Magpakita Sing Pagtahod sa Duog Sang Pagsimba kay Jehova

¹ Kon mga bisita kita sa isa ka balay, ginapakita naton ang pagtahod sa pagkabutang sang tag-iya, wala nagahimo sing bisan ano nga makaguba sini, kag wala naton ginatublag ang mahim-ong nga kahimusan sa panimalay. Matuod ini labi na kon mga bisita kita ni Jehova! Dapat naton mahibaluan kon paano kita maggawi sa iya panimalay. (Sal. 15:​1; 1 Tim. 3:15) Ginahiwat man ang aton Cristianong miting sa Kingdom Hall, sa pribado nga puluy-an, ukon sa publiko nga pasilidad, ang kalabanan sa aton pirme nagapakita sing pagtahod sa aton duog sang pagsimba subong nga daw balay ini ni Jehova, nga ang “pagkatalahuron yara sa ibabaw sang duta kag sang langit.”​—⁠Sal. 148:⁠13.

² Apang, napanilagan sang nagalakbay nga mga manugtatap kag sang iban pa nga ang pila ka utod nagapakita sing kakulang sing pagtahod sa mga miting paagi sa paggahod ukon sa paggawi subong nga ang impormasyon nga ginapresentar daw indi importante. Ang pila ka hamtong nagainistoryahanay sa koridor, sa ­lobby, sa kasilyas, ukon sa guwa sang Kingdom Hall samtang may miting. Kon ang magulang nga bata amo ang ginapabantay sa manghod, kon kaisa ang duha nagadugsing kag diutay lamang ang mabenepisyo sa programa. Ang pila ka pamatan-on nakita sa guwa sang Kingdom Hall pagkatapos sang miting, nga nagahampang, nagagahod, nagakaratehay pa gani. Sa pila ka hitabo nadisturbo nila ang mga kaingod ukon natublag ang trapiko sa paradahan ukon sa dalan.

³ Kon Paano Likawan nga Mangin Dimatinahuron: Ginaapresyar ang pagkatalahuron kag pagkasagrado sang aton pagsimba, walay duhaduha nga indi naton luyag tublagon ang iban paagi sa paghutikay, pagkaon, pag-usang sing gum, pagkumos sing papel, dikinahanglanon nga pagpakadto-pakari sa kasilyas, ukon kinabatasan nga pag-abot sing ulihi sa mga miting. Ang matinahuron kag mainapresyahon nga mga ginikanan wala nagatugot sa ila kabataan nga higkuan ang alpombra, ­upholstery, ukon mga dingding sang Kingdom Hall ukon sang puluy-an nga ginahiwatan sing pagtinuon sa libro. Kag walay duhaduha nga kita tanan nagaugyon nga ang bisan ano nga sahi sang makahuluya nga paggawi, binuang nga hambalanay, ukon malaw-ay nga linahugay wala sing bahin sa aton mga miting.​—⁠Efe. 5:⁠4.

⁴ Kon ginadumdom naton pirme ang katuyuan sang aton Cristianong mga miting, pat-uron naton nga kita kag ang aton kabataan nagapakita sing nagakaigo nga pagtahod sa pagsimba kay Jehova sa duog nga aton “ginpili nga tindugan.”​—⁠Sal. 84:⁠10.