Pamangkot sang mga Pamatan-on . . .

Ano ang Masiling sa mga Karera sa Pagmodelo kag mga Paindis-indis sa Katahom?

“SANG magkadto kami sa Nueva York sang nagligad nga tuig,” alimunaw sang 12-anyos nga si Amy, “ginsilingan sang isa ka tawo nga nagapalakat sang otel ang akon iloy, ‘Dapat mo paeskwelahon ang imo bata sa eskwelahan sang pagmodelo. . . . Katahom sa iya.’”

Amo man sini ang naeksperiensiahan sang pila ka matahom nga mga pamatan-on. Ang 15-anyos nga si Racine gintawgan sa telepono sang isa ka tawo nga nagtinguha sa paghaylo sa iya kag sa iya manghod sa pagmodelo. Ang isa ka lin-ay sa Bagatnan nga Aprika ginpangabay nga magbuylog sa paindis-indis sa katahom. Kag indi lamang mga babayi ang ginatanyagan sing butang nga makuwartahan. Ang pamatan-on nga si Jonathan gintanyagan nga magtrabaho subong lalaki nga modelo.

Huo, sa bug-os nga kalibutan, ang pamatan-on nga mga lalaki kag mga babayi kag mga kabataan sang tanan nga edad ginahaylo para sa pagmodelo nga karera, sa mga paindis-indis sa katahom, kag kaangay sini. Sa Estados Unidos lamang, ginareport nga ginatos ka libo ka paindis-indis sa katahom ang ginahiwat kada tuig. Ang mga nagadaug nagabaton sing linibolibo ka dolyar, mga premyo, kag scholarship. Para sa pila lamang, ang pagdaug sa paindis-indis sa katahom nagresulta sa mataas sing suweldo nga trabaho sa kalingawan kag sa pagmodelo.

Ang isa ka lin-ay nagsiling: “Halin pa sang una handum ko nga mangin modelo—magmodelo sing panapton para sa lokal nga mga magasin kag mga fashion show. Ang bayad halin sa $25 tubtob $100 kada oras.” Apang, ginareport nga ang nagapanguna nga mga modelo nagasuweldo sing tubtob sa $2,500 kada adlaw! Indi katingalahan, nian, nga ang pila ka Cristianong mga pamatan-on nasulay sa pagpanginpulos sa ila katahom. Ano ang himuon mo kon tanyagan ka sinang matahom batyagon nga kahigayunan?

Ang Katahom Mahimo Mangin Mapuslanon

Ang Judiyong dalaga nga si Ester ginsiling nga “matahom kag maayuayo.” (Ester 2:7) Sa kamatuoran, sarang mo gani masiling nga sia indi kinabubut-on nga nagbuylog sa isa ka paindis-indis sa katahom. Ang kahimtangan? Ang hara sang Persia nga si Vasti ginpahalin sa iya katungdanan bangod sang iya indi pagtuman. Agod makakita sing nagakabagay nga tal-us, ginpatipon ni Hari Ahasuero ang labing matahom nga mga dalaga gikan sa tanan nga duog. Sa sulod sang 12 ka bulan, ginhimos niya nga pakaunon ang mga dalaga sing pinasahi nga pagkaon kag regular nga ginmasahe sing lana sang balsamo kag mirra. Nian gin-usisa ang tagsa ka dalaga. Kag sang si Ester na ang gin-usisa, napilian sia nga mangin bag-o nga hara!—Ester 1:12–2:17.

Apang, ngaa nagpakigbahin si Ester? Bugalon bala sia? Indi, si Ester nagsunod sa pagtuytoy ni Jehova, nga iya makapila ginpangita paagi sa iya diosnon nga pakaisa kag manugbantay nga si Mardoqueo. (Ester 4:5-17) Ang isa ka malaut nga tawo nga nagahingalan kay Haman nagplano sang kalaglagan sang katawhan sang Dios, ang pungsod sang Israel. Ang ‘paindis-indis sa katahom’ nagtugot kay Jehova nga maniobrahon si Ester sa isa ka mataas nga posisyon nga sa diin ginpaslaw niya ining plano. Sa amo ang katahom ni Ester nangin pagpakamaayo para sa tanan nga katawhan sang Dios!

Ano ang masiling sa karon? Pat-od nga ang hitsura sang isa indi amo ang labing importante nga butang sa kabuhi.a Walay sapayan, kon updan ini sing kaugdang kag pagkamapainubuson, ang katahom mahimo mangin maayong kinaiya. Apang, nagakahulugan bala ini nga ang pagmodelo ukon pagbuylog sa mga paindis-indis sa katahom isa ka maalamon nga paagi sa paggamit sining kinaiya? Ukon may mga butang bala nga dapat binagbinagon luwas sa ganyat sang kadungganan, himaya, ukon kamanggaran?

Sa Likod sang Inggat

Ang pagmodelo sing panapton may pangganyat. Matahom nga mga panapton, malahalon nga mga alahas, mataas nga suweldo, ang posibilidad nga maglakbay kag magguwa sa telebisyon—makagalanyat ini tanan. Dugang pa, ang paghanas sa pagmodelo nakabulig sa madamo nga pamatan-on nga mga babayi kag mga lalaki sa paglakat sing matahom kag sa paghambal nga may kompiyansa kag kalig-on. Apang sa likod sang ganyat, inggat, kag idlak mahimo may nagapanago nga mga katalagman para sa Cristiano.

Indi buot silingon nga malain ang magmodelo. Ang iban nga pagmodelo may maayo nga katuyuan: himuon ang isa ka produkto nga makagalanyat tulukon. Amo ina ang isa ka rason kon ngaa ang matahom nga mga kamot ginagamit sa pagpasundayag sang kyutiks sa magasin kag pasayod sang TV. Sing kaanggid, ang maayo sing korte nga mga lalaki kag mga babayi ginagamit sa pagpasundayag sang mga panapton. Ibutang ta nga maugdang ina nga mga panapton, mahimo nga wala sing malain kon bayaran ang isa ka Cristiano sa pagmodelo sini.

Walay sapayan, madamo sing problema nga duna sa pagmodelo nga indi pirme mahapos likawan. Ano ang himuon mo, halimbawa, kon ang ipasul-ob sa imo indi maugdang ukon indi nagakaigo para sa mga Cristiano? Ukon kon malalangon nga piliton ka sang retratista sa pagposing sa isa ka nagapangganyat nga paagi? Dugang pa, indi pirme mapat-od sang isa kon paano gamiton ang mga retrato. Halimbawa, mahimo gamiton ang mga retrato sa isa ka danyag nga nagasakdag sang mga piesta opisyal sang dimatuod nga mga relihion ukon may imoral nga ginapahangop.

Nian yara man ang mahimo mangin epekto sina nga karera sa personalidad sang isa, nga nagasakdag sang pagpalambo sa negatibo nga mga kinaiya. Ang padayon nga pagpadaku sang naguwa nga panagway sang isa sa baylo sang “tinago nga tawo sang tagipusuon” naghimo sang pila ka pagmodelo sing mga panapton nga wala gid sing pulos. (1 Pedro 3:4) Subong man, ang pagtrabaho nga may malahalon nga mga panapton, mga alahas, kag kaangay sini mahimo magpatubo sing materyalistiko nga panghunahuna.—1 Timoteo 6:10.

Ang propesyon sa pagmodelo sing mga panapton kilala man nga nagapadayag sang mga indibiduwal, lalaki kag babayi, nga nagapamilit nga hatagan sila sing seksuwal nga pabor subong baylo sa pag-uswag sa karera. Subong sang ginsiling sang isa anay ka modelo sa mga panapton: “Ang matuod, dapat ka magpatandog agod mag-uswag ka.” Ang iban nagasiling pa nga ang homoseksuwalidad lapnag sa tunga sang lalaki nga mga modelo. Bisan pa indi ini pirme matuod, mahimo nga mas daku ini nga problema sa pagmodelo sang sa iban nga mga propesyon.

Mga Paindis-indis sa Katahom

Ang kalabanan sang nasambit na sarang man masiling sa mga paindis-indis sa katahom. Apang, dugang pa, yara man ang pag-ipit sang mabaskog nga pagpaindisanay. Nagtiklod ini sa iban nga mga manugpaindis-indis tubtob sa punto nga balabagan ang ila mga kontra sing hungod. Suno sa isa ka report, “bangod sang daku gid nga handum nga magdaug, ginhamlitan sang iban nga mga manugpaindis-indis sing lipstik ang swimsuit sang ila mga karibal ukon ‘aksidente’ nga naulaan sing Coke ang ila mga trahe.”

Subong man, ang mga isponsor sang mga paindis-indis sa katahom nagapaabot sing bug-os nga pagkooperar sang ila mga lin-ay subong mga tiglawas sang ila pagbaligya kag pagpakig-angot sa publiko. Sa masami nagakinahanglan ini sing pagpakigsosyal tubtob sa kaagahon. Ang isa ka lin-ay ginsilingan: “Darling, indi ka dapat paglapyuon. Tandai ina. Ikaw dapat ang una nga mag-abot sa sinalusalo kag ikaw dapat ang katapusan nga magpauli.” Ano man ang matabo, ginapadayag sini ang Cristianong pamatan-on sa indi maayo nga pagpakig-upod kag mahimo nga mahulog ang buot sang isa sa isa nga indi tumuluo.—2 Corinto 6:14.

Bilang katapusan, yara ang kamatuoran nga ang mga paindis-indis sa katahom nagasikway sang prinsipio sang Biblia sa Roma 1:25, nga nagapakamalaut sang mga ‘nagasimba kag nagahatag sing balaan nga pag-alagad sa tinuga sa baylo sang Isa nga nagtuga.’ (Ipaanggid ang Binuhatan 12:21-23.) Sa sina lamang nga sadsaran, nagakaigo nga mangindi ang isa ka Cristianong pamatan-on sa pagpakigbahin sa paindis-indis sa katahom bisan pa sa diutay nga kasangkaron sa eskwelahan.

Matuod nga Katahom

Gintimbangtimbang sang mga pamatan-on nga ginsambit kaina ining mga kamatuoran sa paghimo sang ila kaugalingon nga mga desisyon. Bisan pa ang pagtinguha sa trabaho subong isa ka modelo indi malain sa iya kaugalingon, si Amy kag si Racine namat-od nga indi paghimuon ini. Wala man pagbatuna ni Jonathan ang trabaho subong lalaki nga modelo kag sa karon nagaalagad sia sa bug-os kalibutan nga ulong-talatapan sang mga Saksi ni Jehova, nga nagahugod sang iya kaugalingon sa isa ka karera sa bug-os tion nga ministeryo. Apang ang isa pa ka matahom nga lin-ay nagbuylog kag nagdaug sa duha ka paindis-indis sa katahom. Sa karon, wala na sia nagatambong sa Cristianong mga miting. Daw ano ka matuod ang hulubaton: “Ang makagalanyat kag matahom indi pirme maayo; apang ang maayo matahom pirme.”

Ginapahanumdom kita liwat tuhoy kay Ester. Bangod sang iya pisikal nga katahom, ginlakip sia sa pililian sang hari sang iya palangasaw-on. Apang, ang iya kaugdang, pagkamapinasakupon, pagkamatinumanon, kag pagkadimakagod amo ang naghimo sa iya nga matahom gid. (Ester 2:13, 15-17) Ginpakita niya ang ginsiling ni Pedro: “Ang inyo pagpamuni dili mangin sa guwa sa pagpanalapid sang buhok kag sa puni nga bulawan kag sa mga panapton, kundi mangin sa tinago nga tawo sang tagipusuon nga may dimadinulunton nga huluyason sang mapainubuson kag mahim-ong nga espiritu, nga bilidhon gid sa itululok sang Dios.” (1 Pedro 3:3, 4) Sa ulihi, ang pagpalambo sining Cristianong mga kinaiya magahatag sing daku pa nga daug sang sa wala nagadugay nga mga padya sang pisikal nga katahom.

[Mga footnote]

[Mga Laragway sa pahina 15]

Ang Cristianong mga kinaiya nagahatag sing daku pa nga daug sang sa wala nagadugay nga mga padya sang pisikal nga katahom