Paghanda Sang mga Pamulongpulong Para sa Kongregasyon

ANG programa sang Teokratikong Eskwelahan Para sa Ministeryo ginahanda agod makabenepisyo ang bug-os nga kongregasyon. Ang mapuslanon nga impormasyon ginapresentar man sa iban nga mga miting sa kongregasyon subong man sa mga asambleya kag mga kombension. Kon ginahatagan ka sing bahin sa isa sining mga programa, ginahatagan ka sing isa ka mabug-at nga responsabilidad. Si apostol Pablo nagpalig-on sa Cristianong manugtatap nga si Timoteo nga hatagan sing dalayon nga igtalupangod ang iya panudlo. (1 Tim. 4:16) Ang mga nagatambong sa Cristianong mga pagtinipon nagapain sing malahalon nga tion​—kag ang iban nagapanikasog sing daku​—​agod makatambong sa pagtigayon sing instruksion tuhoy sa mga butang nga nagadalahig sang ila kaangtanan sa Dios. Ang paghatag sini nga instruksion isa gid ka daku nga pribilehiyo! Paano mo ini himuon sing maayo?

Ini nga bahin sang eskwelahan napasad sa pagbasa sa Biblia nga ginaasayn kada semana. Dapat ipadaku kon paano ang materyal nagaapektar sa aton karon. Subong sang ginsiling sa Nehemias 8:8, si Esdras kag ang iya mga kaupod nagbasa sing dayag gikan sa Pulong sang Dios, nagapaathag sini, ‘nagahatag sing kahulugan sa sini,’ kag nagapahangop sini. Ang imo paghatag sang talalupangdon nga mga punto sa Biblia nagahatag sa imo sing kahigayunan nga himuon man ina.

Paano mo ihanda ini nga asaynment? Kon posible, basaha ang naiskedyul nga bahin sang Biblia isa ka semana ukon kapin pa antes sini. Nian hunahunaa ang imo kongregasyon kag ang mga kinahanglanon sini. Mangamuyo tuhoy sini. Ano nga mga laygay, ano nga mga halimbawa, ano nga mga prinsipio sa sini nga bahin sang Pulong sang Dios ang nagakabagay sa sadtong mga kinahanglanon?

Ang pagpanalawsaw importante. Sarang bala matigayon sa imo lenguahe ang Watchtower Library sa CD-ROM ukon ang Watch Tower Publications Index? Kon amo, gamita ini sing maayo. Ukon mahimo mo man gamiton ang indese sa katapusan-sang-tuig nga guwa sang Ang Lalantawan. Paagi sa pagpanalawsaw sa kon ano na ang nabalhag tuhoy sa mga bersikulo nga luyag mo ipadaku, mahimo mo masapwan ang makahatag kasanagan nga impormasyon, mga pagpaathag sa katumanan sang mga tagna, mga pagbinagbinag sa kon ano ang ginasugid sang pila ka teksto tuhoy kay Jehova, ukon mga paghinun-anon tuhoy sa mga prinsipio. Indi pagtinguhai nga tuptupan ang tuman kadamo nga mga punto. Magkonsentrar sa pila lamang ka pinili nga mga bersikulo. Mas maayo nga tuptupan ang pila lamang ka bersikulo kag himuon ini sing maayo.

Ang imo asaynment mahimo nagakinahanglan man sang pag-agda sa mga tagpalamati nga magkomento kon paano sila nakabenepisyo gikan sa pagbasa sa Biblia para sa sina nga semana. Ano ang nasapwan nila nga mapuslanon sa ila personal kag pangpamilya nga pagtuon ukon sa ila ministeryo ukon pagkabuhi? Ano nga mga kinaiya ni Jehova ang ginpadayag sa iya mga pagpakig-angot sa mga tawo kag mga pungsod? Ano ang natun-an sang mga tagpalamati nga nakapalig-on sang ila pagtuo kag nakapalambo sang ila apresasyon kay Jehova? Indi magkonsentrar sa detalyado kag masibod nga mga punto. Ipadaku ang kahulugan kag praktikal nga mga kapuslanan sang mga punto nga ginpili.

Pasad ini sa ginbalhag nga materyal, subong sang isa ka artikulo sa Ang Lalantawan ukon Magmata! ukon ayhan sa isa ka bahin sang isa ka libro. Sa kalabanan nga kaso mas madamo ang materyal para sa gintalana nga tion. Paano mo ihatag ini nga asaynment? Subong isa ka manunudlo, indi lamang subong isa nga nagatuptop sang materyal. Ang isa ka manugtatap dapat “kalipikado sa pagtudlo.”​—1 Tim. 3:2.

Sugdi ang imo paghanda paagi sa pagtuon sa gin-asayn nga materyal. Tan-awa ang mga kasulatan. Magpamalandong. Tinguhai nga himuon ini sing abanse sa petsa sang imo pamulongpulong. Dumduma nga ginapalig-on ang mga kauturan nga basahon sing abanse ang ginbalhag nga materyal diin ginapasad ang pamulongpulong. Ang imo asaynment indi lamang ang pagrepaso sini ukon pagpalip-ot sini kundi ang pagpakita kon paano ini iaplikar. Gamita ang nagakaigo nga mga bahin sang materyal sa paagi nga makabenepisyo gid ang kongregasyon.

Subong nga ang tagsa ka bata may kaugalingon nga personalidad, ang tagsa ka kongregasyon may pinasahi nga mga kinaiya. Ang isa ka ginikanan nga nagatudlo sing epektibo wala lamang nagahambal sing moral nga mga prinsipio sa iya bata. Nagapangatarungan sia upod sa bata. Ginabinagbinag niya ang personalidad sang bata kag ang mga problema nga ginaatubang sang bata. Sing kaanggid, ang mga manunudlo sa kongregasyon nagapanikasog nga hangpon kag talupangdon ang mga kinahanglanon sang grupo nga nagapamati sa ila. Apang, dapat likawan sang isa ka mahinantupon nga manunudlo ang paggamit sang mga halimbawa nga mahimo magpakahuya sa bisan kay sin-o nga tagpalamati. Ipatalupangod niya ang mga benepisyo nga natigayon na bilang resulta sa paglakat sa dalanon ni Jehova kag magapadaku sang laygay gikan sa Kasulatan nga makabulig sa kongregasyon sa paglubad sa mga problema nga ila ginaatubang.

Ang maayo nga pagtudlo nagatandog sa tagipusuon sang mga tagpalamati. Nagakinahanglan ini indi lamang sang paghambal sing mga katunayan kundi sang pagtukod man sing apresasyon sa kon ano ang ginapresentar sini. Nagakinahanglan ini sang matuod nga kabalaka para sa mga ginatudluan. Dapat kilala sang espirituwal nga mga manugbantay ang panong. Kon mahigugmaon nga ginadumdom nila ang mga problema nga ginaatubang sang tagsatagsa, mahimo sila makahambal sing makapalig-on, nga nagapakita sing paghangop, kaawa, kag kahanuklog.

Subong sang nahibaluan sang epektibo nga mga manunudlo, ang isa ka pamulongpulong dapat may maathag nga tulumuron. Ang materyal dapat ipresentar sa paagi nga ang panguna nga mga punto magalutaw kag madumduman. Dapat madumduman sang mga tagpalamati ang praktikal nga mga ideya nga magaapektar sang ila kabuhi.

Kon nagapamulongpulong ikaw pasad sa isa ka artikulo sa Ang Aton Ministeryo sa Ginharian, ang hangkat mahimo nga tuhay. Diri masapwan mo nga sa masami kinahanglan mo ipaalinton sing bug-os sa mga tagpalamati ang gin-aman na nga daan nga materyal, indi ang pagpili sa kon ano ang labi gid nga nagakabagay. Buligi ang mga tagpalamati nga mangatarungan sa mga kasulatan nga amo ang sadsaran sang bisan ano nga laygay nga ginhatag. (Tito 1:9) Limitado lamang ang tion, kag sa kalabanan nga kahimtangan wala ginatugot ang dugang nga materyal.

Sa pihak nga bahin, mahimo gin-asayn ikaw nga magpresentar sing materyal nga wala sing artikulo sa Ang Aton Ministeryo sa Ginharian. Mahimo nga ang reperensia kuhaon sa isa ka artikulo sa Lalantawan, ukon ang asaynment mahimo nga may pila lamang ka malip-ot nga mga nota. Depende sa imo subong manunudlo ang pagbinagbinag sang mga kinahanglanon sang kongregasyon may kaangtanan sa gin-asayn nga materyal. Mahimo nga kinahanglan mo gamiton ang isa ka malip-ot kag nagakaigo nga ilustrasyon ukon magsugid sing isa ka nagakabagay nga eksperiensia. Dumduma nga ang imo asaynment indi lamang ang paghambal tuhoy sa topiko kundi ang paghatag sini sa paagi nga ang kongregasyon mabuligan sa pagtuman sa hilikuton nga ginsugo sang Pulong sang Dios kag sa pagtigayon sing kalipay sa paghimo sini.​—Binu. 20:​20, 21.

Samtang ginahanda mo ang imo asaynment, hunahunaa ang mga kahimtangan sang mga katapo sang kongregasyon. Dayawa sila sa kon ano ang ginahimo na nila. Paano ang pag-aplikar nila sang mga panugda nga ginhatag sa gin-asayn nga materyal mahimo makapauswag sang ila pagkaepektibo kag makadugang sang ila kalipay sa ministeryo?

Ang imo bala asaynment nagakinahanglan sing pasundayag ukon interbyu? Kon amo, dapat ihanda ini sing abanse. Mahimo masulay ka nga pangabayon lamang ang iban nga amo ang maghimo sing mga kahimusan para sa sini, apang wala ini pirme nagahatag sing labing maayo nga mga resulta. Kon posible, ensayuha ang pasundayag ukon ang interbyu antes sang adlaw sang miting. Pat-ura nga ining bahin sang imo asaynment ginahatag sa paagi nga nagapadaku sa instruksion nga ginhatag.

Ang mga kauturan nga lalaki nga nakapalambo sing maayong espirituwal nga mga kinaiya kag nangin epektibo nga mga humalambal sa publiko kag mga manunudlo mahimo pangabayon sa ulihi nga makigbahin sa programa sa isa ka asambleya ukon sa isa ka kombension. Pinasahi gid ini nga mga okasyon para sa teokratiko nga pagpanudlo. Ini nga sahi sang asaynment mahimo nga sa porma sang manuskrito, balayan, mga instruksion para sa isa ka drama sa Biblia nga may modernong adlaw nga aplikasyon, ukon parapo lamang sang mga instruksion. Kon pribilehiyo mo nga makigbahin sa sini nga programa, tun-i sing maayo ang materyal nga ginhatag sa imo. Tun-i ini tubtob mahangpan mo ang balor sini.

Ang mga ginaasayn sa manuskrito nga pamulongpulong dapat magbasa sang materyal sing tinaga por tinaga. Wala nila ginaislan ang mga tinaga ukon ginabag-o ang materyal. Ginatun-an nila ini agod mahangpan sing maathag ang panguna nga mga punto kag kon paano ini ginapasangkad. Nagaensayo sila sa pagbasa sing matunog tubtob mahatag nila ang pamulongpulong nga may nagakaigo nga pagpadaku sa yabi nga mga tinaga ukon mga prase, kapagsik, kainit, balatyagon, kahanuot, kag kombiksion, subong man ang katunugon kag kabaskugon sang tingog nga nagakaigo sa isa ka daku nga hubon sang tagpalamati.

Ang mga kauturan nga lalaki nga gin-asaynan sang pamulongpulong nga nagagamit sing balayan amo ang may responsabilidad sa pagpasangkad sang ila materyal sa paagi nga nahisuno gid sa balayan. Sa baylo nga magbasa gikan sa balayan sa tion sang pamulongpulong ukon ihanda ini subong isa ka manuskrito, dapat handaan sing maayo sang humalambal ang materyal kag ipresentar ini sing ekstemporanyo, kag gikan sa tagipusuon. Importante nga sundon ang gintalana nga oras sa balayan agod mapresentar sing maathag ang tagsa ka panguna nga punto nga ginpakita. Dapat gamiton sing maayo sang humalambal ang mga ideya kag mga kasulatan nga ginlista sa idalom sang panguna nga mga punto. Indi niya dapat nga ilakip ang dugang nga mga punto nga luyag niya nga nagaresulta sa paglaktaw sang yara sa balayan. Sa pagkamatuod, ang sadsaran sang instruksion amo ang Pulong sang Dios. Ang responsabilidad sang Cristianong mga gulang amo ang ‘pagbantala sing pulong.’ (2 Tim. 4:​1, 2) Busa dapat hatagan sing pinasahi nga igtalupangod sang humalambal ang mga kasulatan sa balayan​—nagapangatarungan sa sini kag nagaaplikar sini.

Nagaalagad ka bala sa isa ka kongregasyon nga may madamo sing kahigayunan nga mahatagan ka sing asaynment? Paano mo ini tanan mahatagan sing nagakaigo nga igtalupangod? Likawi nga ihanda ang imo mga bahin sing subol na sa oras.

Agod makabenepisyo gid ang kongregasyon sa mga pamulongpulong, nagakinahanglan ini sang nagakaigo kag abanse nga pagbinagbinag. Busa, ugalia ang pagbasa insigida sa materyal pagkabaton mo gid sang tagsa ka asaynment. Magabulig ini sa imo nga mahunahuna ini samtang nagahimo ikaw sang iban pa nga mga hilikuton. Sa mga inadlaw ukon mga senemana antes mo ihatag ang imo pamulongpulong, mahimo makabati ka sing mga komento nga makabulig sa imo nga makita kon paano maaplikar sing labing maayo ang impormasyon. Mahimo nga mag-utwas ang mga kahimtangan nga nagapakita sang pagkasibu sa tion sini. Ang pagbasa kag paghunahuna tuhoy sa imo asaynment insigida pagkatapos mo mabaton ini nagakinahanglan sing tion, apang tion ini nga ginhinguyang sing maayo. Kon maghimo ka na sa ulihi sing balayan, matigayon mo ang mga benepisyo bangod sang abanse nga paghunahuna mo sini sing maayo. Ang paghimo sing mga asaynment sa sini nga paagi magabuhin gid sang kahuol kag magabulig sa imo nga mapresentar ang materyal sa paagi nga praktikal kag nagalab-ot sa mga tagipusuon sang mga yara sa kongregasyon.

Tubtob sa kasangkaron nga ginaapresyar mo ang dulot nga gintugyan sa imo may kaangtanan sa programa ni Jehova sa pagpanudlo para sa iya katawhan, mapadunggan mo sia kag mangin isa ikaw ka pagpakamaayo sa sadtong nagahigugma sa iya.​—Isa. 54:13; Roma 12:6-8.