapakita nga may gahom nga labaw sa kinaugali sa likod sini.—1 Hari 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7.

Ang mga manugpamatok nga nakasaksi sang mga milagro wala magpanghiwala sini. Sang ginbanhaw ni Jesus ang iya abyan nga si Lazaro, wala ginduhaduhaan sang relihioso nga mga kaaway ni Jesus nga napatay ini. Ngaa? Kay apat na sia ka adlaw nga nalubong. (Juan 11:45-48; 12:9-11) Bisan pa ginatos na ka tuig sa tapos napatay si Jesus, padayon gihapon nga ginabaton sang mga manunulat sang Jewish Talmud nga may gahom si Jesus sa paghimo sang milagro. Ginduhaduhaan lamang nila ang ginhalinan sini nga gahom. Sing kaanggid, sang gindala ang mga disipulo ni Jesus sa atubangan sang korte sang Judiyo, wala sila ginpamangkot, “Naghimo bala kamo sing milagro?” Kundi ginpamangkot sila: “Sa ano nga gahom ukon kay sin-o ngalan ginhimo ninyo ini?”—Binuhatan 4:1-13.

Gani mapatihan bala naton ang ginasugid sang Biblia parte sa mga milagro? Base sa ginbinagbinag naton bag-o lang, maathag nga masaligan ang mga sugilanon sa sini. May iban pa nga rason nga masaligan ang mga sugilanon sa Biblia. Halimbawa, kon magsugid ang Biblia sang isa ka hitabo, pirme ini nagasambit sang tion, lugar, kag mga ngalan sang nadalahig. Bisan ang mga kritiko sang Biblia nagdayaw sa pagkasibu sang mga detalye sa Biblia. Natuman ang ginatos ka tagna sang Biblia, bisan sa pinakagamay nga mga detalye. Dugang pa, ang Biblia may mga laygay para mangin malipayon ang kaangtanan sang mga tawo—mga laygay nga nakabulig sa mga tawo bisan ano man ang ila edad kag tindog sa kabuhi. Kon parte sa kaangtanan sa iban, ang laygay nga masapwan sa Biblia indi matupungan.

Kon daw nagaduhaduha ka pa sa Biblia, palihug usisaa ini sing maayo. Kon mas mangin pamilyar ka sa sini, labi nga magadugang ang imo pagsalig. (Juan 17:17) Marealisar mo nga masaligan mo ang ginasugid sini parte sa mga milagro nga natabo sang una. Kon magpati ka na sa sini nga mga sugilanon, makasalig ka nga matuman ang mga ginasiling sang Biblia parte sa palaabuton.

[Retrato sa pahina 7]

Wala ginduhaduhaan sang mga manugpamatok ni Jesus nga napatay si Lazaro