Kingdom News Num. 37

Mensahe Para sa Bug-os nga Kalibutan

Malapit Na ang Kalaglagan sang Butig nga Relihion!

▪ Ano ang butig nga relihion?

▪ Paano ini laglagon?

▪ Paano ka maapektuhan?

Ano ang Butig nga Relihion?

Nasubuan ka bala bangod sa mga krimen nga ginhimo sa ngalan sang relihion? Naugot ka bala sa mga inaway, terorismo, kag kagarukan nga ginhimo sang mga nagapangangkon nga nagaalagad sa Dios? Ngaa ang relihion daw amo ang nangin kabangdanan sang madamo nga problema? Ang balasulon indi ang tanan nga relihion kundi ang butig nga relihion lamang. Ginpakita sang isa ka ginatahod nga relihioso nga tawo, si Jesucristo, nga ang butig nga relihion nagaimpluwensia sa mga tawo nga maghimo sing kalainan, subong nga ang “malain nga kahoy nagapatubas sing wala pulos nga bunga.” (Mateo 7:15-17) Ano nga bunga ang ginapatubas sang butig nga relihion?

Ang Butig nga Relihion . . .

◼ NAGAPAKIGBAHIN SA INAWAY KAG POLITIKA: “Sa Asia kag sa iban pa nga mga duog,” siling sang magasin nga Asiaweek, “ginhimuslan sang uhaw sa gahom nga mga lider ang pagkarelihioso sang mga tawo agod tumanon ang ila mga tinutuyo.” Bilang resulta, nagpaandam ang magasin: “Daw mangin magamo pa gid ang kalibutan.” Ang isa ka kilala nga relihioso nga lider sa Estados Unidos nagsiling: “Dapat patyon ang mga terorista agod mauntat ang ila pagpamatay.” Ang iya panugda? “Patya ang tanan nga terorista sa ngalan sang Ginuo.” Sa kabaliskaran, ang Biblia nagasiling: “Kon ang bisan sin-o magasiling: ‘Ginahigugma ko ang Dios,’ apang ginadumtan ang iya utod, butigon sia.” (1 Juan 4:20) Nagsiling pa gani si Jesus: “Padayon nga higugmaa ang inyo mga kaaway.” (Mateo 5:44) May mahunahuna ka bala nga relihion nga wala nagapakigbahin sa inaway ang mga katapo sini?

◼ NAGAPANUDLO SING BUTIG NGA DOKTRINA: Kalabanan nga relihion nagatudlo nga ang kalag ukon ang espiritu amo ang di-makita nga bahin sa isa ka tawo nga padayon nga nagakabuhi kon mapatay na ang pisikal nga lawas. Paagi sa pagpanudlo sini nga doktrina, madamo sining mga relihion ang naghingalit sa ila mga miembro, nagapabayad agod ipangamuyo ang kalag sang mga napatay. Apang, tuhay ang ginatudlo sang Biblia. “Ang kalag nga nagapakasala—ini mismo mapatay.” (Ezequiel 18:4) “Ang mga buhi nakahibalo nga mapatay sila; apang nahanungod sa mga patay, wala sila makahibalo sing bisan ano.” (Manugwali 9:5) Gintudlo ni Jesus nga banhawon ang mga patay—isa ka di-kinahanglanon nga himuon kon ang mga tawo may di-mamalatyon nga kalag. (Juan 11:11-25) Ginatudlo bala sang imo relihion nga di-mamalatyon ang kalag?

◼ NAGAKUNSINTI SANG IMORAL NGA PAGPAKIGSEKSO: Sa iban nga mga pungsod, ginaordenahan sang relihioso nga mga grupo ang mga agi kag tomboy nga mangin katapo sang klero kag ginapangabay nila ang mga panguluhan nga aprobahan ang pag-asawahay sang magkapareho sing sekso. Bisan ang mga relihion nga nagapakamalaut sa imoralidad nagakunsinti pa gani sa mga relihiosong lider nga nag-abuso sa sekso sa mga kabataan. Apang, ano bala ang ginatudlo sang Biblia? Prangka ini nga nagasiling: “Indi kamo magtalang. Wala sing makihilawason, ni mga sumilimba sa idolo, ni mga makihilahion, ni mga lalaki nga ginagamit ang kaugalingon para sa di-kinaugali nga mga katuyuan, ni mga lalaki nga nagahulid sa mga lalaki . . . ang makapanubli sang ginharian sang Dios.” (1 Corinto 6:9, 10) May nahibaluan ka bala nga relihion nga nagakunsinti sa imoral nga pagpakigsekso?

Ano ang matabo sa mga relihion nga nagapatubas sing malain nga mga bunga? Si Jesus nagpaandam: “Ang tagsa ka kahoy nga wala nagapamunga sing maayo nga bunga ginapulod kag ginadap-ong sa kalayo.” (Mateo 7:19) Huo, pudlon gid kag laglagon ang butig nga relihion! Apang paano kag san-o ini matabo? Ang isa ka matagnaon nga palanan-awon nga nasulat sa tulun-an sa Biblia nga Bugna, sa kapitulo 17 kag 18, magasabat sini.

Paano Laglagon ang Butig nga Relihion?

Handurawa ang danyag. Ang isa ka makihilawason nagasakay sa isa ka makahaladlok nga sapat. Ang sapat may pito ka ulo kag napulo ka sungay. (Bugna 17:1-4) Ano ang ginarepresentar sang makihilawason? Ginaimpluwensiahan niya ang “mga hari sa duta.” Napanaptan sia sing purpura, nagagamit sing incienso, kag manggaranon gid kaayo. Dugang pa, paagi sa iya espiritistiko nga buhat, ‘nalimbungan niya ang tanan nga pungsod.’ (Bugna 17:18; 18:12, 13, 23) Ang Biblia nagabulig sa pagpahangop sa aton nga ining makihilawason isa ka bug-os kalibutan nga relihiosong organisasyon. Ginarepresentar niya, indi lang ang isa ka relihion, kundi ang tanan nga relihion nga nagapatubas sing malain nga mga bunga.

Ang sapat nga ginasakyan sang makihilawason nagarepresentar sang politikal nga kagamhanan sa bug-os nga kalibutan.a (Bugna 17:10-13) Nagasalika ang butig nga relihion sa sining politikal nga sapat, nagatinguha nga impluwensiahan ang ila mga desisyon kag kontrolon ini.

Apang, sa dili madugay, may isa ka indi mapatihan nga hitabo. “Ang napulo ka sungay nga imo nakita, kag ang sapat nga mapintas, ini sila magadumot sa makihilawason nga babayi kag magahapay kag magapahubo sa iya, kag kaunon nila ang iya unod kag sunugon sia sing bug-os sa kalayo.” (Bugna 17:16) Sa hinali kag sa makakilibang nga paagi, salakayon sang politikal nga kagamhanan sa kalibutan ang butig nga relihion kag laglagon ini sing bug-os! Ano ang nagtiklod sini nga pagsalakay? Ang tulun-an sa Biblia nga Bugna nagsabat: “Ginbutang sang Dios sa ila tagipusuon ang paghimo sang iya hunahuna.” (Bugna 17:17) Huo, papanabton sang Dios ang butig nga relihion sa nahimo sini nga talamayon nga mga buhat. Paagi sa pagpanghikot nga may himpit nga katarungan, gamiton niya ang politikal nga kahagugma sini sa pagpadapat sang iya paghukom.

Ano ang himuon mo agod indi ka madalahig sa madangatan sang butig nga relihion? “Gua ka sa iya, katawhan ko,” laygay sang mensahero sang Dios. (Bugna 18:4) Sa pagkamatuod, karon na gid ang panahon nga maggua sa butig nga relihion! Apang sa diin kita madangop? Indi sa ateismo, bangod madulom man ang palaabuton sini. (2 Tesalonica 1:6-9) Ang dalangpan amo gid lamang ang matuod nga relihion. Paano mo makilala ang matuod nga relihion?

Kon paano Makilala ang Matuod nga Relihion

Anong maayo nga bunga ang dapat mapatubas sang matuod nga relihion?—Mateo 7:17.

Ang Matuod nga Relihion . . .

◼ NAGAPAKITA SING GUGMA: Ang matuod nga mga sumilimba ‘indi bahin sang kalibutan,’ wala nabahinbahin bangod sang rasa ukon sang kultura, kag nagapakita sing ‘gugma sa tunga nila.’ (Juan 13:35; 17:16; Binuhatan 10:34, 35) Sa baylo nga magpinatyanay, handa sila nga mapatay para sa tagsatagsa.—1 Juan 3:16.

◼ NAGASALIG SA PULONG SANG DIOS: Sa baylo nga itudlo ang “tradisyon” kag “ang mga sugo sang mga tawo,” ang matuod nga relihion nagapasad sang ila panudlo sa Pulong sang Dios, ang Biblia. (Mateo 15:6-9) Ngaa? Bangod ang “bug-os nga Kasulatan inspirado sang Dios kag mapuslanon sa pagpanudlo, sa pagsabdong, sa pagtadlong sang mga butang.”—2 Timoteo 3:16.

◼ NAGAPALIG-ON SANG MGA PAMILYA KAG NAGASAKDAG SA MATAAS NGA MGA TALAKSAN SA MORAL: Ginahanas sang matuod nga relihion ang mga bana ‘nga higugmaon ang ila mga asawa subong sang ila kaugalingon nga lawas,’ nagabulig sa mga asawa nga ‘tahuron sing tudok ang ila bana,’ kag nagatudlo sa mga kabataan nga ‘magmatinumanon sa ila mga ginikanan.’ (Efeso 5:28, 33; 6:1) Dugang pa, ang mga gintugyanan sing responsibilidad dapat mangin huwaran sa moral.—1 Timoteo 3:1-10.

May relihion bala nga nagatuman sini nga mga talaksan? Ang libro nga Holocaust Politics, nga ginbalhag sang 2001, nagsiling: “Kon madamo nga tawo ang magkabuhi suno sa ginatudlo kag ginahimo sang mga Saksi ni Jehova, wala kuntani natabo ang Holocaust kag ang pagpapas sa rasa.”

Sa pagkamatuod, sa 235 ka pungsod, ang mga Saksi ni Jehova wala lamang nagabantala sang mga talaksan sang Biblia sa moral—ginaaplikar nila ini sa ila kabuhi. Ginapalig-on namon kamo nga pangabayon ang mga Saksi ni Jehova nga buligan kamo nga matun-an ang ginapatuman sang Dios agod nga mangin kalahamut-an ang inyo pagsimba sa iya. Karon na ang tion nga maghulag. Indi magpabuyanbuyan. Malapit na ang kalaglagan sang butig nga relihion!—Sofonias 2:2, 3.

Kon luyag mo sing dugang pa nga impormasyon tuhoy sa pasad sa Biblia nga mensahe nga ginabantala sang mga Saksi ni Jehova, kontaka sila sa adres sa ubos.

□ Interesado ako nga makabaton sing kopya sang brosyur nga Magpadayon sa Pagbantay!

□ Palihug kontaka ako tuhoy sa walay bayad nga pagtuon sa Biblia sa puluy-an.

Isulat kon ano nga lenguahe.

[Footnote]

[Blurb sa pahina 3]

Ginaimpluwensiahan sang butig nga relihion ang “mga hari sa duta”

[Blurb sa pahina 3]

“Gua ka sa iya, katawhan ko”