Gikan sa Amon mga Bumalasa

Pito ka Tikang Agod Mangin Mas Maayo nga mga Ginikanan (Agosto 2007) Ini nga magasin amo gid ang sabat sa akon mga pangamuyo. Bisan pa palangga sang akon apat ka tuig nga bata nga babayi si Jehova, nabalaka gihapon ako basi magsala ako sa pagpadaku sa iya. Gani nagapangamuyo gid ako kay Jehova adlaw-adlaw para buligan niya ako sa paghanas sang akon bata. Salamat gid sa inyo pag-ulikid sa amon bilang mga ginikanan.

Y.M.A., Mexico

Ini nga serye, daw isa ka guidebook nga gindesinyo para gid sa amon pamilya, kay ginaistoryahan sini ang mga isyu nga ginapalibugan ko gid! Ginpamatud-an pa gid sini sa akon kon daw ano ka daku ang pag-ulikid ni Jehova sa iya katawhan. Ginpamatian niya ang akon mga pangamuyo kag nakita niya ang akon paghibi kag nahibaluan niya nga kinahanglan ko gid ini nga impormasyon.

J. M., Estados Unidos

Sa pila lamang ka pahina, nalakip ninyo ang mapuslanon nga mga giya kag epektibo gid nga mga instruksion. Ang kinahanglan na lang namon nga himuon amo nga sundon ini nga mga giya!

E. L., Finland

Mas Maayo Bala ang Imo Panglawas kon Positibo Ka? (Septiembre 2007) Daku gid ang nabulig sini nga artikulo sa akon, kay ginabasol ko pirme ang akon kaugalingon kon may problema nga mag-utwas. Nagbatyag ako nga indi ako maayo nga iloy, kag ginahul-an gid ako. Bisan indi mahapos sa akon nga mangin optimistiko, ini nga impormasyon nagpahaganhagan sang akon pagkabalaka. Nagapasalamat gid ako sa interes nga ginpakita ninyo sa amon paagi sa sini nga artikulo.

A. S., Ecuador

Pagbusog sang Ngipon​—Madugay Na nga Problema (Septiembre 2007) Isa ako ka dentista kag nagatudlo sang dentistry. Nagdayaw gid ako sa inyo maayo nga pagsulat sini nga artikulo. Matahom gid ini nga sumaryo sang kasaysayan sang paggabot sing ngipon. Ginpabasa ko man ini sa akon mga abyan kag mga katrabaho.

C. R., Estados Unidos

Ang Dios Bala ang Nagabuot? (Septiembre 2007) Upod sa akon mga abyan, nagtinipontipon kami agod istoryahan ang pila ka praktikal nga mga paagi nga amon mahanda kon may emerhensia. Pagkatapos mamahaw, ginbinagbinag namon ang maayo nga mga punto sa kahon nga “Handa ka Bala Mag-Ebakwit?” sa ginsambit nga artikulo kag gintan-aw namon ang mga gamit nga pang-emerhensia nga ginhanda sang pila sa amon. Ginbinagbinag man namon ang importansia sang balanse nga pagtamod sa pagpangaman kon may emerhensia. Naapresyar namon nga ang pagtipon sang suplay para sa emerhensia indi amo ang amon panguna nga tulumuron subong mga alagad sang Dios. Sa baylo, amo ang pagbantala sing maayong balita sang Ginharian sang Dios kag ang pagsugid sa iban sang matahom nga saad sang Dios sa duta, nga wala na sing katalagman sa bisan ano nga kalamidad, natural man ukon tuga sang tawo.

R. G., Estados Unidos

Amligi ang Inyo mga Anak! (Oktubre 2007) Gin-molestiahan ako sang bata pa ako katama. Asta subong, indi ko gihapon ini masugid sa akon mga ginikanan. Gani nalugpayan gid ako sining mga artikulo. Ginalauman ko gid nga tani basahon ini sang mga ginikanan agod maproteksionan nila ang ila mga kabataan. Nagapasalamat gid ako kay Jehova sa paghatag niya sining nagakaigo nga impormasyon. Daku gid ini nga paumpaw para sa amon nga nakaagi sang seksuwal nga pag-abuso.

R. I., Japan