Kapitulo 26

Ang Sagrado nga Likom Sang Dios​—Ang Mahimayaon nga Talipuspusan Sini!

 1. (a) Paano kita ginapahibalo ni Juan nga natapos na ang sagrado nga likom? (b) Ngaa mabaskog nga naghambal ang hubon sang mga anghel?

MADUMDUMAN mo bala ang ginpanumpa sang makusog nga anghel nga nasulat sa Bugna 10:1, 6, 7? Nagsiling sia: “Wala na sing pagpalantang pa; kundi sa mga adlaw sang pagpatunog sang ikapito nga anghel, kon buot na sia magpatunog sang iya trumpeta, ang sagrado nga likom sang Dios suno sa maayong balita nga iya ginpahayag sa iya mga ulipon nga mga manalagna matapos na gid.” Nag-abot na ang gintalana nga tion ni Jehova nga patunugon ang hingapusan nga trumpeta! Paano, nian, natapos ang sagrado nga likom? Sobra gid ang kalipay ni Juan sa pagpahibalo sa aton! Nagsulat sia: “Kag ginpatunog sang ikapito nga anghel ang iya trumpeta. Kag may mabaskog nga mga tingog sa langit, nga nagasiling: ‘Ang ginharian sang kalibutan nangin ginharian sang aton Ginuo kag sang iya Cristo, kag magagahom sia subong hari tubtob sa walay katubtuban.’” (Bugna 11:15) May rason ang hubon sang mga anghel sa paghambal sing mabaskog, nga nagadaguob pa gani! Kay ining maragtason nga pagpahibalo importante sa bug-os nga uniberso. Importante gid ini sa tanan nga nagakabuhi nga tinuga.

 2. San-o kag upod sa ano nga hitabo madinalag-on nga natapos ang sagrado nga likom?

² Malipayon nga natapos ang sagrado nga likom! Natapos ini sing mahimayaon kag halangdon sang 1914 sang ginpalingkod ni Ginuong Jehova sa trono ang iya Cristo subong kaupod nga Hari. Nagapanghikot para sa iya Amay, aktibo nga naggahom si Jesucristo sa tunga sang isa ka kaaway nga kalibutan sang katawhan. Subong ang ginsaad nga Binhi, nabaton niya ang gahom sa Ginharian agod laglagon ang Man-ug kag ang iya hubon kag ipasag-uli ang tulad-paraiso nga paghidait sa duta. (Genesis 3:15; Salmo 72:1, 7) Sa amo, subong Mesianiko nga Hari, tumanon ni Jesus ang Pulong ni Jehova kag ibindikar ang iya Amay, “ang Hari nga dayon,” nga magagahom subong Soberano nga Ginuo “tubtob sa walay katubtuban.”—1 Timoteo 1:17.

 3. Ngaa, bisan pa Hari si Jehova halin sang una, gintugutan niya nga magluntad sa duta ang iban nga soberanya?

³ Apang paano “ang ginharian sang kalibutan . . . nangin ginharian sang aton Ginuo,” nga si Jehova? Indi bala nga halin sang una si Jehova nga Dios gid man ang Hari? Matuod ina, kay ang Levinhon nga si Asaf nag-amba: “Ang Dios akon Hari gikan sa dumaan.” Kag ang isa pa ka salmista nagsiling: “Si Jehova nangin hari! . . . Ang imo trono malig-on nga natukod gikan sa dumaan nga panahon; gikan pa ikaw sa walay latid nga tion.” (Salmo 74:12; 93:1, 2) Apang, suno sa iya kaalam, gintugutan ni Jehova nga magluntad sa duta ang iban nga soberanya. Sa amo natilawan sing bug-os ang hulusayon nga ginpautwas anay sa Eden kon bala ang tawo makagahom sa iya kaugalingon nga wala ang Dios. Napaslawan gid ang paggahom sang tawo. Matuod gid ang ginsiling sang manalagna sang Dios: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Sugod sang magluib ang aton una nga mga ginikanan, ang bug-os napuy-an nga duta nangin sa idalom sang paggahom sang “orihinal nga man-ug,” si Satanas. (Bugna 12:9; Lucas 4:6) Tion na karon para sa isa ka bug-os nga pagbag-o! Agod ibindikar ang iya may kinamatarong nga tindog, ginsugdan ni Jehova nga ipakita ang iya pagkasoberano sa ibabaw sang duta sa isa ka bag-o nga paagi, paagi sa iya gintangdo nga Mesianiko nga Ginharian.

 4. Sang ginpatunog ang mga trumpeta sang 1922, ano ang ginpadaku? Ipaathag.

⁴ Sang ginpatunog ang pito ka trumpeta sang 1922, ginpresentar sa kombension sang mga Estudyante sang Biblia sa Cedar Point, Ohio, ang pamulongpulong ni J. F. Rutherford, nga napasad sa teksto nga “Ang ginharian sang langit malapit na.” (Mateo 4:17, King James Version) Naghinakop sia paagi sa sini nga mga pulong: “Balik kamo sa latagon, kamo nga mga anak sang labing mataas nga Dios! Itakod ang inyo hinganib! Mangin maligdong, mangin mabinantayon, mangin aktibo, mangin maisog. Mangin matutom kag matuod nga mga saksi para sa Ginuo. Sulong kamo sa pagpakig-away tubtob mahapay na ang tanan nga marka sang Babilonia. Ibantala ang mensahe bisan diin. Dapat mahibaluan sang kalibutan nga si Jehova amo ang Dios kag si Jesucristo amo ang Hari sang mga hari kag Ginuo sang mga ginuo. Amo ini ang adlaw sang tanan nga mga adlaw. Tan-awa, nagagahom na ang Hari! Kamo ang iya mga manugbantala. Busa ibantala, ibantala, ibantala, ang Hari kag ang iya ginharian.” Ginpadaku ang Ginharian sang Dios paagi kay Cristo Jesus, kag ginsugdan ina sang pagbaskog sang pagbantala sa Ginharian nga naglakip sang mga paghukom nga ginpahibalo sang pagpatunog sa tanan nga pito ka trumpeta sang mga anghel.

 5. Sang 1928, ano ang natabo sa kombension sang mga Estudyante sang Biblia nga nagpadaku sang pagpatunog sa ikapito nga trumpeta?

⁵ Ang pagpatunog sa trumpeta sang ikapito nga anghel ginpakita sa dalagku nga mga punto sang kombension sang mga Estudyante sang Biblia sa Detroit, Michigan, sang Hulyo 30–Agosto 6, 1928. Sadto nga tion 107 ka estasyon sang radyo ang gin-angot sa ginlaragway sang The New York Times subong amo ang ‘pinakamasangkad kag pinakamagasto nga radio hook-up sa maragtas.’ Mapagsik nga ginbaton sang kombension ang isa ka mapuersa nga “Deklarasyon Batok kay Satanas kag Para kay Jehova,” nga nagapatalupangod sang pagkapukan, sa Armagedon, ni Satanas kag sang iya malaut nga organisasyon kag sang kahilwayan sang tanan nga nagahigugma sa pagkamatarong. Nalipay ang matutom nga mga sakop sang Ginharian sang Dios sa pagbaton sing bag-o ginpagua nga balasahon sa amo nga kombension, ang libro nga Government nga may 368 ka pahina. Naghatag ini sing pinakamaathag nga pamatuod “nga ginpalingkod sang Dios sa trono ang iya Tinangdo nga Hari sang 1914.”

Nagagahom si Jehova

 6. Paano ginsugid ni Juan ang pagpahibalo tuhoy sa paglingkod ni Cristo sa trono sa Ginharian sang Dios?

⁶ Nagalingkod na si Cristo sa trono sa Ginharian sang Dios—daw ano ka makalilipay ini nga pahibalo! Nagsugid si Juan: “Kag ang duha ka pulo kag apat ka gulang nga nagalingkod sa ila trono sa atubangan sang Dios naghapa kag nagsimba sa Dios, nga nagasiling: ‘Nagapasalamat kami sa imo, Jehova nga Dios, ang Labing Gamhanan, ang Isa nga amo karon kag amo anay, bangod gingamit mo ang imo daku nga gahom kag nagsugod sa paggahom subong hari.’”—Bugna 11:16, 17.

 7. Paano si Jehova nga Dios ginpasalamatan (a) sang nagkalabilin sang simbuliko nga 24 ka gulang sa duta? (b) sang mga katapo sang simbuliko nga 24 ka gulang nga nabanhaw na padulong sa ila mga duog sa langit?

⁷ Ang mga nagahalad sini nga pasalamat kay Jehova nga Dios amo ang 24 ka gulang, nga nagasimbulo sa hinaplas nga mga kauturan ni Cristo sa ila langitnon nga kahimtangan. Kutob sang 1922 padayon nangin masako ang nagkalabilin sa duta sining 144,000 ka hinaplas sa hilikuton nga ginsugdan sang pagpatunog sa mga trumpeta. Nahangpan nila ang bug-os nga kahulugan sang tanda sa Mateo 24:3–25:46. Apang, bisan sa maaga nga bahin sang adlaw sang Ginuo, ang ila kaupod nga mga saksi nga ‘napamatud-an nga matutom bisan tubtob sa kamatayon’ nabanhaw na agod magpuesto sa ila mga duog sa langit, agod marepresentar na nila ang bug-os nga grupo sang 144,000 sa paghapa kag sa pagsimba kay Jehova. (Bugna 1:10; 2:10) Nagapasalamat gid sila nga wala ginpalantang sang ila Soberano nga Ginuo ang pagtapos sa iya sagrado nga likom!

 8. (a) Ano ang epekto sa mga pungsod sang pagpatunog sa ikapito nga trumpeta? (b) Batok kay sin-o nagpabutyag sang ila kasingkal ang mga pungsod?

⁸ Apang, wala malipay ang mga pungsod sang ginpatunog ang ikapito nga trumpeta. Nag-abot na ang tion nga maeksperiensiahan nila ang kasingkal ni Jehova. Nag-asoy si Juan: “Apang nagsingkal ang mga pungsod, kag nag-abot ang imo kaugalingon nga kasingkal, kag ang gintalana nga tion sa paghukom sa mga patay, kag sa paghatag sang ila padya sa imo mga ulipon nga mga manalagna kag sa mga balaan kag sa mga nagakahadlok sa imo ngalan, ang mga kubos kag ang mga kadalagkuan, kag sa paglaglag sa mga nagalaglag sang duta.” (Bugna 11:18) Halin sang 1914 padayon, mabangis nga ginpabutyag sang mga pungsod sa kalibutan ang ila kasingkal batok sa isa kag isa, batok sa Ginharian sang Dios, kag ilabi na batok sa duha ka saksi ni Jehova.—Bugna 11:3.

 9. Paano ginalaglag sang mga pungsod ang duta, kag ano ang ginpamat-od sang Dios nga himuon sa sini?

⁹ Sa bug-os nga maragtas ginalaglag sang mga pungsod ang duta paagi sa ila walay untat nga pag-inaway kag malain nga pagdumala. Apang, halin sang 1914, makapahangawa ang paggrabe sini nga paglaglag. Ang kakagod kag kagarukan nagresulta sa paglapad sang mga desyerto kag sa pagkadula sang mabungahon nga kadutaan. Ginpierde sang asido nga ulan kag sang radyoaktibo nga mga panganod ang malapad nga mga duog. Ang mga kuluhaan sing pagkaon ginhigkuan. Ang hangin nga aton ginaginhawa kag ang tubig nga aton ginainom mahigko. Ang mga higko sang industriya nagabutang sang kabuhi sa duta kag sa dagat sa katalagman. Kay may tion sang una nga nameligro nga mapapas ang tanan nga katawhan bangod sang mga armas nuklear sang dalagku nga mga kagamhanan sa duta. Makalilipay nga, ‘laglagon ni Jehova ang mga nagalaglag sang duta’; hukman niya ang mga matinaastaason, di-diosnon nga mga tawo nga amo ang may salabton sa makapasubo nga kahimtangan sang duta. (Deuteronomio 32:5, 6; Salmo 14:1-3) Busa, ginahanda ni Jehova ang ikatlo nga kailo, agod papanabton ining mga nakasala.—Bugna 11:14.

Kailo sa mga Manuglaglag!

10. (a) Ano ang ikatlo nga kailo? (b) Sa ano nga paagi ang ikatlo nga kailo nagadala sing kapin pa sa pagpaantos lamang?

¹⁰ Yari na, kon amo, ang ikatlo nga kailo. Nagadali ini sa pag-abot! Amo ini ang paagi ni Jehova sa paglaglag sa mga nagatamay sa iya “palatungan,” ining matahom nga duta nga aton ginapuy-an. (Isaias 66:1) Ginapahikot ini sang Mesianiko nga Ginharian—ang sagrado nga likom sang Dios. Ang mga kaaway sang Dios, kag ang mga lider sang Cristiandad ilabi na, ginpaantos sang nahauna nga duha ka kailo—nga resulta labi na sang mga apan nga kalalat-an kag sang mga mangangabayo nga kasuldadusan; apang ang ikatlo nga kailo, nga pahanabuon mismo sang Ginharian ni Jehova, magadala sing kapin pa sa pagpaantos lamang. (Bugna 9:3-19) Amo ini ang magadula sa malaglagon nga katilingban sang tawo kag sa mga gumalahom sini. Magaabot ini subong talipuspusan sang paghukom ni Jehova sa Armagedon. Subong gid ini sang gintagna ni Daniel: “Kag sa mga adlaw sadto nga mga hari [mga gumalahom nga nagalaglag sang duta] ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay latid nga tion.” Kaangay sang daku nga bukid, ang Ginharian sang Dios magagahom sa duta nga ginhimo nga makalilipay, nga magabindikar sang pagkasoberano ni Jehova kag magahatag sing dayon nga kalipay sa katawhan.—Daniel 2:35, 44; Isaias 11:9; 60:13.

11. (a) Ano nga paagisod nga makalilipay nga mga hitabo ang ginalaragway sang tagna? (b) Ano nga di-bagay nga kaayo ang naagom, paano, kag ni sin-o?

¹¹ Ang ikatlo nga kailo ginaupdan sang paagisod nga makalilipay nga mga hitabo nga magapadayon sa bug-os nga adlaw sang Ginuo. Tion ini nga ‘hukman ang mga patay, kag padyaan sang Dios ang iya mga ulipon nga manalagna kag ang mga balaan kag ang mga nagakahadlok sa iya ngalan.’ Nagakahulugan ina sang pagkabanhaw gikan sa minatay! Para sa hinaplas nga mga balaan nga nagtulog na sa kamatayon, natabo ini sa maaga nga bahin sang adlaw sang Ginuo. (1 Tesalonica 4:15-17) Sa nagakaigo nga tion ang nabilin pa nga mga balaan magabuylog sa ila paagi sa gilayon nga pagkabanhaw. Ang iban man pagapadyaan, lakip ang mga ulipon nga manalagna sang Dios sang dumaan nga mga tion kag ang tanan nga iban pa sa katawhan nga nagakahadlok sa ngalan ni Jehova, bahin man sila sang dakung kadam-an nga makalampuwas sa dakung kapipit-an ukon sang “mga patay, ang dalagku kag magamay,” nga banhawon sa tion sang Milenyo nga Paggahom ni Cristo. Sanglit ginauyatan sang Mesianiko nga Hari sang Dios ang mga yabi sang kamatayon kag sang Hades, ang iya paggahom sa Ginharian magabukas sang dalan agod hatagan sing kabuhi nga walay katapusan ang tanan nga nagatinguha sa sinang hamili nga aman. (Bugna 1:18; 7:9, 14; 20:12, 13; Roma 6:22; Juan 5:28, 29) Kon bala di-mamalatyon nga kabuhi sa langit ukon dayon nga kabuhi sa duta, ining dulot nga kabuhi isa ka di-bagay nga kaayo gikan kay Jehova, nga pasalamatan sing dayon sang tagsa nga magabaton sini!—Hebreo 2:9.

Tan-awa ang Kaban Sang Iya Katipan!

12. (a) Suno sa Bugna 11:19, ano ang nakita ni Juan sa langit? (b) Simbulo sang ano ang kaban sang katipan, kag ano ang natabo sa sini sang mabihag sang Babilonia ang Israel?

¹² Si Jehova nagagahom! Paagi sa iya Mesianiko nga Ginharian, ginapakita niya ang iya pagkasoberano sa katawhan sa isa ka dalayawon nga paagi. Ginaugyunan ini sang masunod nga nakita ni Juan: “Nian nabuksan ang santuaryo sang templo sang Dios sa langit, kag nakita ang kaban sang iya katipan sa santuaryo sang iya templo. Kag may mga kilat kag mga tingog kag mga daguob kag linog kag madamol nga ulan sang yelo.” (Bugna 11:19) Amo lamang ini ang pagsambit sa Bugna sa kaban sang katipan sang Dios. Ang Kaban nangin kitaon nga simbulo sang presensia ni Jehova sa iya katawhan nga Israel. Sa tabernakulo, kag sang ulihi sa templo nga gintukod ni Solomon, gintago ini sa Labing Mataas. Apang sang mabihag sang Babilonia ang Israel sang 607 B.C.E., ang Jerusalem ginhapay kag ang kaban sang katipan nadula. Natabo ina sang ang mga tiglawas sang panimalay ni David nag-untat na sa ‘paglingkod sa trono ni Jehova subong hari.’—1 Cronica 29:23.a

13. Ano ang ginapakita sang kamatuoran nga ang kaban sang katipan sang Dios makita sa langitnon nga santuaryo sang Dios?

¹³ Karon, pagligad sang kapin sa 2,600 ka tuig, nakita liwat ang Kaban. Apang sa palanan-awon ni Juan wala sa isa ka dutan-on nga templo ini nga Kaban. Makita ini sa langitnon nga santuaryo sang Dios. Sa liwat, naggahom si Jehova paagi sa isa ka hari sa harianon nga kaliwatan ni David. Apang, sini nga tion, ang Hari, nga si Cristo Jesus, nagalingkod sa trono sa langitnon nga Jerusalem—ang mataas nga duog nga gikan didto si Jehova magahukom. (Hebreo 12:22) Ipahayag ini sa aton sang masunod nga mga kapitulo sang Bugna.

14, 15. (a) Sa dumaan nga Jerusalem, sin-o lamang ang nakakita sa kaban sang katipan, kag ngaa? (b) Sa langitnon nga santuaryo sang templo sang Dios, sin-o ang makakita sa kaban sang iya katipan?

¹⁴ Sa dumaan nga dutan-on nga Jerusalem, ang Kaban indi makit-an sang mga Israelinhon sa kabilugan, ukon bisan sang mga saserdote nga nagaalagad sa templo, kay yara ini sa sulod sang Labing Balaan nga ginalambayan sang kurtina gikan sa Balaan nga Duog. (Numeros 4:20; Hebreo 9:2, 3) Ang mataas nga saserdote lamang ang makakita sini kon magsulod sia sa Labing Balaan sa tuigan nga Adlaw sang Katumbasan. Apang, sang ginbuksan ang santuaryo sang templo sa langit, kitaon ang simbuliko nga kaban indi lamang sa Mataas nga Saserdote ni Jehova, nga si Jesucristo, kundi sa iya man kabulig nga mga saserdote, ang 144,000 lakip si Juan.

¹⁵ Ang mga nauna nga ginbanhaw padulong sa langit nakakita sining simbuliko nga kaban sa malapit, kay nagpuesto na sila sa ila duog subong bahin sang 24 ka gulang sa palibot sang trono ni Jehova. Kag ginpasanagan sang espiritu ni Jehova ang Juan nga klase sa duta agod mahantop nila ang Iya presensia sa Iya espirituwal nga templo. May natabo man nga mga tanda agod ipahibalo sa katawhan sa kabilugan ining dalayawon nga hitabo. Ang palanan-awon ni Juan nagsambit sing mga kilat, mga tingog, mga daguob, linog, kag pag-ulan sing yelo. (Ipaanggid ang Bugna 8:5.) Ano ang ginasimbulo sini?

16. Paano natabo nga may mga kilat, mga tingog, mga daguob, linog, kag madamol nga ulan nga yelo?

¹⁶ Sugod sang 1914 mabaskog nga mga pagtay-ug ang natabo sa relihion. Apang, makalilipay nga ini nga “linog” gin-updan sang dedikado nga mga tingog nga nagahatag sing maathag nga mensahe nahanungod sa natukod na nga Ginharian sang Dios. Ginpalanog ang nagadaguob nga ‘mga paandam sang bagyo’ gikan sa Biblia. Kaangay sang kilat, ang mga idlab sang paghangop sa matagnaon nga Pulong sang Dios nakit-an kag ginbalhag. Ang mabaskog nga pag-ulan sing “yelo” sang mga paghukom sang Dios ginbuy-an batok sa Cristiandad kag sa butig nga relihion sa kabilugan. Dapat nga natalupangdan ini sang katawhan. Apang, makapasubo nga ang kalabanan—kaangay sang katawhan sang Jerusalem sang tion ni Jesus—wala makahantop sang katumanan sini nga mga tagna sa Bugna.—Lucas 19:41-44.

17, 18. (a) Ang pagpatunog sa mga trumpeta sang pito ka anghel naghatag sing ano nga salabton para sa dedikado nga mga Cristiano? (b) Paano ginatuman sang mga Cristiano ang ila komisyon?

¹⁷ Ang pito ka anghel padayon nga nagpatunog sa ila trumpeta, nga nagapahibalo sang maragtason nga mga hitabo diri sa duta. May daku nga salabton ang dedikado nga mga Cristiano nga padayon nga ipahayag ini nga mga pahibalo sa kalibutan. Malipayon nga ginatuman nila ina nga hilikuton nga gintugyan sa ila! Ginapakita ini sang butang nga, sa sulod sang 20 ka tuig, kutob sang 1986 tubtob 2005, halos nadoble nila ang oras nga ginahinguyang kada tuig sa ministeryo—halin sa 680,837,042 tubtob sa 1,278,235,504. Sa pagkamatuod, “ang sagrado nga likom sang Dios suno sa maayong balita” ginapahibalo “sa mga ukbong sang napuy-an nga duta.”—Bugna 10:7; Roma 10:18.

¹⁸ Ang iban pa nga mga palanan-awon nagahulat karon sa aton samtang ang mga katuyuan sang Ginharian sang Dios padayon nga ginapahayag.

[Nota]

[Kahon sa pahina 173]

Dalagku nga mga Bahin Sang Tulad-Trumpeta nga Pagpahayag Sang mga Paghukom ni Jehova

 1. 1922 Cedar Point, Ohio: Isa ka hangkat sa mga lider sang Cristiandad sa relihion, politika, kag dalagku nga mga negosyo nga ipaathag kon ngaa napaslawan sila sa pagpaluntad sing paghidait, kahamungayaan, kag kalipay. Ang Ginharian sang Mesias amo ang solusyon.

 2. 1923 Los Angeles, California: Ang pamulongpulong publiko nga, “Ang Tanan nga Pungsod Nagamartsa Karon Padulong sa Armagedon, Apang Minilyon Karon nga Nagakabuhi ang Indi Na Makatilaw Sing Kamatayon,” nagpangabay sa mahigugmaon sa paghidait nga “mga karnero” nga biyaan ang makamamatay nga dagat sang katawhan.

 3. 1924 Columbus, Ohio: Ginsumbong ang klero bangod sa pagbayaw sa kaugalingon kag pagpangindi nga ibantala ang Ginharian sang Mesias. Dapat ibantala sang matuod nga mga Cristiano ang pagtimalos sang Dios kag lugpayan ang nagakasubo nga katawhan.

 4. 1925 Indianapolis, Indiana: Isa ka mensahe sang paglaum nga nagapakita sang pagkatuhay sang espirituwal nga kadulom sa Cristiandad kag sang masanag nga saad sang Ginharian tuhoy sa paghidait, kahamungayaan, mapagros nga lawas, kabuhi, kahilwayan, kag dayon nga kalipay.

 5. 1926 London, Inglaterra: Ang tulad-apan nga pagsalot sa Cristiandad kag sa klero sini, nga nagabuyagyag sang ila pagsikway sa Ginharian sang Dios, kag ang pagpanginbulahan sa pagkabun-ag sang langitnon nga panguluhan.

 6. 1927 Toronto, Canada: Isa ka imbitasyon, nga gindul-ong sang daw subong sa mga mangangabayo nga kasuldadusan, nga nagapangabay sa mga tawo nga biyaan ang ‘organisado nga Cristiandad’ kag ipakita ang tinagipusuon nga katutom kay Jehova nga Dios kag sa iya Hari kag Ginharian.

 7. 1928 Detroit, Michigan: Isa ka deklarasyon batok kay Satanas kag para kay Jehova, nga ginapakita sing maathag nga ang hinaplas sang Dios nga Hari, nga naglingkod sa trono sang 1914, magalaglag sa malaut nga organisasyon ni Satanas kag magahilway sa katawhan.

[Kahon sa pahina 175]

Nagalaglag Sang Duta

“Kada tatlo ka segundo isa ka bahin sang orihinal nga maulan nga kagulangan nga subong kadaku sa halampangan sang football ang nagakadula. . . . Ang pagkadula sang panguna nga kagulangan nagapierde sing linibo ka tanom kag mga espesyi sang sapat.”—Illustrated Atlas of the World (Rand McNally).

“Sa duha ka siglo nga pag-istar sang tawo, [ang Great Lakes] nangin pinakadaku man nga imburnal sang kalibutan.”—The Globe and Mail (Canada).

Sang Abril 1986 ang paglupok kag sunog nga natabo sa isa ka planta nuklear sa Chernobyl, U.S.S.R., “amo ang ginakabig nga pinakagrabe nga aksidente nuklear . . . halin sang ginbombahan ang Hiroshima kag Nagasaki,” nga nagpalapta “sing nagadugay nga radiasyon sa hangin, duta kag tubig sang kalibutan nga subong kadamo sa tanan nga nuclear test kag mga bomba nuklear nga napalupok na.”—JAMA; The New York Times.

Sa Minamata, Japan, isa ka planta sang kemikal ang nagpalapta sing hilo nga methylmercury sa linaw. Ang pagkaon sing mga isda kag mga pakinhason nga nahiluan sini nagtuga sing Minamata disease (MD) isa ka “wala na nagaayo nga balatian sa nerbio. . . . Tubtob sa karon [1985], 2578 ka tawo sa bug-os nga Japan ang opisyal nga napamatud-an nga may MD.”—International Journal of Epidemiology.

[Kahon sa pahina 176]

Ang mabug-at nga mga kapahayagan sa Bugna 11:15-19 isa lamang ka introduksion sa magasunod pa nga mga palanan-awon. Ang Bugna kapitulo 12 isa ka pagbalikid sa nagligad nga nagalaragway sang kapin nga detalye tuhoy sa daku nga mga kapahayagan sa Bugna 11:15, 17. Ang kapitulo 13 nagahatag sing mga impormasyon sa 11:18, samtang ginalaragway sini ang ginhalinan kag paglambo sang politikal nga organisasyon ni Satanas nga nagalaglag sang duta. Ang kapitulo 14 kag 15 dugang pa nga nagadetalye sang mga paghukom sang Ginharian nga naangot sa pagpatunog sa ikapito nga trumpeta kag sa ikatlo nga kailo.

[Mga Retrato sa pahina 174]

‘Laglagon’ ni Jehova ang “mga nagalaglag sang duta”