“Indi Ako Makahipos”

 1. Ngaa indi makahipos si Jeremias kag ang iban pa nga manalagna ni Jehova?

“PAMATII ninyo ang ginasiling ni Jehova.” Ini nga mga pulong mabatian sa mga dalan kag plasa sang Jerusalem sugod sang 647 B.C.E. Kag wala gid nagauntat ang manalagna sang Dios. Bisan nalaglag na ang siudad pagligad sang 40 ka tuig, ginsulit gihapon niya ini nga pangabay. (Jer. 2:4; 42:15) Para mapat-od nga mabatian sang mga Judiyo ang Iya laygay kag maghinulsol, nagpadala sing mga manalagna ang Labing Gamhanan nga Dios. Subong sang ginpakita sa umpisa sini nga libro, si Jeremias nagapangibabaw sa mga humalambal sang Dios. Sang ginsugo si Jeremias, ginsilingan sia sang Dios: “Lakat ka kag ihambal mo ang tanan nga isugo ko sa imo. Indi ka mahadlok.” (Jer. 1:17) Mabudlay gid ini. Nag-antos si Jeremias sing pisikal kag emosyonal nga kasakit, pero bisan sa sini nga mga pagtilaw, gintuman niya ang iya asaynment. Nagsiling sia: “Nagakubakuba ang akon dughan. Indi ako makahipos.”—Jer. 4:19.

2, 3. (a) Paano gin-ilog sang mga disipulo ni Jesus si Jeremias? (b) Ngaa dapat mo ilugon ang halimbawa ni Jeremias?

² Ang pagtuman ni Jeremias sa iya asaynment mangin halimbawa para sa mga alagad ni Jehova sa palaabuton. (Sant. 5:10) Wala magdugay pagligad sang Pentecostes 33 C.E., gin-aresto sang Judiyong awtoridad sanday Pedro kag Juan, kag ginmanduan nga mag-untat sa pagbantala. Nahibaluan mo ang ila sabat. “Indi kami mag-untat sa paghambal tuhoy sa mga butang nga amon nakita kag nabatian.” (Binu. 4:19, 20) Pagkatapos pahugon, ginbuy-an sanday Pedro kag Juan. Nahibaluan mo ang resulta. Wala nag-untat kag indi gid mag-untat sa pagbantala ining matutom nga mga lalaki.

³ Nakita mo bala ang kakugi ni Jeremias sa ginsiling nanday Pedro kag Juan sa Binuhatan 4:20? Subong ministro ni Jehova nga Dios sa sining katapusan nga mga adlaw, kabay nga mangin determinado ka man sa pagsiling, ‘Indi ako makahipos!’ Tan-awon naton kon paano naton mahuptan ang kabakod kaangay ni Jeremias para makapadayon sa pagbantala bisan pa sa nagalala nga mga kahimtangan.

 4. Ano nga panimuot ang kinaandan sa Jerusalem sadto?

⁴ Indi bala nga kumbinsido ka nga ang saad sang Dios nga paggahom sang iya Anak amo ang pinakamaayo nga balita nga dapat mabatian sang mga tawo? Pero madamo karon ang pareho sa mga Judiyo nga nagsiling kay Jeremias: “Indi kami magpamati sa ginasiling mo sa amon sa ngalan ni Jehova.” (Jer. 29:19; 44:16) Pirme ini mabatian ni Jeremias. Ang mga alagad ni Jehova karon pirme man makabati sang mga tawo nga nagasiling, “Indi ako interesado.” Kon madamo ang wala nagasapak, mahimo ini magpaluya sa kakugi sang mga manugbantala. Kon ang kahimtangan sa inyo teritoryo nagapaluya sang imo kakugi ukon sang pila ka kauturan sa kongregasyon, ano ang dapat mo himuon?

 5. (a) Ano ang reaksion ni Jeremias kay wala nagsapak ang mga tawo? (b) Ngaa nabutang sa katalagman ang kabuhi sang wala nagapamati sa maayong balita?

⁵ Binagbinaga ang reaksion ni Jeremias sa katawhan sang Juda nga wala nagsapak. Sa umpisa sang iya pagpanagna, ginpakita na sa iya ni Jehova ang parte sa palaabuton nga paghukom. (Basaha ang Jeremias 4:23-26.) Nahangpan sang manalagna nga ang kaluwasan sang linibo ka tawo nagadepende sa ila pagpamati kag pagtuman sa iya mensahe. Amo man sini ang kahimtangan sang mga tawo karon, lakip na sa inyo teritoryo. Tuhoy sa “adlaw” sang paghukom sang Dios sa malaut nga kalibutan karon, si Jesus nagsiling: “Magaabot ini sa tanan nga nagapuyo sa ibabaw sang bug-os nga duta. Gani, magpadayon kamo nga nagamata nga nagaampo sa tanan nga tion agod magmadinalag-on kamo sa pagpalagyo sa sining tanan nga butang nga gintalana nga mahanabo kag sa pagtindog sa atubangan sang Anak sang tawo.” (Luc. 21:34-36) Makahinakop ka sa ginsiling ni Jesus nga ang kabuhi sang wala nagapamati sa maayong balita yara sa katalagman.

 6. Ngaa dapat ka magpadayon sa pagbantala, lakip sa mga tawo nga diutay lang ang interes?

⁶ Pero ang mga namati kag naghulag suno sa pulong ni Jehova makabaton sang indi mabayaran nga mga benepisyo. Ginbuksan sang Dios ang dalan para maluwas kita sa kalaglagan kag makasulod sa bag-ong kalibutan. Sa pila ka bahin, kaanggid ini sa ministeryo ni Jeremias. Naluwas kuntani ang mga pumuluyo sang Juda. (Basaha ang Jeremias 26:2, 3.) Para mabuligan sila, naghinguyang sing pila ka dekada si Jeremias agod palig-unon ang mga tawo nga ‘magpamati’ kag magbalik sa pagsunod sa pulong sang matuod nga Dios. Wala kita makahibalo kon pila ang naghinulsol kag nagbag-o bangod sa pagpanaksi sang manalagna. Pero may namati sa iya sadto, kag madamo man ang nagapamati subong. Samtang padayon kita nga nagabantala, masami kita makabati nga nangin interesado ang mga wala nagasapak sadto. (Tan-awa ang kahon nga “Nangin Interesado,” sa pahina 184.) Indi bala nga rason pa gid ini nga dapat naton padayunon ang kakugi sa nagaluwas-kabuhi nga ministeryo?

 7. Paano gintinguhaan sang mga kaaway ni Jeremias nga pakalainon ang iya pagpanagna?

⁷ Ang isa ka talalupangdon nga bahin sang ministeryo ni Jeremias amo ang masunson nga pagtinguha sang mga manugpamatok nga pauntaton sia. Ginkontra sia sang butig nga mga manalagna sa atubangan sang katawhan. (Jer. 14:13-16) Samtang nagalakat si Jeremias sa mga dalan sa Jerusalem, ginasinggitan sia kag ginayaguta sang mga tawo. (Jer. 15:10) Ginpakalain pa sia sang iya mga kaaway. (Jer. 18:18) Ang iban nagpalapnag pa gani sing butig nga mga sugilanon para palas-ayon ang mga interesado sa iya ginabantala. (Pan. 3:61, 62) Nag-untat bala si Jeremias? Wala gid. Nagpadayon sia sa pagbantala. Paano niya ini ginhimo?

 8. Samtang nagabaskog ang mga pagpamatok sa iya, ano ang reaksion ni Jeremias?

⁸ Ang panguna nga hinganiban ni Jeremias amo ang pagsalig kay Jehova. Sa panugod sang iya ministeryo, ginpasalig sia sang Dios nga sakdagon kag proteksionan. (Basaha ang Jeremias 1:18, 19.) Nagsalig si Jeremias sa sini nga saad, kag ginbuligan gid sia ni Jehova. Samtang nagabaskog ang mga pagpamatok sa iya, labi man sia nga nangin masidla, maisugon, kag mabinatason. Talupangda kon paano sia nabuligan sini nga mga kinaiya.

9, 10. Ano nga mga hitabo sa kabuhi ni Jeremias ang nagpalig-on sa imo nga mangin maisugon?

⁹ Isa ka bes, gindala sang rebelyuso nga mga saserdote kag mga manalagna si Jeremias sa mga pangulo sang Juda para ipapatay. Hinadlukan bala sia? Wala. Ang iya reaksion nagapamatuod nga sayop ang sumbong sang mga apostata, gani naluwas sia.—Basaha ang Jeremias 26:11-16; Luc. 21:12-15.

¹⁰ Dumduma nga pagkatapos mapamatian ang mensahe sang manalagna, ginpandugan sia sang opisyal sa templo nga si Pasur. Nagdumdom si Pasur nga mahipos na si Jeremias, gani pagkaaga ginbuy-an niya sia. Nagapalanakit pa ang lawas ni Jeremias sa pagpaantos sa iya, pero ginsugid niya dayon kay Pasur ang paghukom ni Jehova batok sa iya. Bisan ang pagpaantos wala nagpahipos kay Jeremias! (Jer. 20:1-6) Ngaa? Ginsilingan kita ni Jeremias: “Kaupod ko si Jehova, nga kaangay sa gamhanan kag makakulugmat nga hangaway. Gani ang mga nagahingabot sa akon masandad kag indi magdaug.” (Jer. 20:11) Bisan pa sa atubangan sang mapintas nga mga manugpamatok, wala nahadlok si Jeremias. May basihan ang iya pagsalig kay Jehova, kag mailog mo man sia.

11, 12. (a) Paano nangin maalamon si Jeremias sang ginpamatukan sia ni Hananias? (b) Ano ang benepisyo sa imo sang ‘pagpugong sa kaugalingon sa idalom sang malaut’?

¹¹ Maayo man dumdumon nga indi panatiko si Jeremias. Nangin maalamon sia sa pag-atubang sa mga manugpamatok. Nakahibalo sia kon san-o mahalin. Halimbawa, binagbinaga ang iya naeksperiensiahan kay Hananias. Sang ginpamatukan sa publiko sining butig nga manalagna ang pulong ni Jehova, gintadlong sia ni Jeremias kag ginpaathag kon paano makilala ang matuod nga manalagna. Nagdala si Jeremias sing gota nga kahoy para ilaragway nga mangin ulipon sila sa Babilonia. Naakig si Hananias kag ginbali ang gota. Mahimo nga sobra pa sa sini ang himuon ni Hananias. Gani ano ang ginhimo ni Jeremias? Aton mabasa: “Naglakat si Jeremias nga manalagna.” Huo, naghalin si Jeremias. Sang ulihi, ginpabalik sia ni Jehova para isiling kay Hananias kon ano ang himuon sang Dios—ang mga Judiyo ulipunon sang hari sang Babilonia kag mapatay si Hananias.—Jer. 28:1-17.

¹² Ginapakita sini nga kinahanglan mangin maisugon kita kag maalamon kon nagabantala. Kon ang tagbalay indi magbaton sang mensahe sang Kasulatan kag nagapangakig na ukon nagapamahog pa gani, mahalin na lang kita sing matinahuron kag masaylo sa iban nga balay. Indi kita dapat makigbais parte sa maayong balita. Kon may ‘pagpugong kita sa kaugalingon sa idalom sang malaut,’ mahimo pa naton mabuligan ang tagbalay sa masunod nga tion.—Basaha ang 2 Timoteo 2:23-25; Hulu. 17:14.

13. Ngaa ginsilingan ni Jehova si Jeremias: “Indi ka mahadlok,” kag ngaa dapat naton ini binagbinagon?

¹³ Apektado ang matuod nga mga sumilimba sa malain nga mga kahimtangan sa Jerusalem antes sang kalaglagan sang 607 B.C.E. Gani mahangpan mo kon ngaa nagsiling ang Dios kay Jeremias: “Indi ka mahadlok.” (Jer. 1:8; Pan. 3:57) Ginsugo man sia ni Jehova nga isugid ini sa mga tawo. (Basaha ang Jeremias 46:27.) Ano ang aton matun-an sa sini? Sa sining mabudlay nga tion sang katapusan, kon kaisa mahimo kita mahadlok. Gani, pamatian bala naton si Jehova, nga daw nagasiling sa aton: “Indi ka mahadlok”? Sa umpisa sini nga libro, nabinagbinag naton nga ginbuligan sang Dios si Jeremias sa sinang makahaladlok gid nga tion. Repasuhon naton sing makadali ang natabo para mahibaluan ang leksion sini sa aton.

14, 15. (a) Ano ang mabudlay nga sitwasyon ni Jeremias? (b) Paano gintuman ni Jehova ang iya saad nga amligan si Jeremias?

¹⁴ Sang ginlikupan sang mga Babilonianhon ang Jerusalem, grabe gid ang gutom. Wala magdugay, naubusan sila sing pagkaon. (Jer. 37:21) Magluwas sa gutom, ginbutang pa si Jeremias sa lugar nga diutayan lang niya nangin lulubngan. Ginpilit sang mga pangulo sang Juda ang talawan nga si Hari Sedequias nga ipahulog si Jeremias sa madalom nga bubon nga puro lunang. Samtang nagalugdang si Jeremias sa lunang, wala na sia sing mapensaran nga paagi nga magaluwas sa iya. Kon ikaw si Jeremias, indi ka bala mahadlok?—Jer. 38:4-6.

¹⁵ Tawo man si Jeremias kaangay sa aton, pero nagsalig sia sa saad ni Jehova nga indi sia pagbiyaan. (Basaha ang Jeremias 15:20, 21.) Ginpadyaan bala sia ni Jehova? Nahibaluan naton nga ginbuligan sia. Ginpahulag sang Dios si Ebed-melec nga supakon ang mga pangulo kag luwason si Jeremias. Sa pahanugot sang hari, ginhaw-as ni Ebed-melec ang manalagna sa madalom nga bubon.—Jer. 38:7-13.

16. Sa ano nga mga katalagman ginluwas ni Jehova ang mga matutom sa iya?

¹⁶ Bisan pa nabatak na si Jeremias gikan sa bubon, yara gihapon sia sa katalagman. Nagapakiluoy para kay Jeremias, si Ebed-melec nagsiling sa hari: “Mapatay [sia] didto sa gutom. Kay wala na sing tinapay sa siudad.” (Jer. 38:9) Wala na gid sing pagkaon sa Jerusalem amo nga nangin kanibal ang mga tawo. Pero ginbuligan liwat ni Jehova ang iya manalagna. Kag ginpalab-ot ni Jeremias kay Ebed-melec ang garantiya nga amligan sia ni Jehova. (Jer. 39:16-18) Wala nalipatan ni Jeremias ang pasalig sang Dios: “Luwason ko ikaw.” (Jer. 1:8) Bangod gin-amligan sang Labing Gamhanan nga Dios ining duha ka matutom nga lalaki, wala sila napatay sang mga kaaway ukon sa gutom. Naluwas sila sang nalaglag ang siudad. Ano ang matun-an naton sini? Nagsaad si Jehova sing proteksion kag gintuman niya ang iya saad.—Jer. 40:1-4.

17. Ngaa dapat mo saligan ang saad ni Jehova nga amligan ang iya mga alagad?

¹⁷ Ang katumanan sang tagna ni Jesus parte sa katapusan sang sistema sang mga butang malapit na matuman. Sa indi madugay, matabo ang “mga tanda sa adlaw, sa bulan, kag sa mga bituon. Ang mga pungsod sa duta malisang kag indi mahibaluan ang himuon . . . samtang ang mga tawo nagakapunaw bangod sa kahadlok kag sa pagpaabot sa mga butang nga mahanabo sa duta.” (Luc. 21:25, 26) Hulaton na lang naton kon paano ini matabo kag kon paano ini magpahadlok sa madamo. Pero ano man ang matabo, indi gid maduhaduhaan ang ikasarang kag handum ni Jehova para luwason ang iya katawhan. Apang lain ang matabo sa mga wala niya nahamut-an. (Basaha ang Jeremias 8:20; 14:9.) Bisan pa mabudlay katama ang kahimtangan sang iya mga alagad, nga daw yara sila sa madulom nga bubon, luwason niya sila! Maaplikar sa iya katawhan ang ginsiling sang Dios kay Ebed-melec: “‘Buligan ko ikaw nga makapalagyo kag indi ka mapatay sa espada. Maluwas mo ang imo kabuhi, bangod nagsalig ka sa akon,’ siling ni Jehova.”—Jer. 39:18.

18. (a) Ano nga mga pinamulong ang nagpabag-o sa kabuhi ni Jeremias? (b) Ano ang kahulugan para sa imo sang sugo sang Dios sa Jeremias 1:7?

¹⁸ “Magkadto ka sa tanan nga pakadtuan ko sa imo; kag ihambal mo ang tanan nga isugo ko sa imo.” (Jer. 1:7) Nagbag-o ang kabuhi ni Jeremias sang nabatian niya ang sugo sang Dios. Sugod sina nga tion, gingamit niya ang iya kabuhi sa pagpahibalo sa “ginasiling ni Jehova.” Sulitsulit nga mabasa ini nga mga tinaga sa tulun-an sang Jeremias. Sa katapusan nga kapitulo, ginsaysay ni Jeremias ang pagkabihag sang Jerusalem kag ang pagkatapok sang katapusan nga hari, si Sedequias. Huo, padayon nga gintudluan kag ginpalig-on ni Jeremias ang katawhan sang Juda nga tumanon si Jehova tubtob nga natapos ang iya asaynment.

19, 20. (a) Ngaa dapat mo ilugon ang pag-alagad ni Jeremias? (b) Ano ang kaangtanan sang pagbantala sa kalipay kag pagkakontento? (c) Ano ang epekto sa imo sa pagbinagbinag sang tulun-an sang Jeremias kag Panalambiton?

¹⁹ May madamo nga pagkaanggid sa asaynment ni Jeremias kag sa ministeryo sang mga Saksi ni Jehova karon. Pareho sa iya, ginaalagad mo ang matuod nga Dios sa tion sang paghukom. Madamo ang imo obligasyon, pero ang pagbantala amo ang labing importante mo nga buluhaton sa sining sistema sang mga butang. Paagi sa sini, madayaw mo ang dungganon nga ngalan sang Dios kag ginabaton ang bug-os nga kinamatarong kag awtoridad sang Soberano sa bug-os uniberso. (Basaha ang Panalambiton 5:19.) Ginapakita mo man ang dalayawon nga gugma sa imo isigkatawo paagi sa pagbulig sa ila nga makilala ang matuod nga Dios kag mahibaluan ang iya mga ginapatuman para matigayon ang kabuhi.—Jer. 25:3-6.

²⁰ Tuhoy sa ginsugo ni Jehova sa iya, nagsiling si Jeremias: “Naghugyaw kag nagkalipay ang akon tagipusuon tungod sang imo pulong; kay gintawag ako sa imo ngalan, O Jehova nga Dios sang mga kasuldadusan.” (Jer. 15:16) Ini nga kalipay kag pagkakontento mabatyagan man karon sang tanan nga nagapamulong para sa matuod nga Dios. Gani, may rason ka gid nga padayunon ang pagsugid sang mensahe ni Jehova, kaangay ni Jeremias.