Kapitulo Beinte-tres

“Bag-o nga Ngalan”

Isaias 62:1-12

 1. Ano nga pasalig ang narekord sa Isaias kapitulo 62?

PASALIG, paglipay, paglaum nga ipasag-uli—amo ini ang ginakinahanglan sang desperado nga mga Judiyo sa Babilonia. Pila ka dekada na ang nagligad kutob sang ginlaglag ang Jerusalem kag ang templo sini. Mga 800 kilometros ang kalayuon gikan sa Babilonia, nagpabilin nga nahapay ang Juda, kag daw nalipatan na ni Jehova ang mga Judiyo. Ano ang makapauswag sang ila kahimtangan? Amo ang mga saad gikan kay Jehova nga papaulion niya sila kag tugutan sila nga ipasag-uli ang putli nga pagsimba. Nian ang mga paglaragway subong sang “ginbiyaan sing bug-os” kag “nahapay” pagabuslan sing mga ngalan nga nagapakita sang kahamuot sang Dios. (Isaias 62:4; Zacarias 2:12) Ang kapitulo 62 sang Isaias puno sing amo sini nga mga saad. Apang, kaangay sang iban pa nga mga tagna tuhoy sa pagpasag-uli, indi lamang tuhoy sa kahilwayan sang mga Judiyo gikan sa pagkabihag sa Babilonia ang ginabinagbinag sini nga kapitulo. Sa daku nga katumanan sini, ginapasalig kita sang Isaias kapitulo 62 nga sigurado gid ang kaluwasan sang espirituwal nga pungsod ni Jehova, ang “Israel sang Dios.”​—Galacia 6:16.

Wala Nagapabilin nga Mahipos si Jehova

 2. Sa anong paagi nagpakita liwat si Jehova sing kaayo sa Sion?

² Ginpukan ang Babilonia sang 539 B.C.E. Pagkatapos sadto, nagmando si Hari Ciro sang Persia nga papaulion ang mahinadlukon-sa-Dios nga mga Judiyo sa Jerusalem kag ipasag-uli ang pagsimba kay Jehova. (Esdras 1:​2-4) Sang 537 B.C.E., ang una nga grupo sang nagpauli nga mga Judiyo nakalab-ot na sa ila dutang natawhan. Liwat nga ginpakitaan ni Jehova sing kaayo ang Jerusalem, subong sang ginapakita sang iya mahigugmaon nga gintagna: “Tungod sa Sion indi ako magpabilin nga nagapahimunong, kag tungod sa Jerusalem indi ako magpabilin nga nagahipos tubtob nga ang iya pagkamatarong magsilak subong sang kasanag, kag ang iya kaluwasan subong sang sulo nga nagadabdab.”​—Isaias 62:1.

 3. (a) Ngaa ginsikway sang ulihi ni Jehova ang dutan-on nga Sion, kag sin-o ang nagbulos sa iya? (b) Ano nga pagtalikod ang natabo, kag san-o, kag sa ano nga hut-ong sang tion nagakabuhi kita karon?

³ Sang 537 B.C.E., gintuman ni Jehova ang iya saad nga ipasag-uli ang Sion, ukon Jerusalem. Naeksperiensiahan sang mga pumuluyo sini ang iya pagluwas kag nagsilak sing masanag ang ila pagkamatarong. Apang, sang ulihi, amat-amat nga ginbiyaan nila liwat ang putli nga pagsimba. Sang ulihi, ginsikway nila si Jesus subong Mesias, kag sang ulihi ginbiyaan sila ni Jehova subong iya pinili nga pungsod. (Mateo 21:​43; 23:​38; Juan 1:​9-​13) Isa ka bag-o nga pungsod, ang “Israel sang Dios,” ang ginpahanabo ni Jehova nga mabun-ag. Ining bag-o nga pungsod nangin iya pinasahi nga katawhan, kag sang nahauna nga siglo, ang mga katapo sini makugi nga nagbantala sing maayong balita sa kilala sadto nga kalibutan. (Galacia 6:​16; Colosas 1:23) Makapasubo nga sang napatay na ang mga apostoles, natabo ang pagtalikod gikan sa matuod nga relihion. Subong resulta, isa ka apostata nga porma sang Cristianismo ang naglutaw, subong sang masapwan karon sa Cristiandad. (Mateo 13:​24-​30, 36-​43; Binuhatan 20:​29, 30) Sa sulod sang mga siglo, gintugutan ang Cristiandad nga pakahuy-an ang ngalan ni Jehova. Apang, sang ulihi, sang 1914, ang “tuig sang maayong kabubut-on” ni Jehova nagsugod, upod ang daku nga katumanan sini nga bahin sang tagna ni Isaias.​​—Isaias 61:2.

4, 5. (a) Sin-o ang ginasimbulo karon sang Sion kag sang iya mga anak? (b) Sa anong paagi gingamit ni Jehova ang Sion agod himuon ang “iya kaluwasan subong sang sulo nga nagadabdab”?

⁴ Sa karon ang saad ni Jehova nga ipasag-uli ang Sion natuman sa iya langitnon nga organisasyon, ang “Jerusalem sa ibabaw,” nga ginatiglawas sa duta sang iya mga anak, ang hinaplas-sang-espiritu nga mga Cristiano. (Galacia 4:26) Ang langitnon nga organisasyon ni Jehova nagapangalagad subong isa ka mahugod nga kabulig​—mabinantayon, mahigugmaon, kag mapisan. Makakulunyag gid ang okasyon sang ginbun-ag sini sang 1914 ang Mesianikong Ginharian! (Bugna 12:​1-5) Sugod sang 1919 ilabi na, ginbantala sang iya dutan-on nga mga anak sa mga pungsod ang iya pagkamatarong kag kaluwasan. Subong sang gintagna ni Isaias, ginpasanag sining mga anak ang kadudulman subong sang isa ka sulo, nga ginapaiwag ang ila kapawa.​—Mateo 5:​15, 16; Filipos 2:15.

⁵ Interesado gid si Jehova sa iya mga sumilimba kag indi sia magpahimunong, ukon magpabilin nga nagahipos, tubtob matuman niya ang tanan nga ginsaad niya sa Sion kag sa iya mga anak. Wala man nagahipos ang mga nagkalabilin sang mga hinaplas kag ang ila “iban nga mga karnero” nga mga kaupod. (Juan 10:16) Magahod gid sila samtang ginatudlo nila sa katawhan ang lamang nga dalan sang kaluwasan.​—Roma 10:10.

“Bag-o nga Ngalan” nga Ginhatag ni Jehova

 6. Ano ang ginahunahuna ni Jehova para sa Sion?

⁶ Ano ang ginahunahuna ni Jehova para sa Sion, ang iya langitnon nga “babayi,” nga ginrepresentar sang dumaan nga Jerusalem? Sia nagsiling: “Pat-od nga makita sang mga pungsod ang imo pagkamatarong, O babayi, kag sang tanan nga hari ang imo himaya. Kag pagatawgon gid ikaw sa bag-o nga ngalan, nga ihingalan sang baba mismo ni Jehova.” (Isaias 62:2) Samtang nagapanghikot sa pagkamatarong ang mga Israelinhon, napilitan ang mga pungsod sa pagtulok sing maayo. Bisan gani ang mga hari napilitan sa pagkilala nga ginagamit ni Jehova ang Jerusalem kag ang bisan ano nga pagginahom wala sa kamalingking kon ipaanggid sa Ginharian ni Jehova.​—Isaias 49:23.

 7. Ano ang kahulugan sang bag-o nga ngalan sang Sion?

⁷ Ginpamatud-an karon ni Jehova ang nagbag-o nga kahimtangan sang Sion paagi sa paghatag sa iya sing bag-o nga ngalan. Ining bag-o nga ngalan nagakahulugan sang ginpakamaayo kag ginpadunggan nga kahimtangan sang dutan-on nga mga anak sang Sion sugod sang 537 B.C.E.a Ginapakita sini nga ginakilala ni Jehova ang iya pagpanag-iya sa Sion. Sa karon, nakunyag gid ang Israel sang Dios nga nahamuot sa ila si Jehova sa sining paagi, kag ang iban nga mga karnero nagakasadya upod sa ila.

 8. Sa anong mga paagi ginpadunggan ni Jehova ang Sion?

⁸ Sa tapos mahatagan ang Sion sang iya bag-o nga ngalan, nagsaad karon si Jehova: “Ikaw mangin isa ka korona sang katahom sa kamot ni Jehova, kag isa ka harianon nga turbante sa palad sang imo Dios.” (Isaias 62:3) Ginapatalupangod ni Jehova ang iya simbuliko nga asawa, ang langitnon nga Sion, agod tamdon nga may pagdayaw. (Salmo 48:​2; 50:2) Ang korona sang katahom kag ang “harianon nga turbante” nagapakita nga napanaptan sia sing kadungganan kag awtoridad. (Zacarias 9:16) Subong tiglawas sang langitnon nga Sion, ukon “Jerusalem sa ibabaw,” ang Israel sang Dios isa ka talalupangdon nga resulta sang kamot sang Dios​​—ang iya gingamit nga gahom​—​nga nagapanghikot. (Galacia 4:26) Upod sa bulig ni Jehova, nakahimo ining espirituwal nga pungsod sing isa ka talalupangdon nga rekord sang integridad kag debosyon. Minilyon, nga nagalakip sang mga hinaplas kag iban nga mga karnero, ang ginapabakod sa pagpakita sing talalupangdon nga pagtuo kag gugma. Sa tion sang Isa ka Libo ka Tuig nga Paghari ni Cristo, bangod matigayon na sang mga hinaplas ang ila mahimayaon nga langitnon nga padya, mangin instrumento sila sa kamot ni Jehova agod bayawon ang nagaugayong nga mga tinuga padulong sa kabuhi nga walay katapusan.​—Roma 8:​21, 22; Bugna 22:2.

‘Nahamuot si Jehova sa Imo’

 9. Ilaragway ang pagbag-o sang Sion.

⁹ Ang paghatag sing bag-o nga ngalan isa ka bahin sang makalilipay nga pagbag-o sang langitnon nga Sion nga ginatiglawas sang iya dutan-on nga mga anak. Aton mabasa: “Indi ka na pagtawgon nga isa ka babayi nga ginbiyaan sing bug-os; kag ang imo duta indi na pagsilingon nga nahapay; kundi tawgon ikaw nga Ang Akon Kahamuot Yara sa Iya, kag ang imo duta nga Ginapanag-iyahan Subong Asawa. Kay si Jehova mahamuot sa imo, kag ang imo duta panag-iyahan subong isa ka asawa.” (Isaias 62:4) Ang dutan-on nga Sion nahapay sugod sang ginlaglag ini sang 607 B.C.E. Apang, ginapasalig sia sang mga pulong ni Jehova nga ipasag-uli sia kag puy-an liwat ang iya duta. Ang nahapay anay nga Sion indi na mangin isa ka babayi nga ginbiyaan sing bug-os, kag ang iya duta indi na mangin nahapay. Ang pagpasag-uli sang Jerusalem sang 537 B.C.E. nagakahulugan sing isa ka bag-o nga kahimtangan para sa iya, nga baliskad gid sa iya anay nahapay nga kahimtangan. Nagsiling si Jehova nga ang Sion pagatawgon nga “Ang Akon Kahamuot Yara sa Iya,” kag ang iya duta, “Ginapanag-iyahan Subong Asawa.”​—Isaias 54:​1, 5, 6; 66:8; Jeremias 23:​5-8; 30:​17; Galacia 4:​27-​31.

10. (a) Paano nagbag-o ang Israel sang Dios? (b) Ano ang “duta” sang Israel sang Dios?

¹⁰ Sugod sang 1919 kaanggid man nga pagbag-o ang naeksperiensiahan sang Israel sang Dios. Sa tion sang nahauna nga bug-os kalibutan nga inaway, daw subong bala nga ang hinaplas nga mga Cristiano ginsikway sang Dios. Apang sang 1919 ang ila nahamut-an nga kahimtangan ginpasag-uli, kag ang ila paagi sang pagsimba, ginpaputli. Naapektuhan sini ang ila mga panudlo, ang ila organisasyon, kag ang ila pagpanghikot. Ang Israel sang Dios nagkadto sa “duta” sini, ang espirituwal nga kahimtangan sini, ukon duog nga ginapanghikutan.​​—Isaias 66:​7, 8, 20-​22.

11. Paano napanag-iyahan sang mga Judiyo ang ila iloy subong asawa?

¹¹ Agod ipadaku sing dugang pa ang bag-o kag nahamut-an nga kahimtangan sang iya katawhan, si Jehova nagsiling: “Subong nga ang isa ka pamatan-on nga lalaki nagapanag-iya sa isa ka ulay subong iya asawa, ang imo mga anak magapanag-iya sa imo subong asawa. Kag subong sang paghugyaw sang nobyo tungod sa nobya, ang imo Dios magahugyaw tungod sa imo.” (Isaias 62:5) Paano ang mga Judiyo, nga “mga anak” sang Sion, makapanag-iya sa ila iloy subong asawa? Bangod ang nagbalik nga mga anak sang Sion gikan sa pagkabihag sa Babilonia magapanag-iya sang ila daan nga kapital nga siudad kag magapuyo liwat sa sini. Kon matabo ini, ang Sion indi na nahapay kundi puno sing mga anak.​—Jeremias 3:14.

12. (a) Sa anong paagi maathag nga ginpakita ni Jehova nga ang hinaplas nga mga Cristiano bahin sang organisasyon nga naangot sa iya paagi sa pag-asawahay? (b) Paano ang mga pagpakig-angot ni Jehova sa iya katawhan nagahatag sing isa ka halangdon nga modelo para sa pag-asawahay karon? (Tan-awa ang kahon sa pahina 342.)

¹² Sa kaanggid nga paagi, sugod sang 1919 ginpanag-iyahan sang mga anak sang langitnon nga Sion ang ila duta, ang ila espirituwal nga kahimtangan, nga may matagnaon nga ngalan nga “Ginapanag-iyahan Subong Asawa.” Ang ila Cristianong pagpanghikot sa sini nga duta nagpamatuod nga ining hinaplas nga mga Cristiano amo ang “katawhan para sa iya [Jehova] ngalan.” (Binuhatan 15:14) Ang ila pagpatubas sing mga bunga sang Ginharian kag pagpakilala sa ngalan ni Jehova maathag nga nagapamatuod nga si Jehova nahamuot sa sining mga Cristiano. Maathag nga ginpakita niya nga bahin sila sang organisasyon nga naangot sa iya paagi sa indi mabungkag nga paghiusa. Paagi sa paghaplas sing balaan nga espiritu sa sining mga Cristiano, paghilway sa ila gikan sa espirituwal nga pagkabihag, kag paggamit sa ila agod magbantala sang paglaum sa Ginharian sa tanan nga katawhan, ginpakita ni Jehova nga nagakasadya sia tungod sa ila subong sang pagkalipay sang nobyo tungod sa nobya.​—Jeremias 32:41.

“Indi Kamo Maghipos”

13, 14. (a) Sa dumaan nga mga tion, paano ang Jerusalem nangin isa ka siudad nga nagaaman sing kalig-unan? (b) Sa modernong mga tion, paano ang Sion nangin “isa ka kadayawan sa duta”?

¹³ Ang malaragwayon nga bag-o nga ngalan nga ginhatag ni Jehova nagahatag sing kalig-unan sa iya katawhan. Nahibaluan nila nga ginakilala niya sila kag nga sia ang ila tag-iya. Paagi naman karon sa isa ka tuhay nga ilustrasyon, nagpakighambal si Jehova sa iya katawhan nga daw subong sang isa ka napaderan nga siudad: “Sa ibabaw sang imo mga pader, O Jerusalem, nagbutang ako sing mga manugbantay. Sa bug-os nga adlaw kag sa bug-os nga gab-i, sing dalayon, indi sila pagpauntata. Kamo nga nagahambal tuhoy kay Jehova, indi kamo maghipos, kag indi sia paghatagi sing kalinungan tubtob mapasad niya sing malig-on, huo, tubtob mapahamtang niya ang Jerusalem subong isa ka kadayawan sa duta.” (Isaias 62:6, 7) Sa gintalana nga tion ni Jehova kon makabalik na ang matutom nga nagkalabilin gikan sa Babilonia, ang Jerusalem mangin “isa ka kadayawan sa duta”​—isa ka napaderan nga siudad nga nagahatag sing kalig-unan sa iya mga pumuluyo. Sa adlaw kag gab-i, ang mga manugbantay sa sining mga pader alisto gid agod masigurado ang kalig-unan sang siudad kag agod maghatag sing nagapaandam nga mga mensahe sa iya mga banwahanon.​—Nehemias 6:​15; 7:​3; Isaias 52:8.

¹⁴ Sa modernong mga tion ginagamit ni Jehova ang iya hinaplas nga mga manugbantay agod ipakita sa mga mahagop ang dalan padulong sa kahilwayan gikan sa pagkaulipon sa butig nga relihion. Ginaagda ini sila nga magsulod sa iya organisasyon, diin makatigayon sila sing proteksion gikan sa espirituwal nga pagdagta, di-diosnon nga mga impluwensia, kag sa kaakig ni Jehova. (Jeremias 33:​9; Sofonias 3:19) Sa pag-aman sini nga proteksion, importante gid ang papel sang manugbantay nga klase, “ang matutom kag mainandamon nga ulipon,” nga nagaaman sing espirituwal nga “pagkaon sa nagakaigo nga tion.” (Mateo 24:​45-​47) Sa pagpangabudlay upod sa manugbantay nga klase, ang “dakung kadam-an” nagatungod man sing isa ka importante nga papel sa paghimo sa Sion nga “isa ka kadayawan sa duta.”​—Bugna 7:9.

15. Paano ang manugbantay nga klase kag ang ila mga kaupod nagaalagad kay Jehova sing dalayon?

¹⁵ Nagapadayon gihapon ang pag-alagad sang manugbantay nga klase kag sang ila mga kaupod! Ang ila bug-os-kalag nga panimuot makita sa makugi nga pagpanghikot sang minilyon ka matutom nga indibiduwal nga ginasakdag sang nagalakbay nga mga manugtatap kag sang ila mga asawa; sang mga boluntaryo sa lainlain nga mga puluy-an Bethel kag mga imprintahan sang mga Saksi ni Jehova; sang mga misyonero; kag sang espesyal, regular, kag auxiliary nga mga payunir. Dugang pa, nagapangabudlay sila sing lakas sa pagpatindog sing bag-o nga mga Kingdom Hall, pagduaw sa mga nagabalatian, pagbulig sa mga indibiduwal nga nagaatubang sing makahalangkat nga mga kahimtangan sa pagpabulong, kag paghatag sing sibu-sa-tion nga mga bulig sa mga biktima sang mga kalamidad kag mga aksidente. Madamo sining nagasakripisyo-sang-kaugalingon nga mga indibiduwal ang masami nga nagaalagad sa literal nga “adlaw kag gab-i”!​​—Bugna 7:​14, 15.

16. Sa anong paagi nga ang mga alagad ni Jehova ‘wala nagahatag sa iya sing kalinungan’?

¹⁶ Ginapalig-on ang mga alagad ni Jehova nga indi mag-untat sa pagpangamuyo, nga mangabay sa Dios nga ang iya ‘kabubut-on himuon, kon paano sa langit, subong man sa duta.’ (Mateo 6:​9, 10; 1 Tesalonica 5:17) Ginalaygayan sila: “Indi sia [Jehova] paghatagi sing kalinungan” tubtob mahatag ang mga handum kag mga paglaum tuhoy sa pagpasag-uli sang matuod nga pagsimba. Ginpadaku ni Jesus ang kinahanglanon nga mangamuyo sing dalayon, nga nagapalig-on sa iya mga sumulunod nga ‘magtuaw sa [Dios] sa adlaw kag gab-i.’​​—Lucas 18:​1-8.

Padyaan ang Pag-alagad sa Dios

17, 18. (a) Sa anong paagi makapaabot ang mga pumuluyo sang Sion nga maagom nila ang mga bunga sang ila pinangabudlayan? (b) Paano ang katawhan ni Jehova karon nagaagom sang mga bunga sang ila pinangabudlayan?

¹⁷ Ang bag-o nga ngalan nga ginhatag ni Jehova sa iya katawhan nagapasalig sa ila nga ang ila mga panikasog indi mangin walay pulos. “Si Jehova nagpanumpa paagi sa iya tuo nga kamot kag paagi sa iya makusog nga butkon: ‘Indi ko na pag-ihatag ang imo uyas subong kalan-on sa imo mga kaaway, ni ang mga dumuluong mag-inom sang imo bag-o nga alak, nga imo ginpangabudlayan. Kundi ang mga nagatipon mismo sini magakaon sini, kag sila pat-od nga magadayaw kay Jehova; kag ang mga nagatipon mismo sini magainom sini sa akon balaan nga mga luwang.’ ” (Isaias 62:​8, 9) Ang tuo nga kamot kag makusog nga butkon ni Jehova nagasimbulo sa iya gahom kag kusog. (Deuteronomio 32:​40; Ezequiel 20:5) Ang iya pagpanumpa paagi sa sini nagapakita nga determinado sia nga bag-uhon ang mga nagakatabo sa Sion. Sang 607 B.C.E., gintugutan ni Jehova ang mga kaaway sang Sion nga kawatan sia kag agawon ang iya mga pagkabutang. (Deuteronomio 28:​33, 51) Apang karon, ang mga pagkabutang sang Sion matigayon lamang sang mga may kinamatarong sa sini.—Deuteronomio 14:​22-​27.

¹⁸ Sa modernong-adlaw nga katumanan sini nga saad, ang napasag-uli nga katawhan ni Jehova nagaeksperiensia sing dakung espirituwal nga kabuganaan. Ginaagom nila sing bug-os ang mga bunga sang ila pinangabudlayan​​—ang nagdugang nga kadamuon sang Cristianong mga disipulo kag ang bugana nga espirituwal nga pagkaon. (Isaias 55:​1, 2; 65:14) Bangod matutom ang iya katawhan, wala ginatugutan ni Jehova ang ila mga kaaway nga upangan ang ila espirituwal nga kabuganaan ukon kawatan sila sang mga resulta sang ila bug-os-kalag nga pag-alagad. Wala sing hilikuton nga ginahimo para sa pag-alagad kay Jehova ang walay pulos.​​—Malaquias 3:​10-​12; Hebreo 6:10.

19, 20. (a) Paano ginhawanan ang dalan para sa pagbalik sang mga Judiyo sa Jerusalem? (b) Paano sa modernong mga tion ginhawanan ang dalan agod makasulod ang mga mahagop sa organisasyon ni Jehova?

¹⁹ Ang bag-o nga ngalan nagahimo man sang organisasyon ni Jehova nga makagalanyat sa bunayag-sing-tagipusuon nga katawhan. Madamo gid ang nagapanong sa sini, kag ang dalan ginapabay-an nga bukas para sa ila. Ang tagna ni Isaias nagsiling: “Magguwa kamo, magguwa kamo sa mga gawang. Hawani ang dalan sang katawhan. Tampuki ninyo, tampuki ninyo ang daku nga dalan. Panguhaa ang mga bato sa sini. Magbayaw kamo sing isa ka sinyales para sa mga katawhan.” (Isaias 62:10) Sa una nga hitabo, mahimo gid nga ining panawag nagapatuhoy sa mga nagaguwa sa mga gawang sang mga siudad sang Babilonia agod magbalik sa Jerusalem. Dapat panguhaon sang manugpauli nga mga Judiyo ang mga bato gikan sa dalan agod mangin mas mahapos ang ila paglakbay kag agod magbutang sing sinyales nga magapakita sang dalan.​—Isaias 11:12.

²⁰ Sugod sang 1919, ang hinaplas nga mga Cristiano ginpain para sa pag-alagad sa Dios kag nagalakbay sila sa “Alagyan sang Pagkabalaan.” (Isaias 35:8) Sila ang una gid nga nag-agi sa espirituwal nga daku nga dalan gikan sa Babilonia nga Daku. (Isaias 40:​3; 48:20) Ginhatagan sila sang Dios sing pribilehiyo nga manguna sa pagbantala sang iya gamhanan nga mga binuhatan kag sa pagpakita sa iban pa sang alagyan padulong sa daku nga dalan. Ang pagpanguha sang mga bato gikan sa sini​—ang paghawan sa mga butang nga nagapasandad—​para gid sa ila kaayuhan. (Isaias 57:14) Dapat nila mahangpan sing maathag ang mga katuyuan kag mga panudlo sang Dios. Ang butig nga mga pagtuluuhan mga bato nga nagapasandad sa banas sang kabuhi, apang ang Pulong ni Jehova “kaangay sang maso nga nagadugmok sang igang.” Paagi sa sini, ginadugmok sang hinaplas nga mga Cristiano ang nagapasandad nga mga bato nga makapasandad sa mga luyag mag-alagad kay Jehova.​​—Jeremias 23:29.

21, 22. Ano nga sinyales ang ginbutang ni Jehova para sa mga nagabiya sa butig nga relihion, kag paano naton nahibaluan ini?

²¹ Sang 537 B.C.E., ang Jerusalem nangin amo ang sinyales nga nag-agda sa Judiyong nagkalabilin nga magbalik kag patindugon liwat ang templo. (Isaias 49:22) Sang 1919 sang ginluwas ang hinaplas nga nagkalabilin gikan sa pagkaulipon sa butig nga relihion, wala sila magdalangdalang. Nahibaluan nila ang ila destinasyon, kay nagbutang si Jehova sing sinyales para sa ila. Ano nga sinyales? Ang sinyales man nga gintagna sa Isaias 11:​10, nga mabasa: “Mahanabo sa amo nga adlaw nga ang gamot ni Jesse magatindog subong isa ka sinyales para sa katawhan.” Gin-aplikar ni apostol Pablo ining mga pulong kay Jesus. (Roma 15:​8, 12) Huo, ang sinyales amo si Cristo Jesus, nga nagagahom subong Hari sa langitnon nga Bukid Sion!​—Hebreo 12:​22; Bugna 14:1.

²² Sa palibot ni Jesucristo, ang hinaplas nga mga Cristiano kag ang iban nga mga karnero ginatipon agod magpakigbahin sa nagapahiusa nga pagsimba sa Labing Mataas nga Dios. Ang iya paggahom nagabindikar sa bug-os uniberso nga pagkasoberano ni Jehova kag nagapakamaayo sa mga bunayag sing tagipusuon gikan sa tanan nga pungsod sang duta. Indi bala ini rason nga magbuylog ang tagsatagsa sa aton sa pagbayaw sa iya paagi sa pagdayaw?

“Ang Imo Kaluwasan Magaabot”!

23, 24. Paano ginadala ang kaluwasan sa mga nagatuo sa Dios?

²³ Ang bag-o nga ngalan nga ginhatag ni Jehova sa iya tulad-asawa nga organisasyon may yara kaangtanan sa dayon nga kaluwasan sang iya mga anak. Si Isaias nagsulat: “Yari karon! Ginapabati ini ni Jehova tubtob sa pinakamalayo nga bahin sang duta: ‘Isiling ninyo sa anak nga babayi sang Sion, “Yari karon! Ang imo kaluwasan magaabot. Yari karon! Ang padya nga ihatag niya yara sa iya, kag ang mga suhol nga ibayad niya yara sa iya atubangan.”’” (Isaias 62:11) Natigayon sang mga Judiyo ang kaluwasan sang mapukan ang Babilonia kag nagbalik sila sa ila dutang natawhan. Apang ining mga pulong nagapatuhoy sa daku pa nga butang. Ang ginsiling ni Jehova nagapahanumdom sang gintagna ni Zacarias tuhoy sa Jerusalem: “Magkalipay sing tuman, O anak nga babayi sang Sion. Magsinggit sa kadalag-an, O anak nga babayi sang Jerusalem. Yari karon! Ang imo hari nagaabot sa imo. Matarong sia, huo, ginluwas; mapainubuson, kag nagasakay sa asno, sa isa ka husto sa kagulangon nga sapat nga anak sang asna.”​—Zacarias 9:9.

²⁴ Pagligad sang tatlo ka tuig kag tunga sa tapos mabawtismuhan si Jesus sa tubig kag ginhaplasan sang espiritu sang Dios, nagsakay sia pasulod sa Jerusalem kag gintinluan niya ang templo sini. (Mateo 21:​1-5; Juan 12:​14-​16) Sa karon, si Jesucristo amo ang nagadala sing kaluwasan gikan kay Jehova sa tanan nga nagatuo sa Dios. Sugod sang naglingkod sia sa trono sang 1914, si Jesus amo man ang gintangdo ni Jehova nga Hukom kag Manuglaglag. Sang 1918, pagligad sang tatlo ka tuig kag tunga sa tapos maglingkod sa trono, gintinluan niya ang espirituwal nga templo ni Jehova, nga ginarepresentar sa duta sang kongregasyon sang hinaplas nga mga Cristiano. (Malaquias 3:​1-5) Ang pagbayaw sa iya subong isa ka sinyales nagtanda sang pagsugod sang isa ka daku nga pagtipon sa katawhan gikan sa bug-os nga duta, subong pagsakdag sa Mesianikong Ginharian. Nahisuno sa dumaan nga sulundan, ang “kaluwasan” nag-abot sa Israel sang Dios sang ginhilway sila gikan sa Babilonia nga Daku sang 1919. “Ang padya” ukon “ang mga suhol” nga ginatigana para sa nagasakripisyo-sang-kaugalingon nga mangangani amo ang di-mamalatyon nga kabuhi sa langit ukon ang dayon nga kabuhi sa duta. Ang tanan nga magapabilin nga matutom makasalig nga ang ila “pagpangabudlay may kaangtanan sa Ginuo indi walay pulos.”​​—1 Corinto 15:58.

25. Ano nga pasalig ang ginahatag sa katawhan ni Jehova?

²⁵ Magamadinalag-on gid ang palaabuton sang langitnon nga organisasyon ni Jehova, sang hinaplas nga mga tiglawas sini sa duta, kag sang tanan nga aktibo nga nagapakig-upod sa ila! (Deuteronomio 26:19) Si Isaias nagtagna: “Pat-od nga tawgon sila sang mga tawo nga balaan nga katawhan, ang mga gintubos ni Jehova; kag ikaw mismo pagatawgon nga Pinangita, isa ka Siudad nga Wala Ginbiyaan Sing Bug-os.” (Isaias 62:12) Sang isa ka tion ang “Jerusalem sa ibabaw,” nga gintiglawas sang Israel sang Dios, nagbatyag nga ginbiyaan. Indi na gid sia liwat magbatyag sing subong sini. Maagom sang katawhan ni Jehova ang iya pag-amlig kag kahamuot tubtob sa walay katubtuban.

[Nota]

[Kahon sa pahina 342]

Maayo Gid nga Modelo Para sa Pag-asawahay

Kon magminyo ang mga tawo, may ginapaabot sila sa ila pag-asawahay. Apang ano ang mga ginapaabot sang Dios? Ang institusyon sang pag-asawahay naghalin sa iya. Ano ang iya katuyuan para sa sini?

Ang isa nga nagapakita sang pagtamod sang Dios amo ang iya kaangtanan sa pungsod sang Israel. Ginlaragway ni Isaias ini nga kaangtanan subong isa ka pag-asawahay. (Isaias 62:​1-5) Talupangda kon ano ang ginahimo ni Jehova nga Dios subong isa ka “bana” sa iya “nobya.” Ginaamligan niya kag ginapakabalaan sia. (Isaias 62:​6, 7, 12) Ginapadunggan niya kag ginapabaloran sia. (Isaias 62:​3, 8, 9) Kag nahamuot sia sa iya, subong ginapakita sang bag-o nga mga ngalan nga ginhatag niya sa iya.​—Isaias 62:​4, 5, 12.

Sa Cristianong Griegong Kasulatan, ginsulit ni Pablo ang paglaragway ni Isaias sang kaangtanan sa ulot ni Jehova kag sang Israel sang ginpaanggid niya ang kaangtanan sang bana kag asawa sa kaangtanan ni Cristo kag sang kongregasyon sang hinaplas nga mga Cristiano.​—Efeso 5:​21-​27.

Ginpalig-on ni Pablo ang mga Cristiano nga ilugon sa ila pag-asawahay ang kaangtanan sa ulot ni Jesus kag sang kongregasyon. Wala na sing maglabaw pa sa gugma nga ginpakita ni Jehova sa Israel kag sa ginpakita ni Cristo sa kongregasyon. Ining simbuliko nga mga kaangtanan nagahatag sing maayo gid nga modelo para sa isa ka madinalag-on kag malipayon nga pag-asawahay sang mga Cristiano.​—Efeso 5:​28-​33.

[Piktyur sa pahina 339]

Tawgon ni Jehova ang langitnon nga Sion paagi sa bag-o nga ngalan

[Retrato sa pahina 347]

Sa modernong mga tion ang manugbantay nga klase ni Jehova wala nagahipos