Kapitulo 107

Ang Ilustrasyon Tuhoy sa Punsyon sa Kasal

PAAGI sa duha ka ilustrasyon, ginbuyagyag ni Jesus ang mga escriba kag puno nga mga saserdote, kag luyag nila sia patyon. Apang wala pa makatapos si Jesus sa ila. Ginsugiran niya sila sing isa pa ka ilustrasyon, nga nagasiling:

“Ang ginharian sang langit kaangay sang isa ka tawo, nga isa ka hari, nga naghimo sing punsyon sa kasal sa iya anak. Kag ginpakadto niya ang iya mga ulipon sa pagtawag sang mga inagda sa punsyon sa kasal, apang indi sila magkari.”

Si Jehova nga Dios amo ang Hari nga nagahanda sing punsyon sa kasal para sa iya Anak, si Jesucristo. Sa ulihi, ang nobya nga 144,000 ka hinaplas nga sumulunod mahiusa kay Jesus sa langit. Ang mga alagad sang Hari amo ang katawhan sang Israel, nga, ginpasulod sa Kasuguan nga katipan sang 1513 B.⁠C.⁠E., nakabaton sing kahigayunan nga mangin “ginharian sang mga saserdote.” Busa, sadto nga okasyon, una sila nga gin-agda sa punsyon sa kasal.

Apang, ang una nga pagtawag sa mga inagda ginhimo lamang sang tigragas sang 29 C.⁠E., sang si Jesus kag ang iya mga disipulo (ang mga ulipon sang hari) nagsugod sa pagbantala sang Ginharian. Apang ang kinaugali nga mga Israelinhon nga nakabaton sining tawag sang mga ulipon kutob sang 29 C.⁠E. tubtob 33 C.⁠E. indi handa sa pagkari. Gani ang Dios naghatag sa pungsod sang mga inagda sing isa pa ka kahigayunan, subong sang ginaasoy ni Jesus:

“Liwat ginpakadto niya ang iban nga mga ulipon, nga nagasiling, ‘Sugiri ninyo ang mga inagda: “Yari karon! Nahanda ko ang akon pagkaon, ang akon mga baka kag mga tinday nga pinatambok naihaw, kag ang tanan nahanda na. Kari kamo sa punsyon sa kasal.” ’ ” Ining ikaduha kag katapusan nga pagtawag sa mga inagda nagsugod sang Pentecostes 33 C.⁠E., sang ang balaan nga espiritu ginpasagahay sa mga sumulunod ni Jesus. Ining tawag nagpadayon tubtob sang 36 C.⁠E.

Apang, ang kalabanan sang mga Israelinhon nagyaguta man sa sini nga pagtawag. “Sila wala magsapak sini kag naglakat sila,” siling ni Jesus, “ang isa sa iya uma, ang isa sa iya palangitan-an; kag ang iban nagdakop sang iya mga ulipon, nagpasipala kag nagpatay sa ila.” “Apang,” padayon ni Jesus, “ang hari naalipungot, kag ginpadala niya ang iya mga mangangaway kag ginlaglag yadtong mga manugpatay kag ginsunog ang siudad nila.” Natabo ini sang 70 C.⁠E., sang ang Jerusalem ginsunog sang mga Romano, kag ang mga manugpatay ginpatay.

Nian ginapaathag ni Jesus kon ano ang natabo sa karon: “Nian nagsiling [ang hari] sa iya mga ulipon, ‘Ang kasal handa na, apang ang mga inagda indi takus. Busa kadto kamo sa mga dalan, kag agdaha ninyo sa punsyon ang tanan nga inyo masugata.’ ” Amo sini ang ginhimo sang mga ulipon, kag “ang hulot para sa seremonya sang kasal napuno sang mga nagalingkod sa lamisa.”

Ining hilikuton sa pagtipon sa mga bisita halin sa mga dalan sa guwa sang siudad sang mga inagda nagsugod sang 36 C.⁠E. Ang Romano nga opisyal sang hangaway nga si Cornelio kag ang iya pamilya amo ang una sa disirkunsidado nga mga di-Judiyo nga gintipon. Ang pagtipon sa sining mga di-Judiyo, tanan sila mga tal-us sadtong una nga wala magbaton sang panawag, nagpadayon tubtob sa ika-20 nga siglo.

Diri sini sa ika-20 nga siglo nga ang hulot para sa seremonya sang kasal napuno. Nian ginsugid ni Jesus kon ano ang natabo, nga nagasiling: “Sang nagsulod ang hari sa pagtan-aw sang mga inagda nakita niya didto ang isa ka tawo nga wala sing panapton nga sa kasal. Kag nagsiling sia sa iya, ‘Abyan, paano bala nga nagsulod ka diri nga wala sing panapton nga sa kasal?’ Naurungan sia. Nian ang hari nagsiling sa mga alagad, ‘Gapusa ninyo sia sa kamot kag sa tiil kag ipilak sa kadudulman nga sa guwa. Didto ang mga tawo magahibi kag magabagrot sang ila mga ngipon.’ ”

Ang tawo nga wala sing panapton nga sa kasal nagalaragway sa dimatuod nga mga Cristiano sang Cristiandad. Wala gid sila ginkilala sang Dios subong may nagakaigo nga pagkakilala subong espirituwal nga mga Israelinhon. Wala gid sila ginhaplas sang Dios sing balaan nga espiritu subong mga manunubli sang Ginharian. Gani ginpilak sila sa kadudulman nga sa guwa diin ginlaglag sila.

Ginhinakpan ni Jesus ang iya ilustrasyon paagi sa pagsiling: “Kay madamo ang ginatawag, apang pila lamang ang ginapili.” Huo, madamo ang gin-agda gikan sa pungsod sang Israel agod mangin katapo sang nobya ni Cristo, apang pila lamang sang kinaugali nga mga Israelinhon ang ginpili. Ang kalabanan sang 144,000 ka inagda nga nakabaton sang langitnon nga padya indi mga Israelinhon. Mateo 22:​1-14; Exodo 19:​1-6; Bugna 14:1-3.

▪ Sin-o ang una nga gin-agda sa punsyon sa kasal, kag san-o sila gin-agda?

▪ San-o ang una nga pagtawag sa mga inagda, kag sin-o ang mga ulipon nga gingamit sa paghimo sini?

▪ San-o ginhatag ang ikaduha nga pagtawag, kag sin-o pagkatapos ang gin-agda?

▪ Sin-o ang ginalaragway sang tawo nga walay panapton nga sa kasal?

▪ Sin-o ang madamo nga gintawag, kag ang pila nga ginpili?