Kapitulo Beinte-kuatro

Naghimo si Jehova Sing Matahom nga Ngalan Para sa Iya Kaugalingon

Isaias 63:1-14

1, 2. (a) Ano ang personal nga interes sang mga Cristiano sa nagapakari nga “adlaw ni Jehova”? (b) Anong labaw pa nga hulusayon ang nadalahig sa pag-abot sang adlaw ni Jehova?

SA HALOS duha ka libo ka tuig, ang mga Cristiano “nagahulat kag ginahuptan gid sa hunahuna ang presensia sang adlaw ni Jehova.” (2 Pedro 3:​12; Tito 2:13) Halangpunon nga nalangkag sila sa pag-abot sina nga adlaw. Kay man, amo ini ang mangin panugod sang ila kaumpawan gikan sa mga halit sang pagkadihimpit. (Roma 8:22) Magakahulugan man ini sang katapusan sang mga pag-ipit nga ginaantos nila sa sining “makahalanguyos nga mga tion nga mabudlay pakigbagayan.”​​—2 Timoteo 3:1.

² Apang, samtang ang adlaw ni Jehova magadala sing kaumpawan para sa mga matarong, magakahulugan man ini sing kalaglagan para sa “mga wala nagakilala sa Dios kag wala nagatuman sa maayong balita tuhoy sa aton Ginuong Jesus.” (2 Tesalonica 1:​7, 8) Takus ini nga hunahunaon sing serioso. Laglagon gid bala sang Dios ang mga malauton agod lamang luwason ang iya katawhan gikan sa mabudlay nga mga kahimtangan? Ginapakita sang kapitulo 63 sang Isaias nga may yara labaw pa nga hulusayon nga nadalahig, nga amo, ang pagpakabalaan sa ngalan sang Dios.

Ang Paglakat Sang Madaugon nga Hangaway

3, 4. (a) Ano ang danyag sang tagna sa Isaias kapitulo 63? (b) Sin-o ang nakita ni Isaias nga nagalakat padulong sa Jerusalem, kag sin-o sia suno sa pila ka iskolar?

³ Sa Isaias kapitulo 62, mabasa naton ang tuhoy sa paghilway sa mga Judiyo gikan sa pagkabihag sa Babilonia kag ang ila pagpasag-uli sa ila dutang natawhan. Natural lamang nga mag-utwas ang pamangkot: Dapat bala mahadlok ang ginpasag-uli nga nagkalabilin sang mga Judiyo sa dugang pa nga paghapay sang iban nga kaaway nga mga pungsod? Ang palanan-awon ni Isaias isa ka daku nga bulig sa pagdula sang ila kahadlok. Ang tagna nagsugod: “Sin-o ining isa nga nagaabot gikan sa Edom, ang isa nga may masili nga mga panapton gikan sa Bozra, ining isa nga dungganon sa iya panapton, nga nagalakat sa pagkadaku sang iya gahom?”​​—Isaias 63:1a.

⁴ Nakakita si Isaias sing isa ka hangaway, kusganan kag madaugon, nga nagalakat pakadto sa Jerusalem. Ang iya talalupangdon nga panapton nagapakita nga mataas gid ang iya ranggo. Naghalin sia gikan sa direksion sang labing kilala nga siudad sang Edom, ang Bozra, nga nagapahangop nga nalutos niya ining kaaway nga pungsod. Sin-o ayhan ining hangaway? Ginakilala sia sang iban nga mga iskolar nga amo si Jesucristo. Ang iban nagapati nga sia ang lider sang militar sang mga Judiyo nga si Judas Maccabaeus. Apang, nagpakilala mismo ang hangaway sang ginsabat niya ang pamangkot kaina paagi sa pagsiling: “Ako, ang Isa nga nagapamulong sa pagkamatarong, ang Isa nga bugana sa gahom sa pagluwas.”​​—Isaias 63:1b.

 5. Sin-o ang hangaway nga nakita ni Isaias, kag ngaa amo sina ang imo sabat?

⁵ Walay duhaduha nga ini nga hangaway amo si Jehova nga Dios mismo. Ginalaragway pa sia sa Biblia subong “bugana sa dinamiko nga kusog” kag subong “nagapamulong sing matarong.” (Isaias 40:26; 45:​19, 23) Ang talalupangdon nga mga panapton sang hangaway nagapahanumdom sa aton sang mga pulong sang salmista: “O Jehova nga akon Dios, ikaw daku kaayo. Ginpanaptan mo ang imo kaugalingon sing kadungganan kag pagkahalangdon.” (Salmo 104:1) Bisan pa si Jehova ang Dios sang gugma, ginapakita sang Biblia nga ginasul-ob niya ang panapton sang isa ka hangaway kon kinahanglanon.​​—Isaias 34:2; 1 Juan 4:16.

 6. Ngaa magabalik si Jehova gikan sa pagpakig-away sa Edom?

⁶ Apang, ngaa magabalik si Jehova gikan sa pagpakig-away sa Edom? Ang mga Edomnon, nga nagahupot gihapon sang dumot nga nagsugod pa sa ila katigulangan nga si Esau, madugay na nga mga kaaway sang nakigkatipan nga katawhan sang Dios. (Genesis 25:24-​34; Numeros 20:14-​21) Ang daku nga kaakig sang Edom batok sa Juda ilabi na nga nangin dayag sang ginhapay ang Jerusalem bangod ginsulsulan pa sang mga Edomnon ang Babilonianhon nga mga soldado. (Salmo 137:7) Ginkabig ni Jehova ini nga kaakig subong isa ka sala batok sa iya mismo. Indi katingalahan nga determinado sia nga gamiton ang iya espada sang pagtimalos batok sa Edom!​​—Isaias 34:​5-​15; Jeremias 49:​7-​22.

 7. (a) Paano ang tagna batok sa Edom natuman sa una nga tion? (b) Ano ang ginasimbulo sang Edom?

⁷ Busa, makapalig-on gid ang palanan-awon ni Isaias para sa mga Judiyo nga magabalik sa Jerusalem. Nagpasalig ini sa ila nga magapuyo sila nga may kalig-unan sa ila bag-o nga puluy-an. Sa pagkamatuod, sang panahon ni manalagna Malaquias, ginhimo sang Dios ang “kabukiran [sang Edom] nga isa ka nahapay nga kagulub-an kag ang iya palanublion ginhatag . . . sa mga chakal sang kahanayakan.” (Malaquias 1:3) Nagakahulugan bala, nian, nga ang tagna ni Isaias bug-os nga natuman sang adlaw ni Malaquias? Wala, kay walay sapayan sang iya nahapay nga kahimtangan, determinado ang Edom nga patindugon liwat ang iya nahapay nga mga duog, kag gintawag gihapon ni Malaquias ang Edom nga “teritoryo sang kalautan” kag “katawhan nga ginpakamalaut ni Jehova tubtob sa walay latid nga tion.”a (Malaquias 1:​4, 5) Apang, sing matagnaon, indi lamang mga kaliwat ni Esau ang ginalakip sang Edom. Simbulo ini sang tanan nga pungsod nga mga kaaway sang mga sumilimba ni Jehova. Ang mga pungsod sang Cristiandad ilabi na nga prominente sa sini. Ano ang mahanabo sa sining modernong-adlaw nga Edom?

Ang Linasan Sang Ubas

8, 9. (a) Ano nga hilikuton ang nakita ni Isaias nga ginahimo sang hangaway? (b) San-o kag paano tasakon ang simbuliko nga linasan sang ubas?

⁸ Ginpamangkot ni Isaias ang nagbalik nga hangaway: “Ngaa mapula ang imo panapton, kag ang imo mga panapot kaangay sa nagalinas sa linasan sang ubas?” Si Jehova nagsabat: “Naglinas ako nga isa lamang sa linasan sang ubas, samtang wala ako sing kaupod nga tawo gikan sa mga katawhan. Kag padayon nga ginlinas ko sila sa akon kaakig, kag padayon nga ginlapak ko sila sa akon kasingkal. Kag ang ila nagapuswak nga dugo nag-agsik sa akon mga panapton, kag nahigkuan ko ang akon bug-os nga panapton.”​​—Isaias 63:​2, 3.

⁹ Ining maathag nga mga pulong nagalaragway sang pagpamatay. Ti, bisan gani ang matahom nga mga panapton sang Dios nadagtaan, kaangay sang mga panapton sang isa nga nagatasak sa linasan sang ubas! Ang linasan sang ubas isa ka nagakaigo nga simbulo sang napikuta nga kahimtangan sang mga kaaway ni Jehova nga Dios kon maghulag na sia sa paglaglag sa ila. San-o linason ining simbuliko nga linasan sang ubas? Ang mga tagna ni Joel kag ni apostol Juan nagapamulong man tuhoy sa simbuliko nga linasan sang ubas. Ang linasan sang ubas sining mga tagna pagalinason kon tasakon na ni Jehova ang iya mga kaaway sa kalaglagan sa Armagedon. (Joel 3:​13; Bugna 14:18-​20; 16:16) Ang matagnaon nga linasan sang ubas sa Isaias nagatudlo sa amo man nga tion.

10. Ngaa nagsiling si Jehova nga sia lamang ang naglinas sa linasan sang ubas?

¹⁰ Apang, ngaa nagsiling si Jehova nga ginlinas niya ining linasan sang ubas nga sia lamang, nga wala sing kaupod nga tawo gikan sa mga katawhan? Indi bala si Jesucristo, subong tiglawas sang Dios, ang manguna sa paglinas sa linasan sang ubas? (Bugna 19:11-​16) Huo, apang ang ginapatuhuyan ni Jehova mga tawo, indi espiritu nga mga tinuga. Nagasiling sia nga wala sing tawo nga makasarang sa paglaglag sang mga sumulunod ni Satanas sa duta. (Isaias 59:​15, 16) Ang Dios nga Labing Gamhanan amo ang magatasak sa ila sa kaakig, tubtob mapusa sila sing bug-os.

11. (a) Ngaa pahanabuon ni Jehova ang “adlaw sang pagtimalos”? (b) Sin-o ang “mga gintubos” sang dumaan nga mga tion, kag sin-o sila karon?

¹¹ Dugang pa nga ginpaathag ni Jehova kon ngaa sia mismo ang magahimo sini, nga nagasiling: “Ang adlaw sang pagtimalos yari sa akon tagipusuon, kag ang tuig gid sang akon mga gintubos nag-abot na.” (Isaias 63:4)b Si Jehova lamang ang may kinamatarong sa pagtimalos sa mga nagahalit sa iya katawhan. (Deuteronomio 32:35) Sang dumaan nga mga tion ang “mga gintubos” amo ang mga Judiyo nga nag-antos sa mga kamot sang mga Babilonianhon. (Isaias 35:10; 43:1; 48:20) Sa modernong mga tion sila amo ang hinaplas nga mga nagkalabilin. (Bugna 12:17) Kaangay sang ila dumaan nga mga katumbas, gintubos sila gikan sa relihioso nga pagkabihag. Kag kaangay sadtong mga Judiyo, ang mga hinaplas, upod ang ila “iban nga mga karnero” nga mga kaupod, amo ang mga biktima sang paghingabot kag pagpamatok. (Juan 10:16) Sa amo, ginapasalig sang tagna ni Isaias ang mga Cristiano karon nga sa gintalana nga tion sang Dios, magapasilabot Sia tungod sa ila.

12, 13. (a) Sa anong paagi nga wala sing nagbulig kay Jehova? (b) Paano ang butkon ni Jehova naghatag sing kaluwasan, kag paano sia ginbuligan sang iya kasingkal?

¹² Si Jehova nagpadayon: “Nagtulok ako, apang wala sing mabulig; kag nagpakita ako sing katingala, apang wala gid sing nagatanyag sing bulig. Gani ang akon butkon naghatag sa akon sing kaluwasan, kag ang akon kasingkal amo ang nagbulig sa akon. Kag padayon nga ginlapak ko ang katawhan sa akon kaakig, kag ginhubog ko sila sang akon kasingkal kag gin-ula ko sa duta ang ila nagapuswak nga dugo.”—Isaias 63:5, 6.

¹³ Wala sing tawhanon nga kabulig ang makapangangkon sang kadungganan bangod sa daku nga adlaw sang pagtimalos ni Jehova. Kag wala man nagakinahanglan si Jehova sing tawhanon nga bulig sa pagtuman sang iya kabubut-on.c Ang kusog sang iya gamhanan kaayo nga butkon tuman na sa paghimo sang hilikuton. (Salmo 44:3; 98:1; Jeremias 27:5) Dugang pa, ang iya kasingkal nagabulig sa iya. Paano? Bangod ang kasingkal sang Dios, indi isa ka di-kontrolado nga emosyon kundi isa ka matarong nga kaakig. Sanglit si Jehova pirme nagapanghikot pasad sa matarong nga mga prinsipio, ang iya kasingkal nagabulig kag nagapahulag sa iya sa ‘pag-ula sa duta’ sang “nagapuswak nga dugo” sang iya mga kaaway, nga magaresulta sa ila kahuy-anan kag pagkalutos.​​—Salmo 75:8; Isaias 25:10; 26:5.

Ang mga Mahigugmaon nga Kaayo Sang Dios

14. Anong nagakaigo nga mga pahanumdom ang ginhatag karon ni Isaias?

¹⁴ Sa nagligad nga panahon, madali nga nadula sang mga Judiyo ang apresasyon sa mga butang nga ginhimo ni Jehova para sa ila. Gani, nagakaigo nga ginpahanumdom sila ni Isaias kon ngaa ginhimo ni Jehova ining mga butang. Si Isaias nagsiling: “Sambiton ko ang mga mahigugmaon nga kaayo ni Jehova, ang mga kadayawan ni Jehova, suno sa tanan nga ginhimo ni Jehova sa aton, bisan ang bugana nga kaayo sa panimalay sang Israel nga ginhimo niya sa ila suno sa iya mga kaluoy kag suno sa kabuganaan sang iya mga mahigugmaon nga kaayo. Kag nagsiling sia: ‘Sa pagkamatuod katawhan ko sila, mga anak nga indi maglimbong.’ Gani nangin Manluluwas sia sa ila. Sa tanan nila nga kapipit-an ginpiutan sia. Kag iya kaugalingon nga mensahero ang nagluwas sa ila. Sa iya gugma kag sa iya kaawa gintubos niya sila, kag ginhakwat niya sila kag gindala sila sa tanan nga adlaw sang dumaan nga panahon.”—Isaias 63:7-9.

15. Paano kag ngaa nagpakita si Jehova sing mahigugmaon nga kaayo sa kaliwat ni Abraham sa Egipto?

¹⁵ Talalupangdon gid nga huwaran ang ginhatag ni Jehova sa pagpakita sing mahigugmaon nga kaayo, ukon mainunungon nga gugma! (Salmo 36:7; 62:12) Ginhigugma gid ni Jehova si Abraham. (Miqueas 7:20) Ginsaaran niya ang patriarka nga paagi sa iya binhi, ukon kaliwat, ang tanan nga pungsod sang duta magapakamaayo sang ila kaugalingon. (Genesis 22:​17, 18) Gintuman ni Jehova ini nga saad paagi sa pagpakita sing bugana nga kaayo sa panimalay sang Israel. Ang talalupangdon sa iya mainunungon nga mga buhat amo ang iya pagluwas sa kaliwat ni Abraham gikan sa pagkaulipon sa Egipto.​​—Exodo 14:30.

16. (a) Ano ang pagtamod ni Jehova sang makigkatipan sia sa Israel? (b) Paano ang Dios nagapakig-angot sa iya katawhan?

¹⁶ Pagkatapos sang Exodo, gindala ni Jehova ang Israel sa Bukid Sinai kag ginhatag ini nga saad: “Kon tumanon ninyo sing maayo ang akon tingog kag sundon gid ang akon katipan, nian pat-od nga kamo mangin akon pinasahi nga pagkabutang . . . Kag kamo mangin isa ka ginharian sang mga saserdote sa akon kag isa ka balaan nga pungsod.” (Exodo 19:​5, 6) Malimbungon bala si Jehova sa paghatag sini nga tanyag? Indi, kay ginpahayag ni Isaias nga si Jehova nagsiling sa iya kaugalingon: “Sa pagkamatuod katawhan ko sila, mga anak nga indi maglimbong.” Ang isa ka iskolar nagsiling: “Ang tinaga nga ‘sa pagkamatuod’ wala nagakahulugan nga ini ginmando sang soberano ukon bangod sang iya abanse nga ihibalo: isa ini ka paglaum kag pagsalig nga napasad sa gugma.” Huo, tampad nga nakigkatipan si Jehova, kag sinsero gid sia nga luyag niya magmadinalag-on ang iya katawhan. Walay sapayan sang ila dayag nga mga sala, nagpakita sia sing pagsalig sa ila. Dalayawon gid nga simbahon ang isa ka Dios nga nagapakita sing subong sini nga pagsalig sa iya mga sumilimba! Daku man ang mahimo sang mga gulang karon agod mapalig-on ang mga gintugyan sa ila kon nagapakita sila sing kaanggid man nga pagsalig sa kaayo sang katawhan sang Dios.​​—2 Tesalonica 3:4; Hebreo 6:​9, 10.

17. (a) Ano nga pamatuod ang ginhatag ni Jehova tuhoy sa iya gugma sa mga Israelinhon? (b) Ano nga pagsalig ang matigayon naton karon?

¹⁷ Walay sapayan, ang salmista nagsiling tuhoy sa mga Israelinhon: “Nalipat sila sa Dios nga ila Manluluwas, ang Naghimo sang dalagku nga mga butang sa Egipto.” (Salmo 106:21) Ang ila malalison, tingkuyan nga panimuot masami nga nagdul-ong sa ila malaglagon nga mga kahimtangan. (Deuteronomio 9:6) Nag-untat bala si Jehova sa pagpakita sa ila sing mahigugmaon nga kaayo? Sa kabaliskaran, si Isaias nagsiling nga “sa tanan nila nga kapipit-an ginpiutan sia.” Mahinuklugon gid si Jehova! Subong sang mahigugmaon nga amay, nagasakit ang balatyagon sang Dios nga makita ang iya mga anak nga nagaantos, bisan pa kon nagaantos sila bangod sang ila mismo kabuangan. Subong gintagna kag subong pamatuod sang iya gugma, ginpadala niya ang iya “kaugalingon nga mensahero,” mahimo gid nga amo si Jesus sang wala pa sia mangin tawo, agod tuytuyan sila pasulod sa Ginsaad nga Duta. (Exodo 23:20) Sa amo ginhakwat ni Jehova ang pungsod kag gindala ini, “subong sang pagdala sang isa ka tawo sa iya anak.” (Deuteronomio 1:​31; Salmo 106:10) Makasalig kita karon nga nahibaluan man ni Jehova ang aton mga pag-antos kag nagabatyag man sia kon kita yara sa malain nga mga kahimtangan. Masinaligon nga ‘matugyan naton sa iya ang tanan naton nga kabalaka kay sia nagaulikid sa aton.’​​—1 Pedro 5:7.

Ang Dios Nangin Kaaway

18. Ngaa nangin kaaway si Jehova sang iya katawhan?

¹⁸ Apang, indi gid naton pagpasapayanan ang mahigugmaon nga kaayo sang Dios. Si Isaias nagpadayon: “Nagbato sila kag nasaklaw ang iya balaan nga espiritu. Sia karon nangin kaaway nila; sia mismo nagpakig-away sa ila.” (Isaias 63:10) Nagpaandam si Jehova nga bisan pa sia isa ka Dios nga maluluy-on kag mainayuhon, “indi gid sia magahatag sing pasaylo sa silot.” (Exodo 34:​6, 7) Ginpahamtang sang mga Israelinhon ang ila kaugalingon sa kahimtangan nga takus sila silutan bangod sang ila sulitsulit nga pagrebelde. “Indi pagkalimti kon paano mo ginpasingkal si Jehova nga imo Dios sa kahanayakan,” pahanumdom ni Moises. “Kutob sang adlaw nga nagguwa ka sa duta sang Egipto tubtob sa inyo pag-abot sa sining duog nagmabinatuon kamo kay Jehova.” (Deuteronomio 9:7) Paagi sa pagpamatok sa maayo nga mga epekto sang espiritu sang Dios, ginsaklaw nila, ukon ginpasubo, ini. (Efeso 4:30) Ginpilit nila si Jehova nga mangin kaaway nila.​​—Levitico 26:17; Deuteronomio 28:63.

19, 20. Ano nga mga butang ang nadumduman sang mga Judiyo, kag ngaa?

¹⁹ Sa tunga sang ila kapipit-an, napahulag ang iban nga mga Judiyo nga hunahunaon ang nagligad. Si Isaias nagsiling: “Nadumduman niya ang mga adlaw sang una nga panahon, si Moises nga iya alagad: ‘Diin ang Isa nga nagpatakas sa ila gikan sa dagat upod sa mga manugbantay sang iya panong? Diin ang Isa nga nagbutang sa iya sang Iya balaan nga espiritu? Ang Isa nga nag-untay sang Iya matahom nga butkon sa tuo nga kamot ni Moises; ang Isa nga nagpihak sang tubig gikan sa atubangan nila agod maghimo sing dayon nga ngalan para sa iya kaugalingon; ang Isa nga nagpalakat sa ila sa mabalod nga tubig amo kon ngaa, subong sang kabayo sa kahanayakan, wala sila makasandad? Subong sang pagdulhog sang isa ka sapat sa nalupyakan, ginpapahuway sila sang espiritu mismo ni Jehova.’ ”—Isaias 63:11-14a.d

²⁰ Huo, bangod nagaantos sang mga resulta sang ila paglalis, ginkalangkagan sang mga Judiyo ang mga adlaw nga si Jehova Manluluwas nila sa baylo nga kaaway nila. Nadumduman nila kon paano ang ila “mga manugbantay,” sanday Moises kag Aaron, nanguna sa ila agod makatabok sa Dagat nga Mapula. (Salmo 77:20; Isaias 51:10) Nadumduman nila ang tion nga sa baylo nga pasubuon ang espiritu sang Dios, gintuytuyan sila sini paagi sa pagdumala ni Moises kag sang iban pa nga gintangdo-sang-espiritu nga mga gulang. (Numeros 11:​16, 17) Nadumduman man nila nga nakita nila ang “matahom nga butkon” sang kusog ni Jehova nga ginagamit para sa ila paagi kay Moises! Sang ulihi, ginkuha sila sang Dios gikan sa daku kag makahaladlok nga kahanayakan kag gintuytuyan sila pasulod sa isa ka duta nga ginailigan sing gatas kag dugos​—isa ka duog nga palahuwayan. (Deuteronomio 1:​19; Josue 5:6; 22:4) Apang, karon, nagaantos ang mga Israelinhon bangod nadula nila ang ila nahamut-an nga kaangtanan sa Dios!

‘Isa ka Matahom nga Ngalan Para sa Iya Kaugalingon’

21. (a) Ano kuntani ang daku nga pribilehiyo sang Israel may kaangtanan sa ngalan sang Dios? (b) Ano ang panguna nga rason sang Dios sa paghilway sa mga kaliwat ni Abraham gikan sa Egipto?

²¹ Apang, ang materyal nga nadula sa mga Israelinhon wala sa kamalingking kon ipaanggid sa pribilehiyo nga gintalikdan nila, nga amo, ang pagpakigbahin sa paghimaya sa ngalan sang Dios. Nagsaad si Moises sa mga Judiyo: “Si Jehova magatukod sa imo subong isa ka balaan nga katawhan sa iya, subong sang ginsumpa niya sa imo, bangod padayon nga ginatuman mo ang mga sugo ni Jehova nga imo Dios, kag nagalakat ka sa iya mga dalanon. Kag ang tanan nga katawhan sang duta makakita nga ang ngalan ni Jehova ginatawag sa imo, kag mahadlok gid sila sa imo.” (Deuteronomio 28:​9, 10) Sang maghikot si Jehova agod pangapinan ang mga kaliwat ni Abraham, paagi sa pagluwas sa ila gikan sa pagkaulipon sa Egipto, wala niya ini ginahimo agod lamang mangin masulhay ukon makalilipay ang kabuhi para sa ila. Naghikot sia bangod sang mas importante nga butang​​—ang iya ngalan. Huo, ginpat-od niya nga ang iya ngalan “mapahayag . . . sa bug-os nga duta.” (Exodo 9:​15, 16) Kag sang ginkaluy-an sang Dios ang Israel sa tapos ini magrebelde sa kahanayakan, indi lamang sentimiento ang rason kon ngaa ginhimo niya yadto. Si Jehova nagsiling mismo: “Naghulag ako tungod sa akon ngalan agod nga indi ini pagpasipalahan sa itululok sang mga pungsod.”​​—Ezequiel 20:​8-​10.

22. (a) Sa palaabuton, ngaa makig-away liwat ang Dios tungod sa iya katawhan? (b) Sa anong mga paagi ang aton gugma sa ngalan sang Dios nagaapektar sang aton mga hulag?

²² Makatalandog gid nga ginhinakpan ni Isaias ini nga tagna! Sia nagsiling: “Sa amo gintuytuyan mo ang imo katawhan agod maghimo sing isa ka matahom nga ngalan para sa imo kaugalingon.” (Isaias 63:14b) Karon maathag na nga makita kon ngaa si Jehova gamhanan nga nagapakig-away para sa iya katawhan. Agod maghimo sing matahom nga ngalan para sa iya kaugalingon. Sa amo, ang tagna ni Isaias isa ka makatalandog nga pahanumdom nga ang pagdala sang ngalan ni Jehova isa ka makapulunaw nga pribilehiyo kag isa ka daku nga salabton. Ginahigugma sang matuod nga mga Cristiano karon ang ngalan ni Jehova sing kapin pa sa ila kabuhi. (Isaias 56:6; Hebreo 6:10) Wala sila nagahimo sing bisan ano nga mahimo magpakahuya sa sining sagrado nga ngalan. Ginabalusan nila ang mainunungon nga gugma sang Dios paagi sa pagpabilin nga mainunungon sa iya. Kag bangod ginahigugma nila ang matahom nga ngalan ni Jehova, ginakalangkagan nila ang adlaw nga tasakon niya ang iya mga kaaway sa linasan sang iya kaakig​—indi lamang bangod magahatag ini sa ila sing kaayuhan kundi bangod magadul-ong ini sa paghimaya sa ngalan sang Dios nga ila ginahigugma.​—Mateo 6:9.

[Mga nota]

[Piktyur sa pahina 359]

Daku gid ang ginalauman ni Jehova sa iya katawhan