Bug-os Kalibutan nga Kalig-onan sa Idalom sang “Prinsipe sang Paghidait”: Kapitulo 3

Ang Paggahom sang “Prinsipe sang Paghidait” sa Tunga sang mga Kaaway

SANG malapit na sia magkayab sa langit sang nagligad nga kapin sa 19 ka siglo, ang palaabuton pa sadto nga “Prinsipe sang Paghidait,” nga si Jesucristo, nagpamulong sining nagapaalam nga mga pulong sa isa ka grupo sang iya matutom nga mga disipulo: “Busa lakat kamo kag himua nga mga disipulo ang katawhan sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu . . . Kag, yari karon! ako kaupod ninyo sa tanan nga adlaw tubtob sa katapusan sang sistema sang mga butang.”—Mateo 28:19, 20.

² Nagkinahanglan bala yadto nga mga pulong ni Jesus nga ang kalibutan makombertir sa wala pa ang “katapusan sang sistema sang mga butang” nga nagsugod sang 1914? Wala. Sa karon, samtang nagahingapos ining ika-20 nga siglo, ang kalibutan sang katawhan malayo gihapon nga makombertir sang iya Manluluwas kag may kinamatarong nga Hari. Apang, wala ini magpalantang sang pagpanghikot sang gintagna ni Jehova sa mga tagna sa Biblia. Indi gid katuyuan sang Dios nga ang bug-os nga kalibutan sang katawhan makombertir sa wala pa si Jesucristo magsugod sa paggahom subong “Prinsipe sang Paghidait.” Sa kabaliskaran gid, gintagna sia nga magasugod sa paggahom sa tunga sang iya mga kaaway.

³ Bisan sang yari sia sa duta, nahibaluan na ni Jesucristo ining kamatuoran. Sang malapit na sia mapatay subong martir, nakigsuay sia sa iya relihioso nga mga kaaway kag ginpatuhuyan niya ang Salmo 110. Mabasa naton ini sa Lucas 20:41-44: “Nian nagsiling sia sa ila: ‘Paano bala nga nagasiling sila nga ang Cristo anak ni David? Kay si David gid nagsiling sa tolon-an sang mga Salmo, “Si Jehova nagsiling sa akon Ginuo, Lingkod ka sa akon tuo tubtob nga mahimo ko ang imo mga kaaway nga palatungan sang imo mga tiil.” Busa, ginatawag sia ni David nga “Ginuo”; gani paano sia nangin anak niya?’”

⁴ Maathag, kon amo, nga si Jesucristo, subong Anak ni David, indi magasugod sa paggahom sa tapos makombertir ang kalibutan. Sa baylo, magasugod sia sa paggahom sa tunga sang mga kaaway nga sa ulihi paagi sa inaway himuon ni Jehova nga Dios nga palatungan sang mga tiil sang iya nakalingkod sa trono nga Anak. Ang Salmo 2 man, sa masunod nga mga pulong, nagapakita sang pagsugod sang iya paggahom subong ang “Prinsipe sang Paghidait” sa tunga sang mga kaaway:

⁵ “Ngaa bala ang mga pungsod nagasingkal kag ang mga katawhan nagahimbon sing butang nga wala sing pulos? Ang mga hari sang duta nagapahamtang sang ila kaugalingon kag ang mataas nga mga opisyales nagahilisapol sing tingob batok kay Jehova kag sa iya hinaplas [ang iya Cristo], nga nagasiling: ‘Bugrason ta ang ila mga gapos kag ipilak gikan sa aton ang ila mga pisi!’ Ang Isa gid nga nagalingkod sa kalangitan magakadlaw; si Jehova gid magauligyat sa ila. Sa sadto nga tion magapamulong sia sa ila sa iya kasingkal kag gamuhon sila sa iya tanan nga kaakig, nga nagasiling: ‘Napahamtang ko ang akon hari sa ibabaw sang akon balaan nga bukid nga Sion.’

⁶ “Magasugid ako sang mando ni Jehova; nagsiling sia sa akon [Cristo]: ‘Ikaw akon anak; sini nga adlaw nangin amay mo ako. [Ang Salmo 2:7 natuman sang ginbanhaw ni Jehova ang iya Anak gikan sa minatay, sa amo nangin walay katapusan nga Amay kay Jesus. (Roma 1:4)] Pangayua sa akon, kag ihatag ko sa imo ang mga pungsod nga panublion nimo kag ang kaukbungan sang duta nga imo kaugalingon. Buongon mo sila sa bilugon nga salsalon, ipus-ang mo sila kaangay sang suludlan sang maninihon.’ Busa karon magpakaalam, O kamo nga mga hari; magpatudlo, O kamo nga mga hukom sang duta. Alagda nga may kahadlok si Jehova kag magkalipay nga may pagkurog. Haluki ang anak nga lalaki, agod nga indi Sia maakig, kag indi kamo mawala sa dalanon, kay ang iya kasingkal nagadabdab sing madali. Malipayon ang tanan nga nagadangop sa iya.”

⁷ Suno sa Binuhatan 4:24-27, ang mga apostoles ni Jesucristo nagpatuhoy sa sining ikaduha nga salmo sa tapos sang adlaw sang Pentecostes, 33 C.E.: “Sila nagtib-ong sing hiusa sang ila tingog sa Dios kag nagsiling: ‘Soberanong Ginuo, ikaw ang Isa nga naghimo sang langit kag sang duta kag sang dagat kag sang tanan nga yara sa ila, kag paagi sa balaan nga espiritu sang baba sang amon amay nga si David nga imo alagad, nagsiling, “Ngaa bala nagsingkal ang mga pungsod kag ang katawhan naghunahuna sing walay pulos nga mga butang? Nagpaagisod ang mga hari sang duta kag nagtipon sing tingob ang mga manugdumala batok kay Jehova kag batok sa iya hinaplas.” Kay matuod gid si Herodes kag si Poncio Pilato upod ang mga tawo sang mga pungsod kag ang katawhan sang Israel nagtipon sa sining siudad batok sa imo balaan nga alagad nga si Jesus, nga imo hinaplas.’”

Daku nga Katumanan sang Salmo 2

⁸ Nasaksihan sang tuig 33 sang unang siglo ang katumanan sadtong matagnaon nga mga pulong sang Salmo 2:1, 2. May kaangtanan ini sa tawo nga si Jesucristo sa duta. Ginhaplasan sia sing balaan nga espiritu ni Jehova sang ginbawtismuhan sia ni Juan Bautista. Apang ang daku nga katumanan sang Salmo 2 nagakatabo kutob sang matapos ang Panag-on sang mga Gentil sang tuig 1914. (Lucas 21:24) Madamo sing pamatuod nga “ang gintangdo nga panag-on sang mga pungsod,” nga nagsugod sa una nga kalaglagan sang siudad sang Jerusalem sang 607 B.C.E., natapos sang tuig 1914.a Nian nagbagting ang lingganay sang kamatayon para sa mga pungsod sining kalibutan, lakip ang yara sa Cristiandad.

⁹ Sa una nga kalaglagan sang Jerusalem, paagi sa mga Babilonianhon, ang Ginharian ni Jehova nga Dios sa ibabaw sang pungsod sang Israel, nga ginlaragway sang harianon nga linya ni Hari David, natapos. Kutob sadto, ang kinaugali nga mga Judiyo wala sing hari sa ibabaw nila sa linya sang harianon nga panimalay ni David. Apang ang Ginharian sang Labing Mataas nga Dios sa mga kamot sang kaliwat ni David, nga sa iya si Jehova nakahimo sing katipan para sa isa ka walay katapusan nga Ginharian sa iya linya, indi magapabilin nga diaktibo sa duta tubtob sa walay katubtuban.

¹⁰ Sa hari sang dumaan nga Jerusalem, sa wala pa ang una nga kalaglagan sini, ginsugo ni Jehova ang iya manalagna nga si Ezequiel nga ipamulong ining mga pulong: “Kag ikaw, O malauton nga napilasan sa ikamatay, ang prinsipe sang Israel, nga ang iya adlaw nagaabot, ang tion sang imo katapusan nga pagsilot, amo ini ang ginasiling sang Soberanong Ginuong Jehova, ‘Kuhaa ang turbante, kag huksa ang purungpurong. Ang mga butang indi mangin amo sing subong. Bayawa ang kubos, paubsa ang mataas. Kalaglagan, kalaglagan, himuon ko ini nga kalaglagan. Mangin walay agi ini tubtob nga mag-abot ang may kinamatarong sa sini, kag sa iya ihatag ko ini.’”—Ezequiel 21:25-27.

¹¹ Ang isa nga may “kinamatarong” nag-abot sa persona ni Jesucristo, kag ang linya sang iya kaliwat gikan kay David narekord sa Mateo 1:1-16 kag Lucas 3:23-31. Gintawag sia nga “Anak ni David.” Sang adlaw sang iya madaugon nga pagsulod sa Jerusalem, nga nakasakay sa asno bilang katumanan sang tagna, ang nagahinugyaw nga kadam-an sang mga Judiyo nga nag-upod sa iya kag ang iya mga apostoles nagsinggit sing malipayon: “Luwasa, ginapangamuyo namon, ang Anak ni David! Bulahan ang nagakari sa ngalan ni Jehova! Luwasa sia, ginapangamuyo namon sa kahitaasan!”—Mateo 21:9.

“Ang Anak ni David” Ginpalingkod sa Trono sa Langit

¹² Ang 2,520 ka tuig nga pagtapak sang mga Gentil sa Ginharian sang Dios sa mga kamot sang panimalay ni David natapos sang 1914. Nian nag-abot ang tion nga si Jesucristo, nga “Anak ni David,” palingkuron sa trono, indi diri sa dutan-on nga trono, kundi sa pinakamataas nga kalangitan sa tuo nga kamot ni Jehova nga Dios!—Daniel 7:9, 10, 13, 14.

¹³ Yadtong importante nga petsa ginpatuhuyan kutob sang 1876 sang mga tawo nga nangin katapo sang Watch Tower Bi­ble and ­Tract So­cie­ty. Apang ang mga pungsod sang duta, bisan ang mga bahin sang Cristiandad, nagdumili sa pagkilala sini subong tion na nga iampo nila ang ila dutan-on nga pagkasoberano sa bag-o mapalingkod sa trono nga “Anak ni David.” Wala nila pagkilalaha ang kinamatarong nga ginhatag sa iya sang Dios sa pagkasoberano sa ibabaw sang bug-os nga duta, nga amo ang palatungan ni Jehova nga Dios. (Mateo 5:35) Ginpakita nila ang ila dayag nga pagsikway sa may kinamatarong nga Hari paagi sa pagpakig-away sa una nga kalibutanon nga inaway.

¹⁴ Sa tanan nga pungsod nga nadalahig sa inaway, ang dedikado nga mga Cristiano nga kaupod sang Watch Tower Society gin-ipit sing daku nga talikdan ang ila pamat-od nga maglikaw sa sala sa dugo. Wala pa nila sadto mahangpi sing bug-os ang kinahanglanon nga mangin neutral subong mga Cristiano. Ang tagna sang “Anak ni David,” si Jesucristo, sa iya mga disipulo tuhoy sa “katapusan sang sistema sang mga butang” masakit nga nagmatuod: “Dumtan kamo sang tanan nga kapungsuran bangod sa akon ngalan.” (Mateo 24:9) Ining dumot wala mag-ugdaw kutob sang matapos ang Inaway Kalibutanon I. Bangod sining may kahulugan nga mga kamatuoran sang modernong maragtas, ano ang ginapahangop sang kahimtangan sa bug-os nga kalibutan? Amo ini: Ang “Prinsipe sang Paghidait” nagagahom sa tunga sang mga kaaway nga yari diri sa duta!

¹⁵ Ginbun-ag sang Labing Gamhanan nga Dios ang ginsaad nga Mesianikong Ginharian sa iya gintangdo nga tion walay sapayan sang tanan nga kaaway sa langit kag sa duta. Ginapakita sang Bugna 12:1-9 nga sa tapos mabun-ag ang ‘lalaki nga bata’ nga Ginharian sa langit gikan sa taguangkan sang tulad-asawa nga organisasyon ni Jehova, nagdabdab sa gilayon ang inaway sa langit. Ang balaan nga kalangitan indi na isa ka duog para sa simbuliko nga dragon, si Satanas nga Yawa, kag sang iya demonyo nga mga anghel. Sa sining inaway, nga indi makita sang mga mata sang tawo, ang ginhatagan sing gahom nga “Anak ni David” nagpakig-away sing madaugon kag gintagbong si Satanas nga Yawa kag ang iya mga demonyo gikan sa kalangitan kag ginlimitehan sila sa palibot sang aton dutan-on nga globo. Ining pagpanubo sa sataniko nga mga puersa maathag nga nahimo sing bug-os sang 1918, ang tuig nga natapos ang Inaway Kalibutanon I.

Sang Ginpaubos, ang Yawa Nagpakig-away

¹⁶ Ang ginpaubos nga si Satanas nga Yawa, ang simbuliko nga dragon, naakig karon labi na sa tulad-asawa nga organisasyon ni Jehova nga Dios. (Bugna 12:17) Sa amo mapintas nga nagpakig-away sia batok sa ginpanganak sang espiritu nga nagkalabilin sang dedikado nga mga Cristiano nga may pamatuod nga sia ang ila espirituwal nga iloy.—Galacia 4:26.

¹⁷ Nagpakig-away man si Satanas batok sa “iban nga mga karnero,” nga nagapanghikot sing matinumanon upod sa hinaplas nga nagkalabilin sa pagpanaksi sa pagkabun-ag sang Ginharian. (Juan 10:16) Wala lamang niya ginagamit ang iya ginpaubos nga mga demonyo, nga karon yari sa palibot sang duta, kundi ginagamit man niya ang kitaon nga bahin sang iya organisasyon sa pagpakig-away batok sa nagkalabilin kag sa “iban nga mga karnero.”

¹⁸ Malapit na matapos ang paggahom sang “Prinsipe sang Paghidait” sa tunga sang iya mga kaaway diri sa duta. Maayo gid ang iya pag-atipan sa kahimtangan. Sa adlaw kag gab-i ang iya matutom nga balaan nga mga anghel nagabantay, nga handa sa pagbaton sing harianon nga mga mando gikan sa iya kag sa paghimo sini sa gilayon. Nagaalagad sila subong manug-amlig nga puersa para sa hinaplas nga nagkalabilin kag sa ila mga kaupod, ang “dakung kadam-an” sang “iban nga mga karnero,” samtang nagapadayon ini sila sa pag-alagad sa mga interes sang Ginharian sa sining nagakaubos sing madasig nga tion sang paggahom sang “Prinsipe sang Paghidait” sa iya mga kaaway.—Bugna 7:9.

[Footnotes]

[Mga Pamangkot sa Pagtinuon]

 1, 2. (a) Anong nagapaalam nga mga pulong ang ginpamulong ni Jesucristo sa isa ka grupo sang iya mga disipulo? (b) Nagkinahanglan bala ini nga makombertir ang kalibutan antes sia magagahom subong “Prinsipe sang Paghidait”?

 3. Paano ang pagpatuhoy ni Jesus sa Salmo 110 nagapakita nga sia magagahom sa tunga sang mga kaaway?

4-6. (a) Paano ginapakita man sang Salmo 2 nga si Jesus indi na maghulat pa nga makombertir ang kalibutan antes magsugod sia sa paggahom subong “Prinsipe sang Paghidait”? (b) Sa ano nga tion natuman ang Salmo 2:7?

 7. Paano ginpatuhuyan sang mga apostoles ni Jesucristo ang Salmo 2 sa tapos sang adlaw sang Pentecostes?

 8. (a) San-o natabo ang una nga katumanan sang Salmo 2:1, 2? (b) Kutob san-o nagakatabo ang daku nga katumanan sang Salmo 2?

 9. Ano ang natabo sa una nga kalaglagan sang Jerusalem may kaangtanan sa Ginharian sang Dios nga ginrepresentar sang harianon nga linya ni Hari David?

10, 11. (a) Ano ang ginsiling sang Dios paagi sa iya manalagna nga si Ezequiel tuhoy sa trono ni David? (b) Sin-o ang nag-abot nga may “kinamatarong” sa trono ni David? (c) Ano ang ginsiling sang kadam-an sang mga Judiyo sang ginpresentar niya ang iya kaugalingon subong ang legal nga manunubli?

12. Sang matapos ang Panag-on sang mga Gentil sang 1914, sa diin si Jesucristo naglingkod sa trono subong permanente nga manunubli ni David?

13. (a) Kutob san-o nga petsa ang tuig 1914 ginpatuhuyan subong ang katapusan sang Panag-on sang mga Gentil, kag nanday sin-o? (b) Ano ang panimuot sang mga pungsod sang duta sa bag-o mapalingkod sa trono nga “Anak ni David”?

14. (a) Sang magdabdab ang Inaway Kalibutanon I, ano nga panimuot ang ginpakita sang mga pungsod sa mga Cristiano nga kaupod sang Watch Tower Society? (b) Bangod sini, ano ang ginapahangop sang kahimtangan sa bug-os nga kalibutan?

15. Ano ang natabo kay Satanas nga Yawa kag sa iya mga demonyo sang magdabdab ang inaway sa langit, kag san-o nga tuig mahimo nga natabo gid ini pasad sa mga resulta?

16, 17. (a) Batok kay sin-o nagpakig-away ang ginpaubos nga si Satanas nga Yawa? (b) Sin-o ang iya ginagamit sa pagpakig-away?

18. (a) Bisan pa ang Yawa mapintas nga nagapakig-away batok sa hinaplas nga nagkalabilin kag sa ila mga kaupod, ano nga manug-amlig nga puersa ang yara sa ila? (b) Ano nga bahin sang paggahom sang “Prinsipe sang Paghidait” ang malapit na matapos?