Kon Paano Pauswagon ang Kalantip sa Pagpakighambal

NAHAPUSAN ka bala sa pagpakighambal sa iban? Para sa madamo, ang paghunahuna lamang nga makighambal sa iban, ilabi na sa isa nga indi nila kilala, nagatuga sing kahuol. Ini nga mga tawo mahimo nga mahuluy-on. Mahimo sila magpalibog: ‘Ano ang akon ihambal? Paano ko sugdan ang paghambalanay? Paano ko ini padayunon?’ Ang may kompiansa kag indi mahuluy-on nga mga tawo mahimo magkontrol sa paghambalanay. Mahimo nga nabudlayan sila nga pahambalon ang iban kag pamatian ang ginasiling nila. Busa tanan kita, mahuluy-on man ukon indi, dapat magpalambo sang arte sang pagpakighambal.

Sa pagpauswag sang imo kalantip sa pagpakighambal, ngaa indi magsugod sa puluy-an? Ang makapalig-on nga paghambalanay makaamot sing daku sa kalipay sang pamilya.

Ang panguna nga yabi sa sina nga paghambalanay amo ang daku nga pag-ulikid sa isa kag isa. (Deut. 6:​6, 7; Hulu. 4:​1-4) Kon kita nagaulikid, nagapakigkomunikar kita, kag nagapamati kita kon ang iban luyag maghambal sing pila ka butang. Importante man ang paghambal sing mapuslanon nga butang. Kon may regular kita nga programa sang personal nga pagbasa kag pagtuon sing Biblia, madamo ang aton mapaambit. Ang maalamon nga paggamit sang pulyeto nga Pag-usisa sa Kasulatan sa Adlaw-adlaw makasugod sang paghambalanay. Sa isa ka adlaw, ayhan may makalilipay kita nga eksperiensia sa pag-alagad sa latagon. Mahimo makabasa kita sing pila ka butang nga mapuslanon ukon makahalam-ot. Dapat ugalion naton nga ipaambit ini nga mga butang sa isa ka makapalig-on nga paghambalanay sang pamilya. Magabulig man ini sa aton sa pagpakighambal sa mga tawo nga indi bahin sang pamilya.

Madamo nga tawo ang nagapangalag-ag sa pagpakighambal sa isa nga indi nila kilala. Apang bangod sang gugma sa Dios kag sa ila isigkatawo, ang mga Saksi ni Jehova nagapanikasog gid nga tun-an kon paano makighambal agod mapaambit sa iban ang mga kamatuoran sa Biblia. Ano ang makabulig sa imo agod mag-uswag sa sini?

Ang prinsipio nga ginsambit sa Filipos 2:4 mapuslanon. Ginapalig-on kita nga ituon ang mata, “indi sa personal nga interes sang [aton] kaugalingon lamang nga mga butang, kundi sa personal man nga interes sang iban.” Hunahunaa ini sa sining paagi: Kon wala mo pa anay makilala ang isa ka tawo, ginatamod ka niya nga estranghero. Paano mo mapahamtang ang iya buot? Ang isa ka matam-is nga yuhum kag mainabyanon nga panamyaw makabulig. Apang may yara pa nga dapat binagbinagon.

Mahimo nga ginsamong mo ang iya panghunahuna. Kon ginatinguhaan mo nga hambalan ninyo kon ano ang imo ginahunahuna nga wala nagapasunaid sa iya ginahunahuna, mangin maayo bala ang iya reaksion? Ano ang ginhimo ni Jesus sang nakita niya ang isa ka babayi sa isa ka bubon sa Samaria? Ang hunahuna sini yara sa pagkuha sing tubig. Ginsugdan ni Jesus ang pagpakighambal niya sa babayi pasad sa sini, kag wala madugayi ginhimo niya ini nga isa ka mapagsik nga paghambalanay sa espirituwal.​—Juan 4:7-26.

Kon mapanilagon ka, mahantop mo man kon ano ang mahimo nga ginahunahuna sang mga tawo. Malipayon bala ukon masubo tan-awon ang tawo? Tigulang bala sia, ayhan maluya na? May nakita ka bala nga pamatuod nga may kabataan sa puluy-an? Daw manggaranon bala ang tawo ukon nagahimakas gid bala sia agod lang matigayon ang mga kinahanglanon sa kabuhi? Ang mga dekorasyon bala sa puluy-an ukon personal nga mga alahas nagapakita nga relihioso sia? Kon ang imo panamyaw sa iya nagadalahig sining mga butang, mahimo tamdon ka sini nga tawo subong isa nga may pareho sing interes sa iya.

Kon indi mo maatubang kag makita mismo ang tagbalay, ayhan mabatian lamang ang iya tingog sa sirado nga ganhaan, ano ang imo mahinakop? Mahimo nagakabuhi ang tawo sa kahadlok. Mahimo mo bala magamit ini nga impormasyon agod masugdan ang isa ka paghambalanay sa ganhaan?

Sa iban nga mga duog posible nga makapakighambal ka sa isa ka tawo paagi sa pagsugid sang pila ka butang tuhoy sa imo kaugalingon​—ang imo ginhalinan, kon ngaa nagduaw ka sa iya, kon ngaa nagapati ka sa Dios, kon ngaa nagsugod ka sa pagtuon sa Biblia, kag kon paano ang Biblia nakabulig sa imo. (Binu. 26:4-23) Sa pagkamatuod, dapat ini himuon sing mahalungon kag may maathag nga tulumuron sa hunahuna. Ini, subong resulta, mahimo magpahulag sa tawo sa pagsugid sing pila ka butang tuhoy sa iya kaugalingon kag kon paano niya ginatamod ang mga butang.

Sa pila ka kultura, kinabatasan ang pag-amuma sa mga dumuluong. Mahimo ka agdahon sang mga tawo nga magdayon kag maglingkod. Sa tion nga makalingkod ka na, kon ginakamusta mo sing matinahuron ang kahimtangan sang pamilya kag mamati sing maayo sa sabat, mahimo mamati man sing maayo ang tagbalay sa imo inughambal. Ang iban nga mga tawo nagapakita sing daku pa nga interes sa mga bisita, gani mahimo nga maghinguyang ka sing kapin pa nga tion sa imo introduksion. Samtang ginahimo ini, masapwan nila nga may mga butang sila nga magkaanggid sa imo. Makadul-ong ini sa isa ka mapuslanon nga paghambalanay sa espirituwal.

Ano abi kon may madamo nga tawo sa inyo duog nga nagahambal sing mga lenguahe nga tuhay sa imo? Paano mo mapakig-angutan ini nga mga tawo? Kon tun-an mo bisan ang simple nga mga panamyaw lamang sa pila sining mga lenguahe, marealisar sang mga tawo nga interesado ka sa ila. Mahimo ini magbukas sing dalan para sa dugang nga paghambalanay.

Agod magpadayon ang paghambalanay, mangin interesado sa ginahunahuna sang tawo nga imo ginahambal. Palig-una sia nga ipabutyag ang iya kaugalingon kon luyag niya nga himuon ini. Ang pinili-sing-maayo nga mga pamangkot makabulig. Ang punto-de-vista nga mga pamangkot labing maayo bangod nagakinahanglan ini sing sabat nga labaw pa sa huo ukon indi lamang. Halimbawa, sa tapos masambit ang isa ka lokal nga problema, mahimo ka makapamangkot: “Ano sa banta mo ang gintunaan sini nga kahimtangan?” ukon “Ano sa banta mo ang solusyon?”

Kon nagapamangkot ikaw, mamati sing maayo sa sabat. Ipakita ang imo sinsero nga interes paagi sa pulong, pagtango, ukon pagkumpas. Indi magsamulak. Upod ang bukas nga hunahuna, binagbinaga kon ano ang ginasiling. “Magmadagmit sa pagpamati, magmahinay sa paghambal.” (Sant. 1:19) Kon magsabat ka gid man, ipakita nga nagapamati gid ikaw sa iya ginhambal.

Apang, dumduma nga indi tanan magasabat sang imo mga pamangkot. Gikan sa pila ka tawo ang lamang nga sabat mahimo amo ang pagkurisong ukon pagyuhum. Ang iban mahimo magsiling lamang sing huo ukon indi. Indi maluyahan sing buot. Mangin mapailubon. Indi pag-ipilit ang paghambalanay. Kon luyag sang tawo nga mamati, gamita ang kahigayunan nga ipaambit ang makapalig-on nga mga panghunahuna sa Kasulatan. Sa ulihi, mahimo ka tamdon sang tawo nga isa ka abyan. Nian, ayhan mangin handa na sia sa pagpabutyag sang iya panghunahuna.

Samtang nagapakighambal ka sa mga tawo, maghanda para sa palaabuton nga mga pagduaw liwat. Kon ang isa ka tawo nagapautwas sing madamo nga pamangkot, sabta ang pila sini apang magbilin sing isa ukon duha para sa masunod ninyo nga paghambalanay. Isiling nga magapanalawsaw ka, kag nian ipaambit ang mga resulta sa iya. Kon indi sia magpamangkot, mahimo mo hinakpan ang inyo paghambalanay paagi sa isa ka pamangkot nga sa banta mo makapainteres sa iya. Isiling nga hambalan ninyo ini sa masunod mo nga pagduaw. Ang madamo nga mga ideya masapwan sa libro nga Reasoning From the Scriptures, sa brosyur nga Ano ang Ginapatuman Sang Dios sa Aton?, kag sa bag-o nga mga guwa sang Ang Lalantawan kag Magmata!

Kon masumalang mo ang isa sang mga Saksi ni Jehova sa una nga tion, nagamatumato ka bala sa pagpangilala? Ukon nagahipos ka lang bala kag wala nagasapak? Ang gugma sa aton mga kauturan dapat magpahulag sa aton nga pangilalahon sila. (Juan 13:35) Paano mo ini sugdan? Mahimo ipakilala mo lang ang imo ngalan kag pamangkuton ang iya ngalan. Ang pagpamangkot sa iya kon paano niya natun-an ang kamatuoran masami nga nagadul-ong sa isa ka makawiwili nga paghambalanay kag magabulig sa imo nga magkilalahay kamo. Bisan pa daw indi talunsay ang imo paghambal, paagi sa imo panikasog makita niya nga nagaulikid ka sa iya, kag amo ina ang importante.

Ano ang makabulig agod mangin mapuslanon ang paghambalanay ninyo sang isa ka katapo sang imo kongregasyon? Magpakita sing matuod nga interes sa iya kag sa iya pamilya. Bag-o lang bala natapos ang miting? Magkomento sa mga ideya nga nasapwan mo nga makabulig. Mangin mapuslanon ini sa inyo nga duha. Mahimo mo sambiton ang makawiwili nga punto gikan sa bag-o nga guwa sang Ang Lalantawan ukon Magmata! Indi ini dapat himuon subong pagpakitakita ukon pagtilaw sang ihibalo. Himua ini agod ipaambit ang pila ka butang nga nanamian gid ikaw. Ayhan mahambalan ninyo ang mahimo nga asaynment sang isa sa inyo sa Teokratikong Eskwelahan Para sa Ministeryo kag magbayluhanay sing mga ideya kon paano ini ipresentar. Mahimo mo man mapaambit ang mga eksperiensia gikan sa pag-alagad sa latagon.

Sa pagkamatuod, ang aton interes sa mga tawo masami nga nagadul-ong sa paghambalanay tuhoy sa mga tawo​—ang mga butang nga ila ginasiling kag ginabuhat. Ang paglahog mahimo man nga mangin bahin sang aton paghambal. Ang aton bala ginahambal makapalig-on? Kon ginasunod gid naton ang laygay sang Pulong sang Dios kag ginapahulag sang diosnon nga gugma, ang aton paghambal pat-od gid nga makapalig-on.​—Hulu. 16:​27, 28; Efe. 4:​25, 29; 5:​3, 4; Sant. 1:26.

Antes kita makigbahin sa ministeryo sa latagon, nagahanda kita. Ngaa indi maghanda sing isa ka makawiwili nga balita agod ipaambit kon nagapakighambal sa mga abyan? Samtang nagabasa ka ukon nagapamati sang makawiwili nga mga butang, tandai ang mga punto nga luyag mo ipaambit sa iban. Sa ulihi, madamo na ikaw sing mapilian. Sa paghimo sini, mapasangkad mo ang imo komento kag indi lamang sa matag-adlaw nga rutina sang kabuhi. Labaw sa tanan, kabay nga ang imo paghambal nagapamatuod nga hamili gid ang Pulong sang Dios sa imo!​—Sal. 139:17.