Ang Una nga Hari sang Israel

Ginhatagan ni Jehova sing mga hukom ang Israel para manguna sa ila, pero gusto nila sang hari. Nagsiling sila kay Samuel: ‘Ang tanan nga pungsod sa palibot naton may mga hari. Gusto man namon sing hari.’ Pamatyag ni Samuel sala ini, gani ginpangamuyo niya ini kay Jehova. Si Jehova nagsiling sa iya: ‘Indi ikaw ang ginasikway sang katawhan. Ako ang ila ginasikway. Sugiri sila nga hatagan ko sila sang hari, pero ina nga hari madamo sing ipatuman sa ila.’ Pero, naghambal gihapon ang katawhan: ‘Sige lang. Gusto namon nga may hari kami!’

Si Jehova nagsiling kay Samuel nga si Saul ang mangin una nga hari. Sang nagbisita si Saul kay Samuel sa Rama, ginhimo niya sia nga hari paagi sa pagbubo sang lana sa iya ulo.

Sang ulihi, ginpatawag ni Samuel ang mga Israelinhon nga magtipon para ipakilala sa ila ang ila hari. Pero indi nila makita si Saul. Kabalo ka bala kon ngaa? Kay nagapanago sia sa mga kargamento. Sang nakita nila si Saul, gindala nila sia kag ginpatindog sa tunga sang katawhan. Mas mataas si Saul sa tanan nga tawo didto, kag guapo gid sia katama. Si Samuel nagsiling: ‘Tan-awa ninyo ang ginpili ni Jehova.’ Ang katawhan nagsinggit: “Mabuhi ang hari!”

Sang primero, ginapamatian ni Hari Saul si Samuel kag ginatuman niya si Jehova. Pero nagbag-o sia. Halimbawa, indi puede si Saul maghalad sing mga halad. Isa ka bes, ginhambalan ni Samuel si Saul nga hulaton sia, pero nadugayan si Samuel. Gani, nagdesisyon si Saul nga sia na lang ang mahalad. Ano ang reaksion ni Samuel? Ginsilingan niya si Saul: ‘Dapat gintuman mo si Jehova.’ Nakatuon ayhan si Saul sa iya sala?

Sang ulihi, sang nakig-away si Saul sa mga Amaleknon, ginsilingan sia ni Samuel nga dapat wala sia sing ibilin nga buhi. Pero wala ginpatay ni Saul si Hari Agag. Si Jehova nagsiling kay Samuel: ‘Gintalikdan ako ni Saul, kag wala na sia nagapamati sa akon.’ Nasubuan gid si Samuel, kag ginsilingan niya si Saul: ‘Bangod wala mo na ginatuman si Jehova, magapili sia sing bag-o nga hari.’ Sang nagtalikod si Samuel para maglakat, ginhawiran ni Saul ang sidsid sang iya bayo kag nagisi ini. Dayon ginsilingan ni Samuel si Saul: ‘Kuhaon man ni Jehova ang ginharian sa imo.’ Ihatag ni Jehova ini nga ginharian sa isa nga magapalangga kag magatuman sa iya.