Abi Ko Malipayon Na Gid Ako

Natawo ako sa gamay nga banwa sa Poland, malapit sa dulunan sang Germany. Malinong ang akon pagkabuhi bangod napalibutan kami sang kaumhan kag kagulangan. Ginpalig-on ako sang akon mahigugmaon nga mga ginikanan nga mangin mabuot nga tawo, mag-eskwela sing maayo, kag mangin propesyonal.

Naggamo ang akon kabuhi sang nagtuon ako sing abogasiya sa isa ka unibersidad sa siudad sang Wrocław. Bangod malayo ako sa akon mga ginikanan, nangamigo ako sa malain nga mga kaupdanan. Halin sang una nanamian na ako sang soccer, pero bangod sa impluwensia sang akon bag-o nga mga abyan, nangin panatiko ako sa sini. Ang akon paborito nga team halin sa Warsaw, kag kada Sabado kag Domingo ginasundan ko sila bisan diin sila maghampang. Bahin na sa sini ang pagpahubog, pagdroga, kag kon kaisa masingki nga pag-inaway sa mga dampig sa pihak nga team. Daw amo ini ang bulong ko sa stress, bisan pa nahibaluan ko nga maguba gid ang akon handum nga mangin abogado kon arestuhon ako sang pulis.

Nanamian kami sang akon mga amigo nga magkadto sa mga klab kag diskohan. Sa sini nga mga lugar pirme kami makakita sing kontra. Pila ka beses ako nga gin-aresto sang pulis, pero pirme ko ini malutsan—kon kaisa paagi sa hamham. Abi ko malipayon na gid ako. Pero nahibaluan ko gid nga sala ang ginahimo ko. Kada Domingo nagasimba ako agod indi ako pagkonsiensiahon.

Sang 2004, may duha ka Saksi ni Jehova nga nagkadto sa balay, kag nagpasugot ako nga binagbinagon namon ang Biblia. Sang natun-an ko kon ano ang kahulugan sang matuod nga Cristiano, ginkonsiensia na gid ako. Nahibaluan ko nga dapat ko untatan ang pagpahubog, pagdroga, kag pagpakig-upod sa mga tawo nga wala nagasunod sa mga talaksan sang Biblia. Narealisar ko man nga dapat ko bag-uhon ang akon pagkapalaaway kag pagkabayolente. Bisan pa nahibaluan ko nga dapat ako magbag-o, wala ko ini ginhimo.

Sang isa ka gab-i, nagbag-o ang akon kabuhi sang gin-away ko ang walo ka lalaki. Nadumduman ko nga natumba ako sa dalan kag ginasumbag nila ako kag ginasipa sa ulo. Abi ko mapatay na ako, gani nangamuyo ako: “Pasensia gid Jehova nga wala ko ginsunod ang imo Pulong. Kon mabuhi ako, ginapangako ko nga matuon na gid ako sing Biblia sa mga Saksi kag tadlungon ang kon kabuhi.” Wala ako maghunahuna nga mabuhi pa ako. Gani gintuman ko ang akon pangako nga magtuon sing Biblia.

Sang 2006, nagsaylo ako sa England. Luyag ko nga makaobra kag makasupot sing kuarta agod makapauli sa Poland kag makakuha sing mas mataas nga degree sa abogasiya. Samtang padayon ako nga nagatuon sing Biblia, may isa ka teksto nga nagtandog gid sa akon. Si apostol Pablo nagsulat: “Ginkabig ko man nga wala sing pulos ang tanan nga butang tungod sa labaw nga balor sang ihibalo tuhoy kay Cristo Jesus nga akon Ginuo. Tungod sa iya ginbayaan ko ang tanan nga butang kag ginkabig ini nga mga basura, agod maagom ko ang Cristo.” (Filipos 3:8) Pareho sa akon, si apostol Pablo nakaeskwela man sing abogasiya—kag sang una tama man sia kasingki. (Binuhatan 8:3) Apang narealisar niya nga may mas maayo pa nga paagi sang pagkabuhi: ang pag-alagad sa Dios kag ang pag-ilog gid kay Jesus. Sang ginpamalandungan ko ang halimbawa ni Pablo, narealisar ko nga ang maayo nga propesyon kag ang masingki nga batasan indi makahatag sing kalipay. Kumbinsido ako nga kon nasarangan ni Pablo nga magbag-o, masarangan ko man. Gani nagpabilin ako sa England kag wala na ginpadayon ang plano nga mag-eskwela.

Samtang nagatuon ako parte kay Jehova, mas nagasuod ako sa iya. Natandog ako sa iya pasalig nga patawaron ang mga sinsero gid nga magbag-o. (Binuhatan 2:38) Kag sang ginpamalandungan ko ang 1 Juan 4:16, nga nagasiling nga “ang Dios gugma,” nahantop ko kon ngaa ginadumtan sang Dios ang kasingki.

Nagdayaw man ako sa paggawi sang mga Saksi. Nakita ko nga ginatinguhaan gid nila nga sundon ang mataas nga mga talaksan sang Biblia sa moral. Luyag ko mangin bahin sang ila malipayon nga paghiliutod. Nagtinguha gid ako nga maghimo sing pila ka pagbag-o sa akon kabuhi, kag nabawtismuhan subong isa sa mga Saksi ni Jehova sang 2008.

Ginbag-o ako sang Biblia halin sa ambisyuso, masingki, nagadroga, palahubog nga panatiko sa soccer pakadto sa isa ka alagad sang Dios nga nalipay sa pagtudlo sa iban parte sa Biblia. Nanamian ako gihapon magtan-aw sing soccer, apang determinado ako nga ibutang ini nga kalingawan sa nagakaigo nga lugar.

Malipayon gid ako upod ang akon matahom nga asawa nga si Esther, nga nagaalagad man kay Jehova. Nalipay gid kami sa pagtudlo sing Biblia sa mga tawo nga nagahambal sing Polish diri sa aminhan-katundan sang England. Subong ko pa lang nabatyagan ang matuod nga kalipay. May matinlo ako nga konsiensia, kag ang akon kabuhi may katuyuan kag malipayon.